Read Papantla Totonac Markos 2 Bible Online

Markos 2 - Papantla Totonac bible

Markos 2

¹I ora ku El a bolbe Kapernaum algun dia despues, nan a tende ku E tabata na kas.

²I hopi hende a bin huntu, asina ku no tabatin luga mas, ni sikiera banda di e porta; i E tabata papia e palabra ku nan.

³I nan a bin, i a trese serka djé un paralitiko ku kuater homber tabata karga.

⁴I komo ku tabata imposibel pa yega serka djé pa motibu di e multitut, nan a kita e dak kaminda E tabata; i ora nan a kibra habri un buraku, nan a baha e kama ku e paralitiko tabata drumi ariba.

⁵I Jesus, mirando nan fe, a bisa e paralitiko: "Mi yu, bo pikanan ta pordona."

⁶Awor tabatin algun di e eskribanan sinta einan, i nan tabata rasona den nan kurason:

⁷"Pakiko e homber aki ta papia asina ei? E ta blasfema; ken por pordona pika, si no ta Dios so?"

⁸I mesora Jesus, sabiendo den Su spiritu ku asina nan tabata rasona den nan mes, a bisa nan: "Pakiko boso ta rasona den boso kurason tokante di e kosnan aki?

⁹Kiko ta mas fasil pa bisa e paralitiko: 'Bo pikanan ta pordona'; of pa bisa: 'Lanta i kohe bo kama i kana'?

¹⁰Ma pa boso por sa ku e Yu di Hende tin outoridat riba tera pa pordona pika,"--El a bisa e paralitiko:

¹¹"Mi ta bisabo, lanta, kohe bo kama i bai bo kas."

¹²I mesora el a lanta i a kohe su kama, i den bista di tur hende el a sali bai, asina ku nan tur a keda strana i tabata glorifika Dios, bisando: "Nunka nos no a mira algu manera esaki."

¹³I atrobe El a sali bai kantu di laman, i henter e multitut a bin serka djé i El a kuminsa sina nan.

¹⁴I ora ku E tabata pasa, El a mira Levi, yu homber di Alfeo, sinta den ofisina di belasting, i El a bis'e: "SiguiMi!" I el a lanta i a siguié.

¹⁵I a sosode ku E tabata sinta na mesa den e kas di Levi, i hopi publikano i pekado tabata kome huntu ku Jesus i Su disipelnan; pasobra nan tabata hopi i nan tabata siguié.

¹⁶I ora ku e eskribanan di e fariseonan a mira ku E tabata kome huntu ku e pekadonan i publikanonan, nan a bisa Su disipelnan: "Pakiko E ta kome i bebe huntu ku publikano i pekado?"

¹⁷I ora Jesus a tende esaki, El a bisa nan: "No ta esnan ku ta salu mester di dokter, sino esnan ku ta malu; Mi no a bin pa yama e hustunan, sino e pekadonan."

¹⁸I e disipelnan di Juan i e fariseonan tabata yuna; i nan a bin i a bis'E: "Pakiko e disipelnan di Juan i e disipelnan di e fariseonan si ta yuna, ma Bo disipelnan no ta yuna?"

¹⁹I Jesus a bisa nan: "Esnan ku ta atende e bruidehom ta yuna anto mientras ku e bruidehom ta huntu ku nan? Tanten ku nan tin e bruidehom huntu ku nan, nan no por yuna.

²⁰Ma e dianan lo bin ku e bruidehom lo wordu kita for di nan, i e ora ei nan lo yuna riba e dia ei.

²¹"Ningun hende no ta uza un lapi di pana ku no a kremp, pegu'e na un bisti bieu; sino e lapi ta trek kita for di dje, e nobo for di e bieu, i e sker ta bira pio.

²²I ningun hende no ta pone bina nobo den saku-di-kueru bieu; sino e bina ta hasi e sakunan rementa, i tantu e bina komo e sakunan ta bai perdi; ma bina nobo hende ta pone den saku-di-kueru nobo."

²³I a sosode ku E tabata pasando dor di e kunukunan di mainshi riba dia di Sabat, i segun ku nan tabata sigui nan kaminda, Su disipelnan a kuminsa kita e tapushinan.

²⁴I e fariseonan a bis'E: "Mira, pakiko nan ta hasi loke Lei no ta permiti pa hasi riba dia di Sabat?"

²⁵I El a bisa nan: "Nunka boso no a lesa kiko David a hasi ora ku e i esnan ku tabata huntu kune tabata den nesesidat i a hana hamber:

²⁶kon el a bai den e kas di Dios den e dianan di sumosaserdote Abiatar, i a kome e pan konsagra, loke Lei no ta permiti pa ningun hende kome sino solamente e saserdotenan, i a duna esaki tambe na esnan ku tabata huntu kune?"

²⁷I El a bisa nan: "Sabat ta poni pa hende, i no hende pa Sabat.

²⁸Asina ku e Yu di Hende ta Senor, asta di Sabat tambe."