Read Papantla Totonac Markos 3 Bible Online

Markos 3 - Papantla Totonac bible

Markos 3

¹I El a bolbe bai den snoa; i ayanan tabatin un homber ku un man seku.

²I nan tabata ten'E na bista pa mira si E lo a kur'e riba Sabat, pa nan por akus'E.

³I El a bisa e homber ku e man seku: "Lanta i bin para meimei aki!"

⁴I El a bisa nan: "Lei ta permit! pa riba dia di Sabat hasi bon of hasi malu, salba un bida of mata?" Ma nan a keda ketu.

⁵I despues di a wak nan tur ku kara rabia, tristu pa motibu di e duresa di nan kurason, El a bisa e homber: "Rek bo man." I el a rek su man, i esaki a bira bon atrobe.

⁶I e fariseonan a sali bai, i mesora nan a konsulta ku e herodianonan kontra djé, kon nan lo por destruié.

⁷I Jesus a retira ku Su disipelnan bai laman; i un multitut grandi for di Galilea a siguié; i tambe for di Judea,

⁸i for di Jerusalem, i for di Idumea, i di e otro banda di Jordan i e besindario di Tiro i Sidon, un multitut grandi a bin serka djé, ora nan a tende kuantu kos E tabata hasi.

⁹I El a bisa Su disipelnan ku mester tin un boto poni kla p'E pa motibu di e multitut, pa e hendenan no pusha pret'E;

¹⁰pasobra El a kura hopi hende, asina ku tur esnan ku tabatin aflikshon tabata pusha bin riba djé pa nan por a mishi kuné.

¹¹I ki ora ku e spiritunan impuru mir'E, nan tabata tira nan mes abou Su dilanti i tabata grita, bisando: "Abo ta e Yu di Dios!"

¹²I El a taha nan striktamente pa no bisa ken E ta.

¹³I El a subi bai riba seru i a yama esnan ku E mes tabata kier, i nan a bin serka djé.

¹⁴I El a nombra diesdos, pa nan por ta huntu kuné i pa E por manda nan bai predika,

¹⁵i pa tin outoridat pa saka demono.

¹⁶I El a nombra e diesdosnan: Simon, na kende El a duna e nomber Pedro,

¹⁷i Santiago, yu homber di Zebedeo, i Juan, ruman homber di Santiago, na kendenan El a duna e nomber Boanerges, ku ta nifika: "Yunan di Strena";

¹⁸i Andres, Felipe, Bartolome, Mateo, Tomas, Santiago, yu homber di Alfeo, Tadeo, i Simon e kananeo;

¹⁹i Judas Iskariot, kende a traishon'E tambe.

²⁰I El a bai den un kas, i atrobe e multitut a aglomera, di tal manera ku ni pida pan nan no por a kome.

²¹I ora Su mes hendenan a tende di esaki, nan a sali pa busk'E i koh'E bai kuné, pasobra nan tabata bisa: "Su kabes no ta bon!"

²²I e eskribanan ku a bin for di Jerusalem tabata bisa: "E ta posei pa Beelzebu," i "E ta saka demono pa medio di e prens di demononan."

²³I El a yama nan serka djé i a kuminsa papia ku nan den parabola: "Kon Satanas por saka Satanas afo?

²⁴I si un reino ta dividi kontra su mes, e reino ei no por keda para.

²⁵I si un kas ta dividi kontra su mes, e kas ei lo no por keda para.

²⁶I si Satanas lanta kontra su mes i ta dividi, e no por keda para, ma el a yega na su fin!

²⁷Ma ni un hende no por drenta kas di e homber fuerte i plunder su propiedat, si e no mara e homber fuerte prome, i e ora ei e lo plunder su kas.

²⁸Di berdat Mi ta bisa boso, tur pika lo wordu pordona na e yunan di hende, i kualke blasfemia ku nan papia;

²⁹ma ken ku blasfema kontra Spiritu Santu nunka lo no hana pordon, ma ta kulpabel di un pika eterno";

³⁰pasobra nan tabata bisa: "E tin un spiritu impuru."

³¹I Su mama i Su ruman hombernan a yega, i para pafo nan a manda yam'E.

³²I un multitut tabata sinta ront di djé, i nan a bis'E: "Ata Bo mama i Bo ruman hombernan ta pafo ta buskaBo."

³³I El a kontesta nan, bisando: "Ta ken ta Mi mama i Mi ruman hombernan?"

³⁴I El a wak ront, i a laga Su bista pasa riba esnan ku tabata sinta ront di djé, i a bisa: "Ata Mi mama i Mi ruman hombernan!

³⁵Pasobra ken ku hasi e boluntat di Dios, esei ta Mi ruman homber i ruman muhe i mama."