Read Papantla Totonac Markos 10 Bible Online

Markos 10 - Papantla Totonac bible

Markos 10

¹I El a lanta i a bai for di einan na e region di Judea, i te na e otro banda di Jordan; i un multitut di hende a bin serka djé atrobe, i manera tabata Su kustumber, El a bolbe kuminsa sina nan.

²I algun fariseo a bin serka djé pa pon'E na prueba, i a puntr'E si Lei ta permit! un homber diborsia su esposa.

³I El a kontesta i a bisa nan: "Kiko Moises a ordena boso?"

⁴I nan a kontesta: "Moises a permit! un homber pa skirbi un karta di diborsio i pa mand'e bai."

⁵Ma Jesus a kontesta nan: "Pa motibu di e duresa di boso kurason el a skirbi e mandamentu aki pa boso.

⁶Ma for di prinsipio di kreashon Dios a traha nan homber i muhe.

⁷'Pa e motibu aki un homber lo bandona su tata i mama i lo uni ku su esposa,

⁸i nan dos lo bira un karni;' di manera ku nan no ta dos mas, sino un karni.

⁹Pesei, loke Dios a uni, no laga ningun hende separa."

¹⁰I na kas e disipelnan a bolbe puntr'E tokante di e mesun asunto.

¹¹I El a bisa nan: "Ken ku diborsia su esposa i kasa ku un otro muhe ta komete adulterio kontra dje;

¹²i si un muhe diborsia su esposo i kasa ku un otro homber, e ta komete adulterio."

¹³I nan tabata trese mucha chikitu serka djé, pa E pone man riba nan; i e disipelnan tabata reprende nan.

¹⁴Ma ora Jesus a mira esaki, El a keda tur indigna i a bisa nan: "Laga e muchanan bin serka Mi; no stroba nan, pasobra e reino di Dios ta pertenese na esnan manera esakinan.

¹⁵Di berdat Mi ta bisa boso, esun ku no risibl e reino di Dios manera un mucha lo no drenta den dje."

¹⁶I El a tuma nan den Su brasa i a bendishona nan, poniendo Su mannan riba nan.

¹⁷I ora ku E tabata sali bai pa sigui Su kaminda, un homber a kore bin serka djé i a kai na rudia Su dilanti i a puntr'E: "Bon Maestro, kiko mi mester hasi pa ereda bida eterno?"

¹⁸I Jesus a puntr'e: "Pakiko bo ta yamaMi bon? Ni un hende no ta bon sino Dios so.

¹⁹Bo sa e mandamentunan: 'No mata; no komete adulterio; no horta; no duna testimonio falsu; no komete froude; onra bo tata i bo mama.' "

²⁰I el a bis'E: "Maestro, tur e kosnan aki mi a warda for di tempu di mi hubentut."

²¹I Jesus, ora ku El a wak e, El a stim'e i a bis'e: "Un kos bo falta: bai i bende tur loke bo tin, i duna na hende pober, i lo bo tin tesoro den shelu; i bin, siguiMi."

²²Ma e palabranan aki a hasie bira masha aflig!, i el a bai tur tristu, pasobra e tabata dono di hopi propiedat.

²³I Jesus, mirando ront, a bisa Su disipelnan: "Ki difisil lo ta pa esnan ku ta riku drenta e reino di Dios!"

²⁴I e disipelnan a keda strana di Su palabranan. Ma Jesus a kontesta atrobe i a bisa nan: "Yunan, ki difisil ta pa drenta e reino di Dios!

²⁵Ta mas fasil pa un kamel pasa dor di wowo di un angua, ku pa un hende riku drenta e reino di Dios."

²⁶I nan a keda mas asombra ainda i a puntr'E: "Ta ken por wordu salba anto?"

²⁷I Jesus a wak nan i a bisa: "Serka hende esaki ta imposibel, ma no serka Dios; pasobra tur kos ta posibel serka Dios."

²⁸Pedro a kuminsa bis'E: "Ata, nos a bandona tur kos i a siguiBo."

