Read Papantla Totonac Markos 14 Bible Online

Markos 14 - Papantla Totonac bible

Markos 14

¹I tabata falta dos dia pa e Fiesta di Pasku i di Pan Sin Zurdeg; i e saserdotenan prinsipal i e eskribanan tabata buska kon pa na skondi nan gar'E i mat'E.

²Pasobra nan tabata bisa: "No durante di e Fiesta, pa no lanta desordu den e pueblo."

³I mientras ku E tabata na Betania, na kas di Simon e leproso, sinta na mesa, a bin un muhe ku un butishi di alabaster ku perfume di nardo puru di gran balor aden, i el a kibra e butishi i a bash'e riba Su kabes.

⁴Ma algun, ku indignashon, tabata bisa otro: "Pakiko e perfume aki a wordu drispidi?

⁵Pasobra e perfume aki por a wordu bendi pa mas ku tres shen denario, i e plaka duna na hende pober." I nan a lanta kune.

⁶Ma Jesus a bisa: "Lagu'e; pakiko boso ta molesti'e? El a hasi un bon obra na Mi.

⁷Pasobra e pobernan boso tin semper serka boso, i ki ora ku boso kier boso por hasi bon na nan; ma Ami boso no tin semper.

⁸El a hasi loke e tabata por. Di antemano el a ungi Mi kurpa pa deramentu.

⁹I di berdat Mi ta bisa boso, unda ku e evangelio wordu predika den henter mundu, loke ku e muhe aki a hasi tambe lo wordu konta na su rekuerdo."

¹⁰I Judas Iskariot, kende tabata un di e diesdosnan, a bai serka e saserdotenan prinsipal, pa entregu'E na nan.

¹¹I nan a keda kontentu ora nan a tende esaki i a priminti pa dun'e plaka. I e tabata buska un bon oportunidat pa entregu'E.

¹²I riba e prome dia di e Fiesta di Pan Sin Zurdeg, ora ku e lamchi di Pasku tabata wordu sakrifika, Su disipelnan a puntr'E: "Unda Bo kier pa nos bai i prepara pa Bo pa kome e Pasku?"

¹³I El a manda dos di Su disipelnan i a bisa nan: "Bai den stat i un homber ku ta karga un purun di awa lo kontra ku boso; siguie;

¹⁴i kaminda ku e drenta, bisa dono di e kas: 'E Maestro ta bisa: "Unda Mi sala kaminda Mi por kome e Pasku huntu ku Mi disipelnan ta?"'

¹⁵I e mes lo mustra boso un sala grandi ariba, muebla i tur kla; prepara pa nos ayanan."

¹⁶I e disipelnan a sali bai i a yega na e stat, i a hana tur kos presis manera El a bisa nan. I nan a prepara e Pasku.

¹⁷I ora ku a bira nochi El a bin ku e diesdosnan.

¹⁸I ora nan tabata sinta na mesa i tabata kome, Jesus a bisa: "Di berdat Mi ta bisa boso ku un di boso ku ta kome huntu ku Mi lo traishonaMi."

¹⁹Nan a kuminsa bira tristu i un pa un nan tabata puntr'E: "No ta ami tog?"

²⁰Ma El a kontesta nan: "Ta un di e diesdosnan, un ku ta dop den e komchi huntu ku Mi.

²¹Pasobra e Yu di Hende mester bai, manera ta para skirbi di djé, ma ai di e homber ei dor di kende e Yu di Hende ta wordu traishona! Lo tabata bon pa e homber ei si e no a nase nunka."

²²I mientras ku nan tabata kome, El a kohe pan, i despues di a bendishon'e, El a kibr'e i a duna nan, i a bisa: "Tuma; esaki ta Mi kurpa."

²³I El a kohe un kopa, i despues di a duna gradisimentu, El a duna nan esei; i nan tur a bebe for di dje.

²⁴I El a bisa nan: "Esaki ta Mi sanger di e aliansa, ku ta wordu drama pa hopi.

²⁵Di berdat Mi ta bisa boso, lo Mi no bebe mas di e fruta di e mata di wendruif, te na e dia ei ku Mi beb'e nobo den e reino di Dios."

²⁶I despues di a kanta un himno, nan a sali bai Seru di Oleifi.

²⁷I Jesus a bisa nan: "Boso tur lo trompeka, pasobra ta para skirbi: 'Lo Mi dal e Wardado mata i e karnenan lo wordu plama.'

²⁸Ma despues ku Mi a wordu lanta, lo Mi bai Galilea boso dilanti."

²⁹I Pedro a bis'E: "Maske tur trompeka, ami si no."

³⁰I Jesus a bis'e: "Di berdat Mi ta bisabo, ku awe nochi mes, prome ku un gai kanta dos biaha, abo lo nengaMi tres biaha."

³¹Ma Pedro a keda insist!, bisando: "Asta si mi mester muri huntu ku Bo, lo mi no nengaBo!" I nan tur tabata bisa meskos.

³²I nan a yega na un luga ku yama Getsemane; i El a bisa Su disipelnan: "Sinta akinan te ora Mi kaba di hasi orashon."

³³I El a hiba Pedro i Santiago i Juan huntu kuné, i a kuminsa bira masha angustia i intrankil.

³⁴I El a bisa nan: "Mi alma ta masha tristu mes, te na morto; keda akinan i vigila."

³⁵I El a bai un poko mas leu for di nan, i a tira Su kurpa abou na suela, i a hasi orashon, ku si esei tabata posibel, ku e ora ei por a pas'E forbei.

³⁶I El a bisa: "Abba! Tata! Tur kos ta posibel pa Bo; kita e kopa aki for di Mi; sinembargo, no loke Ami kier, ma loke Abo kier."

