Read Papantla Totonac Mateo 5 Bible Online

Mateo 5 - Papantla Totonac bible

Mateo 5

¹I ora Jesus a mira e multitutnan, El a subi bai riba seru; i ora ku El a kai sinta, Su disipelnan a bin serka djé.

²I El a habri Su boka i a kuminsa sina nan, bisando:

³"Bendishona ta esnan pober di spiritu, pasobra di nan e reino di shelu ta.

⁴Bendishona ta esnan ku ta yora, pasobra nan lo wordu konsola.

⁵Bendishona ta esnan umilde, pasobra nan lo ereda e tera.

⁶Bendishona ta esnan ku tin hamber i set pa hustisia, pasobra nan lo wordu sasia.

⁷Bendishona ta esnan miserikordioso, pasobra nan lo risibi miserikordia.

⁸Bendishona ta esnan di kurason puru, pasobra nan lo mira Dios.

⁹Bendishona ta esnan ku ta hasi pas, pasobra nan lo wordu yama yunan di Dios.

¹⁰Bendishona ta esnan ku ta wordu persigui pa kousa di hustisia, pasobra di nan e reino di shelu ta.

¹¹"Bendishona boso ta ora ku hende insulta boso i persigui boso, i ta gana tur klase di maldat riba boso pa Mi kousa.

¹²Regosiha i sea kontentu, pasobra boso rekompensa den shelu ta grandi; pasobra asina nan a persigui e profetanan ku tabata prome ku boso.

¹³"Boso ta e salu di tera, ma si e salu perde smak, ku kiko lo e wordu hasi salu atrobe? E no ta sirbi pa nada mas, sino pa wordu tira afo i pa hende trapa riba dje.

¹⁴"Boso ta e lus di mundu. Un stat situa riba un seru no por keda skondi.

¹⁵Tampoko hende no ta sende lampi pon'e bou di un kaha di midi trigo, ma riba un kandela, i e ta lusa pa tur ku ta den kas.

¹⁶Laga boso lus briya dilanti di hende di tal manera ku nan por mira boso bon obranan i glorifika boso Tata ku ta den shelu.

¹⁷"No kere ku Mi a bin pa aboli e Lei of e Profetanan; Mi no a bin pa aboli, sino pa kumpli.

¹⁸Pasobra di berdat Mi ta bisa boso, te ora ku shelu i tera pasa, ningun yota ni tilde di e Lei lo no pasa, te ora ku tur kos keda kumpli.

¹⁹Esun anto ku anula un di e mandamentunan di mas chikitu aki, i sina hende asina, lo wordu yama esun di mas chikitu den e reino di shelu; ma esun ku warda nan i sina nan na otro, esei lo wordu yama grandi den e reino di shelu.

²⁰Pasobra Mi ta bisa boso, ku si boso hustisia no surpasa hustisia di e eskribanan i fariseonan, boso lo no drenta e reino di shelu.

²¹"Boso a tende ku a wordu bisa na e hendenan di prome aya: 'No mata' i 'Esun ku mata lo ta kulpabel dilanti di korte.'

²²Ma Ami ta bisa boso ku ken ku rabia ku su ruman lo ta kulpabel dilanti di korte; i ken ku bisa su ruman: 'Kens,' lo ta kulpabel pa bai dilanti di konsilio; i ken ku bisa: 'Bobo,' lo ta kulpabel pa bai den kandela di fiernu.

²³"Pesei, si bo presenta bo ofrenda na altar, i ayanan bo korda ku bo ruman tin algu kontra bo,

²⁴laga bo ofrenda ayanan dilanti di altar, i bai; rekonsilia ku bo ruman prome, i despues bin presenta bo ofrenda.

²⁵"Pura drecha asunto ku bo atversario, mientras ku bo ta huntu kune na kaminda, pa bo atversario no entregabo na hues, i hues entregabo na ofisial, i bo wordu tira den prizon.

²⁶Di berdat Mi ta bisabo, lo bo no sali for di ayaden, te ora ku bo a paga delaster un sen.

²⁷"Boso a tende ku a wordu bisa: 'No komete adulterio';

²⁸ma Ami ta bisa boso ku ken ku wak un muhe pa dese'e, ya kaba el a komete adulterio kune den su kurason.

²⁹I si bo wowo drechi hasibo trompeka, sak'e tir'afo, pasobra ta miho pa bo ku un di e miembronan di bo kurpa bai perdi, i no henter bo kurpa wordu tira den fiernu.

³⁰I si bo man drechi hasibo trompeka, kap e tir'afo; pasobra ta miho pa bo ku un di e miembronan di bo kurpa bai perdi, i no henter bo kurpa wordu tira den fiernu.

³¹"Tambe a wordu bisa: 'Ken ku diborsia su esposa, lagu'e dun'e un karta di diborsio.'

³²Ma Ami ta bisa boso ku ken ku diborsia su esposa, si no ta pa motibu di inmoralidat, ta hasi e muhe komete adulterio; i ken ku kasa ku un muhe diborsia ta komete adulterio.

³³"Ademas, boso a tende ku a wordu bisa na e hendenan di prome aya: 'No hura falsu, ma kumpli ku bo huramentunan na SENOR.'

³⁴Ma Ami ta bisa boso, no hura di ningun manera, ni pa shelu, pasobra esei ta e trono di Dios,

³⁵ni pa tera, pasobra esei ta e banki pa Su pianan, ni pa Jerusalem, pasobra esei ta e stat di e gran Rei.

³⁶Ni pa bo kabes lo bo no hura, pasobra ni un drachi di kabei bo no por hasi blanku ni pretu.

³⁷Ma laga bo 'si' ta 'si', of bo 'no' ta 'no'; i tur loke ta mas ku esei ta for di e malbado.

³⁸"Boso a tende ku a wordu bisa: 'Wowo pa wowo, i djente pa djente.'

³⁹Ma Ami ta bisa boso, no resisti e hende malbado. Ma ken ku dal bo na bo banda drechi di kara, dun'e e otro banda tambe.

⁴⁰I si un hende kier hibabo dilanti di hues i kier tuma bo tunika, lagu'e tuma bo mantel tambe.

⁴¹I si un hende obligabo bai un miya kune, bai dos kune.

⁴²Duna esun ku pidibo, i no rechasa esun ku kier fia serka bo.

⁴³"Boso a tende ku a wordu bisa: 'Stima bo prohimo i odia bo enemigu.'

⁴⁴Ma Ami ta bisa boso, stima boso enemigunan, bendishona esnan ku ta maldishona boso, hasi bon na esnan ku ta odia boso, i hasi orashon pa esnan ku ta maltrata boso i ta persigui boso,

⁴⁵pa boso por ta yunan di boso Tata ku ta den shelu; pasobra E ta hasi Su solo sali riba mal hende i riba bon hende, i ta laga awa yobe riba hende hustu i riba hende inhustu.

⁴⁶Pasobra si boso stima esnan ku ta stima boso, ki rekompensa boso tin? E publikanonan tambe no ta hasi meskos?

⁴⁷I si boso kuminda boso rumannan so, kiko boso ta hasi mas ku otronan? E paganonan tambe no ta hasi meskos?

⁴⁸Pesei boso mester ta perfekto, meskos ku boso Tata selestial ta perfekto.