Read Papantla Totonac Mateo 7 Bible Online

Mateo 7 - Papantla Totonac bible

Mateo 7

¹"No huzga, pa boso no wordu huzga.

²Pasobra di e mesun manera ku boso huzga, boso lo wordu huzga; i ku e mesun midi ku boso midi, lo wordu midi pa boso tambe.

³"I pakiko bo ta wak e stof den wowo di bo ruman, ma no ta ripara e balki ku tin den bo mes wowo?

⁴Of kon bo por bisa bo ruman: 'Lagami saka e stof for di bo wowo,' i mira, e balki no ta den bo mes wowo?

⁵Abo, hipokrit, saka prome e balki for di bo mes wowo, i e ora ei lo bo mira bon kla pa saka e stof for di wowo di bo ruman.

⁶"No duna kacho loke ta santu, ni tira boso perlanan pa porko, pa nan no trapa nan ku nan pia, i nan bira sker boso na pida-pida.

⁷"Pidi, i lo wordu duna na boso; buska, i boso lo hana; bati, i lo wordu habri pa boso.

⁸Pasobra ken ku pidi ta risibi, i esun ku buska ta hana, i pa esun ku bati lo wordu habri.

⁹"Of kual di boso, si su yu homber pidie pan, lo dun'e un piedra?

¹⁰Of si e pidi piska, lo e dun'e un kolebra?

¹¹Si boso anto, siendo malbado, sa di duna boso yunan loke ta bon, kuantu mas boso Tata ku ta den shelu lo duna loke ta bon na esnan ku pidié!

¹²Pesei, tur loke boso kier pa hende hasi pa boso, hasi meskos pa nan, pasobra esaki ta e Lei i e Profetanan.

¹³"Drenta dor di e porta smal, pasobra hanchu ta e porta i espasioso e kaminda ku ta hiba na destrukshon, i hopi ta esnan ku ta drenta dor di dje.

¹⁴Pasobra chikitu ta e porta i smal e kaminda ku ta hiba na bida, i poko ta esnan ku ta han'e.

¹⁵"Tene kuidou ku profeta falsu, ku ta bin serka boso bisti manera karne, ma di paden nan ta lobo hambra.

¹⁶Na nan fruta boso lo konose nan. Hende sa kita wendruif for di mata di sumpina anto, of figo for di bringamosa?

¹⁷Asina tur bon palu ta duna bon fruta; ma e palu malu ta duna mal fruta.

¹⁸Un bon palu no por duna mal fruta, ni un palu malu no por duna bon fruta.

¹⁹Tur palu ku no ta duna bon fruta ta wordu gekap i tira den kandela.

²⁰Asina anto, na nan fruta boso lo konose nan.

²¹"No ta tur hende ku bisaMi: 'Senor, Senor,' lo drenta e reino di shelu; ma esun ku hasi e boluntat di Mi Tata ku ta den shelu.

²²Hopi lo bisaMi den e dia ei: 'Senor, Senor, nos no a profetisa den Bo nomber, i den Bo nomber a saka demono, i den Bo nomber a hasi hopi milager?'

²³E ora ei lo Mi deklara na nan: 'Nunka Mi no a konose boso; bai for di Mi, boso ku ta hasi inikidat.'

²⁴"Pesei, ken ku tende e palabranan aki di Mi, i hasi nan, lo wordu kompara ku un homber sabi ku a traha su kas riba baranka.

²⁵I awaseru a kai, diluvionan a bin, i bientunan a supla, i a suta duru kontra e kas ei; i tog e no a kai, pasobra e tabata funda riba baranka.

²⁶I ken ku tende e palabranan aki di Mi, i no hasi nan, lo ta manera un homber bobo ku a traha su kas riba santu.

²⁷I awaseru a kai, diluvionan a bin, i bientunan a supla, i a suta duru kontra e kas ei; i el a kai, i su kaida tabata grandi."

²⁸I a sosode ku ora Jesus a kaba di papia e palabranan aki, e multitutnan a keda asombra di Su sinansa;

²⁹pasobra E tabata sina nan manera un hende ku tin outoridat, i no manera nan eskribanan.