³⁷I El a bin i a hana nan ta drumi, i a bisa Pedro: "Simon, bo ta na sono? Bo no por a keda vigila ni un ora?

³⁸Keda vigila i hasi orashon, pa boso no kai den tentashon; e spiritu ta boluntario, ma e karni ta debil."

³⁹I El a bai atrobe i a hasi orashon, bisando e mesun palabranan.

⁴⁰I El a bolbe bin i a hana nan ta drumi, pasobra nan wowo tabata masha pisa. I nan no tabata sa kiko pa kontest'E.

⁴¹I El a bolbe bin pa di tres biaha, i a bisa nan: "Ainda boso ta drumi i ta sosega? Ta basta; e ora a yega; mira, e Yu di Hende ta wordu entrega den man di pekado.

⁴²Lanta, laga nos ban; ata, esun ku ta traishonaMi ta serka!"

⁴³I mesora, mientras ku E tabata papia ainda, Judas, un di e diesdosnan, a bin, i huntu kune un multitut ku spada i klop, manda dor di e saserdotenan prinsipal i e eskribanan i e ansianonan.

⁴⁴Awor esun ku tabata traishon'E a duna nan un senal, bisando: "Esun ku mi duna un sunchi, esei t'E; gar'E bai kuné bon sigura."

⁴⁵I asina ku el a yega, el a bai serka djé mesora, i a bisa: "Rabi!" i a dun'E un sunchi.

⁴⁶I nan a tira man riba djé i a gar'E.

⁴⁷I un di esnan ku tabata para einan a saka su spada, i a dal e esklabu di e sumosaserdote, i a kap su orea kit'afo.

⁴⁸I Jesus a kontesta i a bisa nan: "Boso a bin ku spada i klop pa arestaMi, komo si fuera ta ladron Mi ta?

⁴⁹Tur dia Mi tabata serka boso den tempel ta sina e hendenan, i boso no a garaMi; ma esaki a sosode pa e Skrituranan por keda kumpli."

⁵⁰I nan tur a bandon'E i a hui bai.

⁵¹I un hoben ku tabatin solamente un klechi di lino lora ront di su kurpa pa tapa su sunu tabata siguié; i nan a gar'e.

⁵²Ma el a laga e klechi di lino atras, i sunu el a hui bai.

⁵³I nan a hiba Jesus pa e sumosaserdote; i tur e saserdotenan prinsipal i e ansianonan i e eskribanan a reuni.

⁵⁴I Pedro a siguié na un distansia te riba plenchi di e sumosaserdote; i e tabata sinta huntu ku e ofisialnan, i tabata keinta su kurpa na e kandela.

⁵⁵Awor e saserdotenan prinsipal i henter e Konsilio tabata purba hana testimonio kontra Jesus, pa nan por a laga mat'E; i nan no a hana ningun.

⁵⁶Pasobra hopi hende tabata duna testimonio falsu kontra djé, ma nan testimonio no tabata kuadra ku otro.

⁵⁷I algun hende a lanta para i a kuminsa duna testimonio falsu kontra djé, bisando:

⁵⁸"Nos a tend'E bisa: 'Lo Mi destrui e tempel aki ku ta traha ku man, i den tres dia lo Mi lanta un otro ku no ta traha ku man.'"

⁵⁹Ma ni den esaki nan testimonio no tabata kuadra ku otro.

⁶⁰I e sumosaserdote a lanta bin dilanti i a puntra Jesus, bisando: "Bo no ta kontesta nada? Ta kiko e hombernan aki ta testifika kontra Bo?"

⁶¹Ma El a keda ketu, i no a kontesta nada. Atrobe e sumosaserdote tabata hasié pregunta, i tabata bis'E: "Ta Abo ta e Cristo, e Yu di Esun Bendishona?"

⁶²I Jesus a bisa: "Ami ta; i boso lo mira e Yu di Hende sinta na man drechi di Poder, i biniendo ku e nubianan di shelu."

⁶³I e sumosaserdote a sker su pana i a bisa: "Pakiko nos tin mester di mas testigu?

⁶⁴Boso a tende e blasfemia; kon boso ta hana esei?" I nan tur a konden'E di ta merese morto.

⁶⁵I algun di nan a kuminsa skupi riba djé, i tapa Su kara, i dal E ku moketa, i bis'E: "Profetisa!" I e ofisialnan a boft'E den Su kara.

⁶⁶I mientras ku Pedro tabata abou riba plenchi, un di e sirbidonan muhe di e sumosaserdote a bin,

⁶⁷i ora ku el a mira Pedro ta keinta su kurpa, el a keda wak e, i a bisa: "Abo tambe tabata huntu ku Jesus di Nazaret."

⁶⁸Ma el a nenga esei, bisando: "Mi no sa, ni mi no ta komprende di kiko bo ta papia." I el a sali bai pafo den veranda, i un gai a kanta.

⁶⁹I e kria a mir'e, i a bolbe kuminsa bisa esnan ku tabata para einan: "Esaki ta un di nan!"

⁷⁰Ma el a bolbe nenga esei. I un ratu despues esnan ku tabata para einan atrobe tabata bisa Pedro: "Siguramente abo ta un di nan, pasobra bo tambe ta un galileo."

⁷¹Ma el a kuminsa maldishona i hura: "Mi no konose e homber aki ku boso ta papia di djé!"

⁷²I mesora un gai a kanta pa di dos biaha. I Pedro a korda kon Jesus a bis'e: "Prome ku e gai kanta dos biaha, lo bo nengaMi tres biaha." I el a kuminsa yora.