²⁹Jesus a bisa: "Di berdat Mi ta bisa boso, no tin ningun hende ku a bandona kas of ruman hombernan of ruman muhenan of mama of tata of yunan of kunukunan pa Mi motibu i pa motibu di evangelio,

³⁰ku lo no risibi shen bes mas tantu den e tempu aki: kasnan i ruman hombernan i ruman muhenan i mamanan i yunan i kunukunan, huntu ku persekushonnan; i den e siglo ku ta bin, bida eterno.

³¹Ma hopi ku ta prome lo ta ultimo; i e ultimonan lo ta prome."

³²I nan tabata na kaminda pa bai Jerusalem, i Jesus tabata kana nan dilanti; i nan a keda strana i esnan ku tabata sigui tabatin miedu. I atrobe El a hala e diesdosnan un banda i a kuminsa konta nan kiko lo bai sosode kuné,

³³bisando: "Mira, nos ta bai Jerusalem, i e Yu di Hende lo wordu entrega na e saserdotenan prinsipal i eskribanan; i nan lo konden'E na morto, i lo entregu'E na e paganonan.

³⁴I nan lo hasi bofon di djé i skupi riba djé i sut'E i mat'E, i tres dia despues E lo lanta."

³⁵I Santiago i Juan, e dos yu hombernan di Zebedeo, a bin serka djé, i a bis'E: "Maestro, nos kier pa Bo hasi pa nos kiko ku nos pidiBo."

³⁶I El a bisa nan: "Kiko boso kier pa Mi hasi pa boso?"

³⁷I nan a bis'E: "Den Bo gloria, laga ku nos por sinta, un na Bo man drechi i un na Bo man robes."

³⁸Ma Jesus a bisa nan: "Boso no sa kiko boso ta pidi. Boso por bebe e kopa ku Ami ta bebe, of wordu batisa ku e boutismo ku kual Ami ta wordu batisa?"

³⁹I nan a bis'E: "Nos por." I Jesus a bisa nan: "E kopa ku Ami ta bebe, boso lo bebe; i boso lo wordu batisa ku e boutismo ku kual Ami ta wordu batisa.

⁴⁰Ma pa sinta na Mi man drechi of na Mi man robes, esaki no ta keda na Mi pa duna, ma ta pa esnan pa kendenan esei a wordu prepara."

⁴¹I ora ku e diesnan a tende esaki, nan a kuminsa tuma Santiago i Juan masha na malu.

⁴²I yamando nan serka djé, Jesus a bisa nan: "Boso sa ku esnan ku ta rekonosi komo gobernantenan di e paganonan tin dominio riba nan; i nan shonnan ta eherse outoridat riba nan.

⁴³Ma entre boso no t'asina, ma ken ku kier bira grandi entre boso lo ta boso sirbido;

⁴⁴i ken ku kier ta esun di prome entre boso lo ta esklabu di tur.

⁴⁵Pasobra ni e Yu di Hende no a bin pa wordu sirbi, ma pa sirbi, i pa duna Su bida komo preis di reskate pa hopi."

⁴⁶I nan a yega Jeriko. I ora Jesus, huntu ku Su disipelnan i un multitut grandi, tabata sali for di Jeriko, tabatin un pidido di limosna siegu ku yama Bartimeo, yu di Timeo, sinta kantu di kaminda.

⁴⁷I ora ku el a tende ku tabata Jesus di Nazaret, el a kuminsa grita i bisa: "Jesus, Yu di David, tene miserikordia di mi!"

⁴⁸I hopi hende tabata rous e mand'e keda ketu; ma el a grita mas duru ainda: "Yu di David, tene miserikordia di mi!"

⁴⁹I Jesus a keda para i a bisa: "Yam'e bin akinan." I nan a yama e homber siegu i a bis'e: "Tene kurashi, lanta! E ta yamabo."

⁵⁰I el a benta su mantel un banda, a bul'ariba, i a bin serka Jesus.

⁵¹I Jesus a kontest'e i a bisa: "Kiko bo kier pa Mi hasi pa bo?" I e homber siegu a bis'E: "Rabuni, mi kier rekobra mi bista!"

⁵²I Jesus a bis'e: "Bai; bo fe a salbabo." I mesora el a rekobra su bista i a sigui Jesus riba kaminda.