Read Papantla Totonac Markos 11 Bible Online

Markos 11 - Papantla Totonac bible

Markos 11

¹I ora nan tabata yega serka di Jerusalem, na Betfage i Betania, pega ku Seru di Oleifi, El a manda dos di Su disipelnan,

²i a bisa nan: "Bai den e pueblito ku ta keda enfrente di boso, i asina boso drenta den dje boso lo hana un yu di buriku mara, ku nunka ni un hende no a sinta riba dje ainda; los e, tres'e akinan.

³I si un hende puntra boso: 'Pakiko boso ta hasi esaki?' bisa: 'Senor tin mester di dje,' i mesora E lo mand'e bek."

⁴I nan a bai i a hana un yu di buriku pafo riba kaya, mara na un porta; i nan a los e.

⁵I algun hende ku tabata para einan tabata puntra nan: "Ta kiko boso ta hasi; pakiko boso ta los e yu di buriku?"

⁶I nan a kontesta nan manera Jesus a bisa nan, i nan a duna e disipelnan permit pa bai kune.

⁷I nan a trese e yu di buriku pa Jesus i a pone nan pananan riba dje, i Jesus a sinta riba dje.

⁸I hopi hende a habri nan mantelnan riba kaminda, i otronan a pone rama berde ku nan a korta den kunuku.

⁹I esnan ku tabata bai dilanti, i esnan ku tabata sigui, tabata grita: "Hosana!" "Bendishona ta Esun ku ta bin den e nomber di SENOR!"

¹⁰"Bendishona ta e reino benidero di nos tata David!" "Hosana den e halturanan!"

¹¹I El a drenta Jerusalem i a bai den tempel. I despues di a wak tur ront, i komo ku tabata lat kaba, El a sali bai Betania huntu ku e diesdosnan.

¹²I su manise, ora nan a sali bai for di Betania, El a hana hamber.

¹³I mirando djaleu un palu di figo ku blachi, El a bai wak si kisas E por a hana algu na dje; i ora ku El a yega serka, E no a hana nada sino blachi so, pasobra no tabata tempu di figo.

¹⁴I El a kontesta i a bisa e palu: "Ku nunka mas ni un hende no kome fruta di bo!" I Su disipelnan a tende esaki.

¹⁵I nan a yega Jerusalem. I El a bai den tempel i a kuminsa kore ku esnan ku tabata kumpra i bende den tempel, saka nan afo, i a bolter e mesanan di e kambiadonan di plaka i e stulnan di esnan ku tabata bende palomba;

¹⁶i E no a permit! ningun hende karga merkansia pasa dor di tempel kune.

¹⁷I El a kuminsa sina i bisa nan: "No ta para skirbi: 'Mi kas lo wordu yama un kas di orashon pa tur nashon'? Ma boso a hasie un kueba di ladron."

¹⁸I e saserdotenan prinsipal i e eskribanan a tende esaki, i a kuminsa buska kon nan por destruié; pasobra nan tabatin miedu di djé, komo ku henter e multitut a keda asombra di Su sinansa.

¹⁹I ora nochi a sera, nan a sali bai for di e stat.

²⁰I mainta, ora nan tabata pasa, nan a mira ku e palu di figo a seka for di rais.

²¹E ora ei Pedro a korda i a bis'E: "Rabi, at'e palu di figo ku Bo a maldishona a seka."

²²I Jesus a kontesta nan: "Tene fe den Dios.

²³Di berdat Mi ta bisa boso, ken ku bisa e seru aki: 'Sea kita for di einan i tira den laman,' i no duda den su kurason, ma kere ku loke e ta bisa ta bai sosode, esei lo wordu has! p'e.

²⁴Pesei Mi ta bisa boso, tur loke boso pidi ora boso ta hasi orashon, kere ku boso ta risibie, i e lo bira di boso.

²⁵I ki ora ku boso ta para hasi orashon, pordona si boso tin algu kontra un hende, pa boso Tata ku ta den shelu tambe pordona boso boso transgreshonnan.

²⁶[Ma si boso no pordona, boso Tata ku ta den shelu tampoko lo no pordona boso transgreshonnan."]

²⁷I nan a bolbe bin Jerusalem. I ora ku E tabata kana den tempel, e saserdotenan prinsipal, e eskribanan i e ansianonan a bin serka djé,

²⁸i a puntr'E: "Ku ki outoridat Bo ta hasi e kosnan aki, of ta ken a dunaBo e outoridat pa hasi e kosnan aki?"

²⁹I Jesus a kontesta nan: "Lo Mi hasi boso un pregunta, i boso kontestaMi, i e ora ei lo Mi bisa boso ku ki outoridat Mi ta hasi e kosnan aki.

³⁰E boutismo di Juan tabata for di shelu of for di hende? KontestaMi."

³¹I nan a kuminsa delibera nan ku nan, bisando: "Si nos bisa: 'For di shelu,' E lo bisa: 'Pakiko boso no a ker'e anto?'

³²Ma si nos bisa: 'For di hende'"--nan tabatin miedu di e multitut, pasobra di berdat tur tabatin Juan pa profeta.

³³Pesei nan a kontesta Jesus i a bisa: "Nos no sa." I Jesus a bisa nan: "Ami tampoko lo no bisa boso ku ki outoridat Mi ta hasi e kosnan aki."