Read Papantla Totonac Markos 12 Bible Online

Markos 12 - Papantla Totonac bible

Markos 12

¹I El a kuminsa papia ku nan den parabola: "Un homber a planta un kunuku di wendruif i a lanta un muraya ront di dje. El a koba un baki-di-pers-wendruif i a traha un toren, a hur e ku algun kunukero, i a bai hasi un biahe.

²I na tempu di kosecha el a manda un esklabu serka e kunukeronan pa risibi un parti di e frutanan di e kunuku di wendruif for di e kunukeronan.

³I nan a koh'e, batie, i a mand'e bai man bashi.

⁴I el a bolbe manda un otro esklabu serka nan, i nan a herida esaki na su kabes, i a trat'e na un manera bergonsoso.

⁵I el a bolbe manda un otro, i esei nan a mata; i asina nan a hasi ku hopi otro mas; algun nan a bati i otronan nan a mata.

⁶"Ainda e tabatin un mas, un yu stima; por ultimo el a manda esaki serka nan, bisando: 'Nan lo respeta mi yu.'

⁷"Ma e kunukeronan ei a bisa otro: 'Esaki ta e eredero; ban laga nos mat'e, i e erensia lo keda pa nos!'

⁸I nan a koh'e, mat'e, i a tir'e pafo di e kunuku di wendruif.

⁹"Kiko dono di e kunuku di wendruif lo hasi? E lo bin i destrui e kunukeronan, i lo duna e kunuku di wendruif na otronan.

¹⁰Boso no a lesa e Skritura aki nunka: 'E piedra ku e trahadonan a rechasa, esaki a bira e piedra-di-skina prinsipal;

¹¹esaki a bin di Senor, i e ta maraviyoso den nos bista'?"

¹²I nan tabata buska pa gar'E, ma nan tabatin miedu di e multitut; pasobra nan a komprende ku El a papia e parabola kontra nan. Asina nan a lagu'E i a bai.

¹³I nan a manda algun di e fariseonan i e herodianonan serka djé, pa koh'E den trampa ku Su mes palabranan.

¹⁴I nan a bin i a bis'E: "Maestro, nos sa ku Bo ta berdadero i no ta laga ni un hende influensiaBo, pasobra Bo no ta hasi distinshon di persona, ma ta sina e kaminda di Dios den berdat. Lei ta permit! pa paga belasting na Cesar, si of no?

¹⁵Nos lo paga of nos lo no paga?" Ma E, konosiendo nan hipokresia, a bisa nan: "Pakiko boso ta pone trampa pa Mi? Trese un denario pa Mi mira."

¹⁶I nan a trese un. I El a puntra nan: "Ta ken su imagen i inskripshon esaki ta?" I nan a bis'E: "Di Cesar."

¹⁷I Jesus a bisa nan: "Duna Cesar loke ta di Cesar, i Dios loke ta di Dios." I nan a keda masha strana di djé.

¹⁸I algun saduseo ku ta bisa ku no tin resurekshon a bin serka djé, i a kuminsa hasié pregunta, bisando:

¹⁹"Maestro, Moises a skirbi pa nos ku si un homber su ruman muri i laga un esposa atras, ma ni un yu, su ruman homber mester tuma e esposa i lanta desendiente pa su ruman.

²⁰Tabatin shete ruman homber. E di prome a tuma un esposa, i a muri sin laga ni un desendiente.

²¹I e di dos a tum'e, i a muri sin laga ni un desendiente; i e di tres meskos;

²²i asina ni un di e shetenan no a laga desendiente. Despues di nan tur e muhe tambe a muri.

²³Den e resurekshon, ora nan lanta, esposa di kual di nan lo e ta? Pasobra tur shete tabatin e komo esposa."

²⁴I Jesus a kontesta nan: "No t'esaki ta e motibu ku boso ta kiboka, ku boso no ta komprende e Skrituranan ni e poder di Dios?

²⁵Pasobra ora nan lanta for di e mortonan, nan no ta kasa ni ta wordu duna pa kasa, ma nan ta manera angel den shelu.

²⁶Ma enkuanto e echo ku e mortonan ta lanta, boso no a lesa den e buki di Moises, den e Skritura tokante di e mata, kon Dios a papia kune, bisando: 'Ami ta e Dios di Abraham, i e Dios di Isaak, i e Dios di Jakob'?

²⁷E no ta e Dios di e mortonan, sino di e bibunan; boso ta masha kiboka."

²⁸I un di e eskribanan ku a bin i a tende nan ta diskuti, i ku a rekonose ku El a kontesta nan bon, a puntr'E: "Di tur e mandamentunan, kual ta esun di prome?"

²⁹Jesus a kontesta: "Esun di prome ta: 'Tende, O Israel, SENOR nos Dios ta un SENOR.

³⁰Stima SENOR bo Dios ku henter bo kurason, i ku henter bo alma, i ku henter bo mente, i ku tur bo forsa.'

³¹E di dos ta esaki: 'Stima bo prohimo manera bo mes.' No tin ningun otro mandamentu mas grandi ku esakinan."

³²I e eskriba a bis'E: "Korekto, Maestro, Bo a papia berdat, pasobra ta un Dios tin; i fuera di djé no tin ni un otro.

³³I pa stim'E ku henter bo kurason i ku tur bo komprendementu i ku tur bo forsa, i pa stima bo prohimo manera bo mes, ta bal mas ku tur ofrenda kima i sakrifisio."

³⁴I ora Jesus a mira ku el a kontesta ku inteligensia, El a bis'e: "Bo no ta leu for di e reino di Dios." I despues di esei ni un hende no a tribi hasié mas pregunta.

³⁵I mientras ku Jesus tabata sina e hendenan den tempel El a kontesta i a bisa: "Di kon e eskribanan ta bisa ku e Cristo ta yu di David?

³⁶Pasobra David mes a bisa pa medio di Spiritu Santu: 'SENOR a bisa mi Senor: "Sinta na Mi man drechi, te ora Mi pone Bo enemigunan bou di Bo pianan."'

³⁷David mes ta yam'E 'Senor'; i kon anto E por ta su yu?" I e multitut grandi tabata gusta skuch'E.

³⁸I El a bisa nan den Su sinansa: "Warda boso di e eskribanan ku ta gusta kana ront ku pana largu bisti, i ku ta gusta saludonan di respet riba plasa,

³⁹i e miho asientonan den snoa i e luganan di onor na bankete,

⁴⁰ku ta devora kas di biuda i ta hasi orashonnan largu pa bista di hende. Esakinan lo risibi kondenashon mas pisa."

⁴¹I El a bai sinta enfrente di e kaha di ofrenda, i tabata opserva kon e multitut tabata tira plaka den e kaha di ofrenda. I hopi hende riku tabata tira sumanan grandi aden.

⁴²I un biuda pober a bin i a tira dos sen di koper aden, kualnan ta suma un plaka.

⁴³I Jesus a yama Su disipelnan serka djé i a bisa nan: "Di berdat Mi ta bisa boso, e biuda pober aki a tira mas den e kaha di ofrenda ku tur e otronan ku a tira algu aden;

⁴⁴pasobra nan tur a tira aden for di nan abundansia, ma el a tira aden, for di su pobresa, tur loke ku e tabatin, tur loke ku e tabatin pa biba di dje."