Read Papantla Totonac Markos 13 Bible Online

Markos 13 - Papantla Totonac bible

Markos 13

¹I ora ku E tabata sali for di tempel, un di Su disipelnan a bis'E: "Maestro, mira ki piedranan i ki edifisionan grandi!"

²I Jesus a kontest'e: "Bo ta mira e edifisionan grandi aki? Ni un piedra lo no keda riba otro ku lo no wordu basha abou."

³I ora ku E tabata sinta riba Seru di Oleifi enfrente di e tempel, Pedro, Santiago, Juan i Andres tabata puntr'E ora nan tabata nan so kuné:

⁴"Bisa nos, ki tempu e kosnan aki lo sosode, i kiko lo ta e senal ora tur e kosnan aki lo wordu kumpli?"

⁵I Jesus a kuminsa bisa nan: "Mira pa ni un hende no gana boso.

⁶Hopi lo bin den Mi nomber, bisando: 'Ta ami t'E!' i lo gana hopi hende.

⁷I ora boso tende di gueranan i rumornan di gueranan, no spanta; e kosnan ei mester tuma luga, ma ainda no ta e fin.

⁸Pasobra nashon lo lanta kontra nashon, i reino kontra reino; lo tin temblor na varios luga i lo tin hamber. E kosnan aki ta e prinsipio di dolonan di parto.

⁹"Ma mira pa boso mes, pasobra nan lo entrega boso na Konsilio, i den snoanan boso lo wordu suta, i boso lo para dilanti di gobernantenan i reinan pa Mi motibu, komo un testimonio pa nan.

¹⁰I e evangelio mester wordu predika prome na tur nashon.

¹¹I ora nan aresta boso i entrega boso, boso no preokupa di antemano kiko boso lo bisa, ma bisa loke wordu duna na boso na e ora ei, pasobra no ta boso ta papia, sino Spiritu Santu.

¹²"I ruman lo entrega ruman na morto, i un tata su yu; i yunan lo lanta kontra nan mayornan i lo hasi ku nan lo wordu mata.

¹³I tur hende lo odia boso pa kousa di Mi nomber, ma esun ku persevera te na fin, esei lo ta salba.

¹⁴"Ma ora boso mira e ABOMINASHON DI DESOLASHON, ku profeta Daniel a papia di dje, para kaminda e no mester ta (laga esun ku ta lesa komprende), e ora ei laga esnan ku ta na Judea hui bai na e serunan.

¹⁵I no laga esun ku ta riba dak baha bai den su kas, ni drenta paden pa kohe nada den su kas;

¹⁶i no laga esun ku ta den kunuku bai bek pa kohe su mantel.

¹⁷Ma ai di esnan ku ta na estado i esnan ku ta kria yu na pechu den e dianan ei!

¹⁸Ma hasi orashon pa boso huida no sosode den wenter.

¹⁹Pasobra den e dianan ei lo tin un tempu di tribulashon manera nunka tabatin for di prinsipio di e kreashon ku Dios a krea, te awor aki, i ku lo no tin nunka mas tampoko.

²⁰I si Senor no a hasi e dianan ei mas kortiku, ningun bida lo no a wordu salba; ma pa kousa di e eliginan ku El a skohe, El a hasi e dianan ei mas kortiku.

²¹Anto si un hende bisa boso: 'Mira, at'e Cristo aki', of: 'At'E aya', no ker'e;

²²pasobra Cristonan falsu i profetanan falsu lo lanta, i lo hasi senalnan i maraviyanan pa gana, si ta posibel, asta e skohinan.

²³Ma tene kuidou; mira, Mi a bisa boso tur kos di antemano.

²⁴"Ma den e dianan ei, despues di e tribulashon ei, 'solo lo bira skur i luna lo no duna su klaridat.

²⁵I e streanan lo kai for di shelu, i e podernan ku ta den e shelunan lo wordu sakudi.'

²⁶"I e ora ei nan lo mira e Yu di Hende ta bin den nubianan ku gran poder i gloria.

²⁷I e ora ei E lo manda e angelnan, i lo reuni Su skohinan for di e kuater bientunan, for di ekstremo di tera te na ekstremo di shelu.

²⁸"Awor sina e parabola di e palu di figo: ora su rama a bira moli kaba, i e saka su blachinan, boso sa ku zomer ta serka.

²⁹Asina boso tambe, ora boso mira e kosnan aki ta sosode, sabi ku E ta serka, dilanti di porta.

³⁰Di berdat Mi ta bisa boso, e generashon aki lo no pasa te ora tur e kosnan aki tuma luga.

³¹Shelu i tera lo pasa, ma Mi palabranan lo no pasa.

³²"Ma di e dia i e ora ei ni un hende no sa, ni e angelnan den shelu tampoko, ni e Yu, sino e Tata so.

³³Tene kuidou, keda alerta, pasobra boso no sa ki ora e tempu ta yega.

³⁴Ta manera un hende ku a bai hasi un biahe, kende a laga su kas i a pon'e na enkargo di su esklabunan, a duna kada un su tarea i tambe a ordena e wardado di porta pa keda alerta.

³⁵"Pesei, keda alerta, pasobra boso no sa ki ora e senor di e kas ta bin, sea anochi, mei anochi, ora gai ta kanta, of mainta,

³⁶pa e no bin direpiente i hana boso na sono.

³⁷I loke Mi ta bisa boso, Mi ta bisa tur: 'Keda alerta!'"