Read Papantla Totonac Markos 1 Bible Online

Markos 1 - Papantla Totonac bible

Markos 1

¹E prinsipio di e evangelio di Jesu-Cristo, e Yu di Dios.

²Manera ta para skirbi den profeta Isaias: "Mira, Mi ta manda Mi mensahero dilanti di Bo kara, kende lo prepara Bo kaminda;"

³"bos di un ku ta sklama den desierto: 'Prepara e kaminda di SENOR, hasi Su berehanan stret.'"

⁴Juan Boutista a parese den desierto, predikando un boutismo di repentimentu pa pordon di pika.

⁵I henter tera di Judea tabata sali bai serka dje, i henter pueblo di Jerusalem; i nan tabata wordu batisa dor di dje den Riu Jordan, konfesando nan pikanan.

⁶I Juan tabata bisti ku un pana traha di lana di kamel i tabatin un faha di kueru na su sintura, i e tabata kome tirakochi i miel di mondi.

⁷I e tabata predika, bisando: "Despues di mi ta bin Un ku ta mas poderoso ku mi, i ami no ta digno pa buk i los e strep di Su sandalia.

⁸Ami a batisa boso ku awa, ma E lo batisa boso ku Spiritu Santu."

⁹I a sosode den e dianan ei ku Jesus a bin for di Nazaret di Galilea, i a wordu batisa dor di Juan den Jordan.

¹⁰I mesora ku El a sali for di awa, El a mira e shelunan ta habri, i e Spiritu ta baha manera un palomba riba djé.

¹¹I a sali un bos for di shelu: "Abo ta Mi Yu stima, den Bo Mi tin goso."

¹²I mesora e Spiritu a mand'E den desierto.

¹³I El a keda kuarenta dia den desierto i a wordu tenta dor di Satanas; i E tabata huntu ku e bestianan di mondi, i e angelnan tabata sirbié.

¹⁴I despues ku Juan a wordu kohl prezo, Jesus a bin Galilea, proklamando e evangelio di Dios,

¹⁵i bisando: "E tempu ta kumpli, i e reino di Dios ta serka. Repenti i kere e evangelio."

¹⁶I ora ku E tabata kana kantu di Laman di Galilea, El a mira Simon i Andres, ruman homber di Simon, ta tira reda den laman; pasobra nan tabata piskado.

¹⁷I Jesus a bisa nan: "SiguiMi, i lo Mi hasi boso bira piskado di hende."

¹⁸I mesora nan a laga e redanan para i a siguié.

¹⁹I ora ku El a kana bai un poko mas leu, El a mira Santiago, yu homber di Zebedeo, i su ruman homber Juan, kendenan tambe tabata den boto ta drecha nan redanan.

²⁰I mesora El a yama nan; i nan a laga nan tata Zebedeo den e boto ku e sirbidonan kontrata, i a siguié.

²¹I nan a yega na Kapernaum; i mesora riba dia di Sabat El a bai den snoa i a kuminsa sina e hendenan.

²²I nan a keda asombra di Su sinansa, pasobra E tabata sina nan manera un hende ku tin outoridat i no manera e eskribanan.

²³I net na e ora ei tabatin den nan snoa un homber ku un spiritu impuru, i el a dal un gritu,

²⁴bisando: "Kiko nos tin di hasi ku Bo, Jesus di Nazaret? Bo a bin pa destrui nos? Mi sa ken Bo ta: Esun Santu di Dios!"

²⁵I Jesus a reprend'e, bisando: "Keda ketu, i sali for di dje!"

²⁶I e spiritu impuru a bent'e abou i a lagu'e ta trek di steipi, i ku gritu duru el a sali for di dje.

²⁷I nan tur a keda strana i nan tabata diskuti nan ku nan, bisando: "Kiko esaki ta? Un sinansa nobo ku outoridat! Asta e spiritunan impuru E ta ordena, i nan ta obedes'E."

²⁸I mesora e notisia tokante di djé a plama tur kaminda den henter e distrikto ront di Galilea.

²⁹I mesora despues ku nan a sali for di snoa, nan a bai den e kas di Simon i Andres, huntu ku Santiago i Juan.

³⁰Awor e suegra di Simon tabata drumi malu ku keintura; i mesora nan a papia kuné tokante di dje.

³¹I El a bin serka dje, a koh'e na su man i a lant'e, i e keintura a lagu'e i el a kuminsa sirbi nan.

³²I ora nochi a sera, despues ku solo a baha, nan tabata trese serka djé tur esnan ku tabata malu i esnan ku tabata posei pa demono.

³³I henter e stat a aglomera na e porta.

³⁴I El a kura hopi hende ku tabata sufri di tur sorto di malesa, i a saka hopi demono afo; i E no tabata permiti e demononan papia, pasobra nan tabata sa ken E ta.

³⁵I mainta tempran, ora tabata skur ainda, El a lanta, a sali pafo i a bai na un luga solitario, i tabata hasi orashon einan.

³⁶I Simon i su kompaneronan a bai busk'E;

³⁷i nan a han'E i a bis'E: "Tur hende ta buskaBo."

³⁸I El a bisa nan: "Laga nos bai otro kaminda, na e statnan serka aki banda, pa Mi por predika ayanan tambe; pasobra ta pa e motibu ei Mi a bin."

³⁹I El a bai den nan snoanan den henter Galilea, i tabata predika i saka demono afo.

⁴⁰I un leproso a bin serka djé, i a rogu'E i a kai na rudia Su dilanti, i a bis'E: "Si Bo kier, Bo por hasimi bira limpi."

⁴¹I yen di kompashon El a saka Su man, i a mishi kune i a bis'e: "Mi kier, sea limpi."

⁴²I mesora e lepra a kita for di dje i el a keda limpi.

⁴³I El a spiert'e striktamente i a mand'e bai mesora,

⁴⁴i El a bis'e: "Mira pa bo no bisa ningun hende nada, ma bai, mustra bo mes na e saserdote i ofrese pa bo purifikashon loke Moises a ordena, komo un testimonio pa nan."

⁴⁵Ma el a bai i a kuminsa proklama esaki tur kaminda i plama e notisia, di tal manera ku Jesus no por a bai publikamente den ningun stat mas, ma tabata keda pafo den luganan desierto; i nan tabata bin serka djé for di tur parti.