Read Papantla Totonac Mateo 9 Bible Online

Mateo 9 - Papantla Totonac bible

Mateo 9

¹I El a bai den un boto, a krusa bai na e otro banda, i a yega na Su mes stat.

²I mira, nan a trese un paralitiko serka djé, ku tabata drumi riba un kama. I Jesus, mirando nan fe, a bisa e paralitiko: "Tene kurashi, Mi yu, bo pikanan ta pordona."

³I mira, algun di e eskribanan tabata bisa den nan mes: "E homber aki ta blasfema."

⁴I Jesus, konosiendo nan pensamentunan, a bisa: "Pakiko boso ta pensa maldat den boso kurason?

⁵Pasobra kiko ta mas fasil pa bisa: 'Bo pikanan ta pordona', of pa bisa: 'Lanta i kana'?

⁶Ma pa boso sa ku e Yu di Hende tin outoridat riba tera pa pordona pika" (e ora ei El a bisa e paralitiko): "Lanta, kohe bo kama i bai kas."

⁷Anto el a lanta i a bai kas.

⁸Ma ora ku e multitutnan a mira esaki, nan a keda yen di temor i a glorifika Dios, Kende a duna tal outoridat na hende.

⁹I ora Jesus tabata sigui Su kaminda for di einan, El a mira un homber ku yama Mateo, sinta den ofisina di belasting; i El a bis'e: "SiguiMi!" I el a lanta i a siguié.

¹⁰I a sosode ku ora Jesus tabata sinta na mesa den e kas, ata, hopi publikano i pekado a bin kome huntu ku Jesus i Su disipelnan.

¹¹I ora ku e fariseonan a mira esaki, nan a puntra Su disipelnan: "Pakiko boso Maestro ta kome huntu ku e publikanonan i pekadonan?"

¹²Ma ora ku El a tende esaki, El a kontesta: "No ta esnan ku ta salu tin mester di dokter, sino esnan ku ta malu.

¹³Ma bai i sina kiko esaki kier men: 'Mi ta desea kompashon i no sakrifisio,' pasobra Mi no a bin pa yama e hustunan, sino pekadonan."

¹⁴E ora ei e disipelnan di Juan a bin serka djé i a puntra: "Pakiko nos i e fariseonan ta yuna, ma Bo disipelnan si no ta yuna?"

¹⁵I Jesus a kontesta nan: "Akaso esnan ku ta atende e bruidehom por lamenta tanten ku e bruidehom ta huntu ku nan? Ma e dianan lo bin ku e bruidehom lo wordu kita for di nan, i e ora ei si nan lo yuna.

¹⁶"Ma ningun hende no ta pega un lapi di pana, ku no a kremp, na un bisti bieu; pasobra e lapi ta trek kita for di e bisti, i e sker ta bira pio.

¹⁷Tampoko hende no ta pone bina nobo den saku-di-kueru bieu; sino e sakunan ta rementa i e bina ta bash'afo, i e sakunan ta bai perdi; ma nan ta pone bina nobo den saku-di-kueru nobo, i tur dos ta keda preserva."

¹⁸Mientras ku E tabata papia e kosnan aki ku nan, ata, un ofisial di snoa a bin serka djé, i a buig Su dilanti, bisando: "Mi yu muhe a kaba di muri; ma bin i pone Bo man riba dje, i e lo biba."

¹⁹I Jesus a lanta i a siguie, i tambe Su disipelnan.

²⁰I mira, un muhe ku diesdos ana largu tabata sufri di un derama di sanger, a aserk'E di patras i a mishi ku zom di Su mantel;

²¹pasobra e tabata bisa den su mes: "Si mi djis mishi ku Su pana, lo mi bira bon."

²²Ma Jesus a drai wak, i mirando e, El a bisa: "Mi yu, tene kurashi; bo fe a salbabo." I mesora e muhe a bira bon.

²³I ora Jesus a drenta kas di e ofisial i a mira e tokadonan di fluit i e multitut ku tabata hasi boroto,

²⁴El a bisa: "Bai for di aki; pasobra e mucha muhe no a muri, ma ta na sono e ta." I nan a harié.

²⁵Ma ora ku e hendenan a wordu saka afo, El a bai paden i a kohe e mucha muhe na su man; i e mucha muhe a lanta.

²⁶I e notisia aki a plama den henter e tera ei.

²⁷I segun ku Jesus tabata sigui Su kaminda for di einan, dos homber siegu tabata siguié, gritando na bos haltu i bisando: "Tene miserikordia di nos, Yu di David!"

²⁸I despues ku El a drenta e kas, e hombernan siegu a bin serka djé, i Jesus a puntra nan: "Boso ta kere ku Mi por hasi esaki?" Nan a kontest'E: "Si, Senor."

²⁹E ora ei El a mishi ku nan wowo, bisando: "Ku sosode ku boso segun boso fe."

³⁰I nan wowo a wordu habri. I Jesus a taha nan striktamente, bisando: "Mira pa ningun hende no hana sa di e kos aki!"

³¹Ma nan a sali bai i a plama e notisia tokante di djé den henter e tera ei.

³²I ora nan tabata sali, ata, nan a trese un homber mudo, posei pa demono, serka djé.

³³I despues ku e demono a wordu saka afo, e homber mudo a kuminsa papia. I e multitutnan a keda atmira i a bisa: "Un kos asin'aki nunka no a wordu mira den Israel."

³⁴Ma e fariseonan tabata bisa: "E ta saka demono pa medio di e prens di demononan."

³⁵I Jesus tabata pasa den tur e statnan i pueblitonan, i tabata sina den nan snoanan i proklama e evangelio di reino i kura tur sorto di enfermedat i tur sorto di malesa.

³⁶I ora ku El a mira e multitutnan, El a sinti kompashon pa nan, pasobra nan tabata kansa i plama, manera karne sin wardado.

³⁷E ora ei El a bisa Su disipelnan: "E kosecha ta masha grandi, ma trahado ta poko.

³⁸Pesei, pidi e Senor di kosecha pa manda trahado na Su kosecha."