Read Papantla Totonac Mateo 8 Bible Online

Mateo 8 - Papantla Totonac bible

Mateo 8

¹I ora Jesus a baha for di e seru, multitutnan grandi tabata siguié.

²I mira, un leproso a bin serka djé, i a buig te na suela Su dilanti, bisando: "Senor, si Bo kier, Bo por hasimi bira limpi."

³I Jesus a saka Su man i a mishi kune, bisando: "Mi kier! Sea limpi!" I mesora el a keda limpi di su lepra.

⁴I Jesus a bis'e: "Mira pa bo no konta ningun hende; ma bai, mustra bo mes na e saserdote, i presenta e ofrenda ku Moises a ordena, komo un testimonio pa nan."

⁵I ora ku El a drenta Kapernaum, un senturion a bin serka djé i tabata rogu'E,

⁶bisando: "Senor, mi sirbido ta drum! paralisa na kas, i e tin hopi dolo."

⁷I El a bis'e: "Lo Mi bin kur'e."

⁸Ma e senturion a kontesta i a bisa: "Senor, mi no ta digno pa Bo bin bou di mi dak, ma djis papia un palabra, i mi sirbido lo ta kura.

⁹Pasobra ami tambe ta un homber bou di outoridat, ku solda bou di mi mando; i mi ta bisa esun aki: 'Bai!' i e ta bai, i esun aya: 'Bin!' i e ta bin; i mi esklabu: 'Hasi esaki!' i e ta hasie."

¹⁰Awor ora Jesus a tende esaki, El a keda atmira i a bisa esnan ku tabata siguié: "Di berdat Mi ta bisa boso, Mi no a hana ningun hende na Israel ku un fe asina grandi.

¹¹I Mi ta bisa boso ku hopi lo bin for di oriente i for di oksidente, i nan lo sinta na mesa huntu ku Abraham, Isaak i Jakob den e reino di shelu;

¹²ma e yunan di e reino lo wordu tira den e skuridat di pafo; den e luga ei lo tin yoramentu i mordementu riba djente."

¹³I Jesus a bisa e senturion: "Bai, i ku sosode ku bo manera bo a kere." I e sirbido a wordu kura na e mesun ora ei.

¹⁴I ora Jesus a yega na kas di Pedro, El a mira Pedro su suegra drum! malu na kama ku keintura.

¹⁵I El a mishi ku su man i e keintura a lagu'e; i el a lanta i a kuminsa sirbié.

¹⁶I ora nochi a sera nan a trese serka djé hopi hende ku tabata posei pa demono; i ku un palabra El a saka e spiritunan afo i a kura tur ku tabata malu,

¹⁷pa por a keda kumpli loke a wordu papia dor di profeta Isaias, kende a bisa: "E mes a tuma nos enfermedatnan riba djé i a karga nos malesanan".

¹⁸Awor ora Jesus a mira un multitut di hende ront di djé, El a duna ordu pa pasa pa e otro banda.

¹⁹I un eskriba a bin i a bis'E: "Maestro, lo mi siguiBo unda ku Bo bai."

²⁰I Jesus a bis'e: "Zoro tin kueba i parha di shelu tin neishi, ma e Yu di Hende no tin ningun luga pa pone Su kabes."

²¹I un otro di e disipelnan a bis'E: "Senor, permitimi prome pa bai i dera mi tata."

²²Ma Jesus a bis'e: "SiguiMi; i laga e mortonan dera nan mes mortonan."

²³I ora ku El a bai den e boto, Su disipelnan a siguié.

²⁴I mira, a lanta un tempestat pisa riba laman, asina ku e olanan tabata tapa e boto; ma E mes tabata na sono.

²⁵I Su disipelnan a bin serka djé i a lant'E for di sono, bisando: "Senor, salba nos, nos ta perese!"

²⁶I El a bisa nan: "Pakiko boso tin miedu, boso, hendenan di poko fe?" E ora ei El a lanta i a reprende e bientunan i e laman; i a bira kompletamente kalmo.

²⁷I e hendenan a keda atmira, bisando: "Ki sorto di hende esaki ta, ku asta bientunan i laman ta obedes'E?"

²⁸I ora ku El a yega na e otro banda na tera di e gadarenonan, dos homber posei pa demono, kendenan tabata sali for di e tumbanan, a bin kontr'E. Nan tabata asina violento ku ningun hende no por a pasa pa e kaminda ei.

²⁹I mira, nan a grita, bisando: "Kiko nos tin di hasi ku Bo, Yu di Dios? Bo a bin aki pa tormenta nos prome ku tempu?"

³⁰Awor na un distansia for di nan tabatin un trupa grandi di porko ta kome.

³¹I e demononan a kuminsa rogu'E, bisando: "Si Bo ta bai saka nos afo, manda nos bai den e trupa di porko."

³²I El a bisa nan: "Bai!" I nan a sali i a bai den e porkonan. I mira, henter e trupa a basha na kareda for di e bahada steil bai den laman, i a perese den e awanan.

³³I e kuidadonan di porko a hui bai den stat i a konta tur kos, tambe loke a pasa ku e hendenan posei pa demono.

³⁴I mira, henter e stat a sali pa kontra Jesus; i ora nan a mir'E, nan a rogu'E pa sali for di nan region.