Read Papantla Totonac Mateo 6 Bible Online

Mateo 6 - Papantla Totonac bible

Mateo 6

¹"Perkura pa boso no hasi boso obranan di karidat dilanti di hende, pa nan mira; sino boso lo no tin rekompensa serka boso Tata ku ta den shelu.

²"Pesei, ora bo ta hasi bo obranan di karidat, no laga toka trompet bo dilanti, manera e hipokritnan ta hasi den snoa i riba kaya pa nan risibi onor serka hende. Di berdat Mi ta bisa boso, ya nan tin nan pago kaba.

³Ma ora bo ta duna limosna, no laga bo man robes sa kiko bo man drechi ta hasi,

⁴pa bo limosna keda den skondi; i bo Tata, ku ta mira den skondi, lo rekompensabo.

⁵"I ora bo ta hasi orashon, no sea manera e hipokritnan, pasobra nan ta gusta para hasi orashon den snoa i na skina di kaya, pa hende mira nan. Di berdat Mi ta bisa boso, ya nan tin nan pago kaba.

⁶Ma abo, ora bo ta hasi orashon, bai den bo kamber di mas paden, i ora bo a sera bo porta, hasi orashon na bo Tata ku ta den skondi; i bo Tata, ku ta mira den skondi, lo rekompensabo.

⁷I ora bo ta hasi orashon, no keda ripiti palabranan bano manera e paganonan ta hasi, pasobra nan ta kere ku nan lo wordu tendi pa motibu di nan kantidat di palabra.

⁸Pesei, no sea meskos ku nan, pasobra boso Tata sa kiko boso tin mester, prome ku boso pidié.

⁹"Pues, hasi orashon anto asin'aki: 'Nos Tata ku ta den shelu, Bo nomber sea santifika.

¹⁰Ku Bo reino bin. Ku Bo boluntat sosode na tera meskos ku den shelu.

¹¹Duna nos awe nos pan di kada dia.

¹²I pordona nos nos debenan, meskos ku nos tambe ta pordona nos debedonan.

¹³I no hiba nos den tentashon, ma libra nos for di e malbado. [Pasobra di Bo e reino ta, i e poder i e gloria, pa semper. Amen].'

¹⁴Pasobra si boso pordona hende nan transgreshonnan, boso Tata selestial tambe lo pordona boso.

¹⁵Ma si boso no pordona hende, boso Tata tampoko lo no pordona boso transgreshonnan.

¹⁶"I ki ora ku boso ta yuna, no traha kara tristu manera e hipokritnan, pasobra nan ta neglisha nan aparensia pa hende mira ku nan ta yuna. Di berdat Mi ta bisa boso, ya nan tin nan rekompensa kaba.

¹⁷Ma abo, ora bo ta yuna, hunta bo kabes ku zeta i laba bo kara,

¹⁸pa hende no mira ku bo ta yuna, sino solamente bo Tata ku ta den skondi; i bo Tata, ku ta mira den skondi, lo rekompensabo.

¹⁹"No montona tesoro pa boso mes riba tera, kaminda mot i frustu ta destrui nan, i kaminda ladron ta kibra drenta i horta;

²⁰ma montona tesoro pa boso mes den shelu, kaminda ni mot ni frustu no ta destrui nan, i kaminda ladron no ta kibra drenta ni horta;

²¹pasobra kaminda boso tesoro ta, einan boso kurason lo ta tambe.

²²"Lampi di e kurpa ta e wowo; asina ku si bo wowo ta bon, henter bo kurpa lo ta yen di lus.

²³Ma si bo wowo ta malu, henter bo kurpa lo ta yen di skuridat. Asina anto, si e lus ku ta den bo ta skuridat, ki grandi e skuridat ei ta!

²⁴"Ningun hende no por sirbi dos shon; pasobra of e lo odia esun i stima e otro, of e lo ta leal na esun i despresia e otro. Boso no por sirbi Dios i rikesa.

²⁵"Pa e motibu aki Mi ta bisa boso, no preokupa boso mes pa boso bida, kiko boso lo kome of kiko boso lo bebe; tampoko pa boso kurpa, kiko boso lo bisti. Bida no ta mas ku kuminda, i kurpa mas ku pana di bisti?

²⁶Mira e parhanan di shelu ku no ta sembra ni kosecha, ni ta warda den mangasina, i tog boso Tata selestial ta alimenta nan. Boso no tin muchu mas balor ku nan?

²⁷I kual di boso, dor di preokupa, por anadi un kodo na su haltura?

²⁸"I pakiko boso ta preokupa boso mes ku bistimentu? Mira kon e lelinan di sabana ta krese; nan no ta traha mata kurpa, ni nan no ta hila,

²⁹ma Mi ta bisa boso ku asta Salomon den tur su gloria no tabata bisti manera un di esakinan.

³⁰Ma si di tal manera Dios ta bisti e yerba di sabana, ku awe t'ei i manan ta wordu tira den fornu, lo E no hasi muchu mas pa boso, O hendenan di poko fe?

³¹No preokupa boso mes anto, bisando: 'Kiko nos lo kome?' of 'Kiko nos lo bebe?' of 'Kiko nos lo bisti?'

³²Pasobra tur e kosnan aki e paganonan ta buska; ma boso Tata selestial sa ku boso tin mester di tur e kosnan aki.

³³Ma buska prome e reino di Dios i Su hustisia, i tur e kosnan aki lo wordu anadi na boso.

³⁴Pesei, no preokupa boso mes pa e dia di manan; pasobra e dia di manan lo perkura pa su mes. Kada dia tin sufisiente problema di su mes.