Read Papantla Totonac Markos 15 Bible Online

Markos 15 - Papantla Totonac bible

Markos 15

¹I mainta tempran e saserdotenan prinsipal ku e ansianonan i e eskribanan, i henter e Konsilio, mesora a reuni pa konsulta ku otro; i nan a mara Jesus, a bai kuné i a entregu'E na Pilato.

²I Pilato a puntr'E: "Ta Abo ta e Rei di e hudiunan?" I El a kontesta i a bis'e: "Ta manera bo ta bisa."

³I e saserdotenan prinsipal a kuminsa akus'E di hopi kos.

⁴I Pilato a bolbe puntr'E, bisando: "Bo no ta kontesta nada? Mira di kuantu kos nan ta akusaBo!"

⁵Ma Jesus no a kontesta nada mas, asina ku Pilato a keda masha asombra.

⁶Awor riba dia di e Fiesta e tabatin e kustumber di duna un prezo libertat pa nan, esun ku nan pidie.

⁷I e homber ku yama Barabas tabata sera huntu ku e revolushonarionan ku a mata hende durante di e revolushon.

⁸I e multitut a bin i a kuminsa pidie pa hasi manera e tabatin kustumber di hasi pa nan.

⁹I Pilato a kontesta nan, bisando: "Boso kier pa mi duna e Rei di e hudiunan libertat pa boso?"

¹⁰Pasobra e tabata sa ku e saserdotenan prinsipal a entregu'E pa motibu di envidia.

¹¹Ma e saserdotenan prinsipal a instiga e multitut pa pidie pa duna Barabas libertat pa nan na Su luga.

¹²I Pilato a kontesta i a bisa nan atrobe: "Kiko anto lo mi hasi ku Esun ku boso ta yama Rei di e hudiunan?"

¹³I nan a bolbe grita: "Krusifik'E!"

¹⁴Ma Pilato tabata bisa nan: "Pakiko? Ta ki malu El a hasi?" Ma nan a grita mas duru ainda: "Krusifik'E!"

¹⁵I Pilato, kende kier a komplase e multitut, a duna Barabas libertat pa nan, i despues di a laga suta Jesus, el a entregu'E pa wordu krusifika.

¹⁶I e soldanan a hib'E den palasio (esta, Pretorio), i nan a yama henter e batayon romano huntu.

¹⁷I nan a bistié un mantel purpura, i nan a flegt un korona di sumpina i a pone esaki riba Su kabes;

¹⁸i nan a kuminsa salud'E: "Saludo, Rei di e hudiunan!"

¹⁹I nan a sigui dal E riba Su kabes ku un richi, skupi riba djé, i nan tabata kai na rudia i buig Su dilanti.

²⁰I despues ku nan a hasi bofon di djé, nan a kita e mantel purpura for di Su kurpa i a bistié Su mes pananan. I nan a hib'E pafo pa krusifik'E.

²¹I nan a obliga un hende, ku tabata pasa, pa karga Su krus, un tal Simon di Sirene, kende tabata bin for di kunuku, tata di Alehandro i Rufus.

²²I nan a hib'E na e luga ku yama Golgota, ku tradusi ta nifika Luga di Kalpachi.

²³I nan a dun'E bina meskla ku mirra, ma E no a tum'e.

²⁴I nan a krusifik'E i a parti Su pananan entre nan dor di tira lot riba nan, pa disidi kiko kada un lo a hana.

²⁵I tabata nueb'or di mainta ora nan a krusifik'E.

²⁶I e inskripshon di e akusashon kontra djé tabata bisa: "E REI DI E HUDIUNAN."

²⁷I nan a krusifika dos ladron huntu kuné, un na Su man drechi i un na Su man robes.

²⁸[I e Skritura a keda kumpli ku ta bisa: "I El a wordu konta ku e transgresornan."f28*

²⁹I esnan ku tabata pasa tabata blasfem'E i sakudi kabes, bisando: "Ahan! Abo ku ta bai destrui e tempel i lant'e bek den tres dia,

³⁰salba Bo mes, i baha for di e krus ei!"

³¹Di e mesun manera e saserdotenan prinsipal tambe, huntu ku e eskribanan, tabata hasi bofon di djé i tabata bisa otro: "El a salba otronan; E no por salba Su mes.

³²Laga e Cristo aki, e Rei di Israel, baha for di e krus awor, pa nos por mira i kere!" I esnan ku a wordu krusifika huntu kuné tabata tira e mesun insulto na Su kara.

³³I ora ku a bira diesdos or, skuridat a baha riba henter e tera te tres or di atardi.

³⁴I pa tres or di atardi Jesus a sklama na bos haltu: "|iéloi, Eloi, lama sabaktani?" ku tradusi ta nifika: "Mi Dios, Mi Dios, pakiko Bo a bandonaMi?"

³⁵I ora ku algun hende ku tabata para einan a tende esei, nan a bisa: "Mira, ta Elias E ta yama."

³⁶I un hende a kore bin i a papa un spons ku binager, a hink'e na un richi i a dun'E di bebe, bisando: "Laga nos wak si Elias ta bin bah'E."

³⁷I Jesus a dal un gritu duru, i a hala Su ultimo rosea.

³⁸I e kortina di tempel a sker na dos, for di ariba te abou.

³⁹I ora ku e senturion ku tabata para net Su dilanti a mira kon El a hala Su ultimo rosea, el a bisa: "Di berdat e homber aki tabata e Yu di Dios!"

⁴⁰I tambe tabatin algun hende muhe ta para wak for di un distansia, entre nan Maria Magdalena, Maria, mama di Santiago Chiki i di Jose, i Salome.

⁴¹I tempu ku E tabata na Galilea, nan tabata siguié i sirbié; i tabatin hopi otro hende muhe ku a bin Jerusalem huntu kuné.

⁴²I ora ku a bira tardi kaba, pasobra tabata dia di preparashon, esta, bispu di Sabat,

⁴³Jose di Arimatea, un miembro prominente di Konsilio, kende tambe tabata spera e reino di Dios, a bin i el a tuma kurashi i a drenta bai serka Pilato, i a pidi e kurpa di Jesus.

⁴⁴I Pilato a hana strano ku ya El a muri kaba, i a manda yama e senturion i a puntr'e si El a muri kaba.

⁴⁵I ora ku el a hana sa esaki for di e senturion, el a entrega e kurpa na Jose.

⁴⁶I Jose a kumpra tela di lino, a bah'E for di krus, a lor'E den e tela di lino i a pon'E den un tumba ku a wordu koba den baranka; i el a lora un piedra pone na entrada di e tumba.

⁴⁷I Maria Magdalena i Maria, mama di Jose, tabata wak pa mira na unda El a wordu pom.