Read Papantla Totonac Markos 6 Bible Online

Markos 6 - Papantla Totonac bible

Markos 6

¹I El a sali for di einan, i El a yega na Su mes stat; i Su disipelnan tabata siguié.

²I ora a bira Sabat, El a kuminsa sina e hendenan den snoa; i hopi hende ku a tend'E a keda asombra. I nan a puntra: "For di unda e homber aki a saka e kosnan aki, i ta ki sabiduria esaki ta ku a wordu duna na djé, i ta ki milagernan esakinan ta ku Su mannan ta hasi?

³Esaki no ta e karpinte, yu homber di Maria, i ruman homber di Santiago, Jose, Judas i Simon? I Su ruman muhenan no ta aki serka nos?" I nan a sinti nan mes ofendi pa Su motibu.

⁴I Jesus a bisa nan: "Un profeta ta wordu onra tur parti, menos na su mes stat i meimei di su mes famia i den su mes kas."

⁵I E no por a hasi milager einan, solamente El a kura algun hende malu dor di pone man riba nan.

⁶I El a keda asombra di nan inkredulidat. I E tabata bai ront den e pueblonan, sinando e hendenan.

⁷I El a yama e diesdosnan serka djé i a kuminsa manda nan bai, dos-dos; i E tabata duna nan outoridat riba e spiritunan impuru;

⁸i El a ordena nan pa no hiba nada pa na kaminda sino solamente un garoti; nada di pan, ni saku, ni plaka den nan faha,

⁹ma pa nan bisti sandalia; i El a bisa tambe: "No bisti dos tunika riba otro."

¹⁰I El a bisa nan: "Unda ku boso drenta un kas, keda einan te ora ku boso sali for di e luga ei.

¹¹I si kualke luga no risibi boso ni tende na boso, ora boso sali bai for di einan, sakudi e stof kita for di boso plant'i pia komo un testimonio kontra nan."

¹²I nan a bai i a predika ku hende mester repenti.

¹³I nan a saka hopi demono i a hunta hopi hende malu ku zeta i a kura nan.

¹⁴I rei Herodes a tende di esaki, pasobra Su nomber a bira hopi konosi; i e hendenan tabata bisa: "Juan Boutista a lanta for di e mortonan, i ta pesei e podernan aki pa hasi milager ta obra den djé."

¹⁵Ma otronan tabata bisa: "E ta Elias." I otronan tabata bisa: "E ta un profeta, manera un di e profetanan di prome aya."

¹⁶Ma ora Herodes a tende di esaki, el a keda bisa: "Juan, kende mi a laga kap su kabes afo, a lanta for di e mortonan!"

¹⁷Pasobra Herodes mes a laga aresta Juan i a pon'e na kadena den prizon pa motibu di Herodias, esposa di su ruman Felipe, pasobra el a kasa kune.

¹⁸Pasobra Juan tabata bisa Herodes: "Lei no ta permit! pa bo tin e esposa di bo ruman."

¹⁹I Herodias tabatin renkor kontra dje i kier a laga mat'e, ma e no tabata por;

²⁰pasobra Herodes tabatin miedu di Juan, sabiendo ku e tabata un homber hustu i santu, i e tabata proteh'e. I ki ora ku e tende Juan, e tabata keda tur konfundi; ma e tabata gusta skuch'e.

²¹I a presenta un dia oportuno ora Herodes, riba dia di su ana, a tene un bankete pa su prensnan, su ofisialnan militar i e hombernan prinsipal di Galilea;

²²i ora ku e yu muhe di Herodias a drenta i a balia, el a agrada Herodes i esnan ku tabata huntu kune na mesa. I rei a bisa e mucha muhe: "Pidimi loke bo kier i lo mi dunabo."

²³I el a hura: "Kiko ku bo pidimi lo mi dunabo, asta mitar di mi reino."

²⁴I el a bai pafo i a puntra su mama: "Kiko lo mi pidi?" I su mama a kontesta: "Kabes di Juan Boutista."

²⁵I mesora el a kore bai paden serka rei i a pidie, bisando: "Mi kier pa awor aki mes bo dunami kabes di Juan Boutista riba un teblachi."

²⁶I maske a duel rei masha, tog pa motibu di su huramentu i pa motibu di esnan ku tabata huntu kune na mesa, e no kier a nengu'e.

²⁷I mesora rei a manda un burdugu i a dun'e ordu pa trese Juan su kabes. I esei a bai i a kap Juan su kabes afo den prizon,

²⁸i a trese su kabes riba un teblachi, i a duna e mucha muhe esaki; i e mucha muhe a dun'e na su mama.

²⁹I ora su disipelnan a tende esaki, nan a bin kohe su kurpa bai kune, i a pon'e den un tumba.

³⁰I e apostelnan a reuni huntu ku Jesus, i nan a kont'E tur loke nan a hasi i a sina e hendenan.

³¹I El a bisa nan: "Ban ku Mi, boso so, na un luga solitario i sosega un ratu." Pasobra tabatin hopi hende ta bai bin, i nan no tabatin ni tempu pa kome.

³²I nan a bai den boto na un luga solitario, nan so.

³³I e hendenan a mira nan ta bai, i hopi a rekonose nan, i nan a kore bai p'aya na pia for di tur e statnan, i a yega ayanan prome ku nan.

³⁴I ora Jesus a baha for di boto, El a mira un multitut grandi, i El a sinti kompashon pa nan, pasobra nan tabata manera karne sin wardado; i El a kuminsa sina nan hopi kos.

³⁵I ora tabata basta lat kaba, Su disipelnan a bin serka djé i a bis'E: "E luga ta desola i ta basta lat kaba;

³⁶manda nan bai na e luganan i pueblitonan den besindario, pa nan por kumpra algu di kome pa nan mes; pasobra nan no tin nada pa kome."

³⁷Ma El a kontesta i a bisa nan: "Boso duna nan algu di kome!" I nan a bis'E: "Nos mester bai kumpra dos shen denario di pan i duna nan di kome?"

³⁸I El a bisa nan: "Kuantu pan boso tin? Bai wak!" I ora nan a averigua, nan a bisa: "Sinku, i dos piska."

³⁹I El a manda nan tur bai sinta na grupo riba e yerba berde.

⁴⁰I nan a bai sinta den gruponan di shen i den gruponan di sinkuenta.

⁴¹I El a kohe e sinku pannan i e dos piskanan, i mirando ariba na shelu El a bendishona e kuminda i a kibra e pannan, i E tabata duna nan na e disipelnan pa pone dilanti di e hendenan; i El a parti e dos piskanan pa tur.

⁴²I nan tur a kome keda barika yen.

⁴³I nan a rekohe diesdos makutu yen di e pida-pidanan i tambe di piska.

⁴⁴I tur esnan ku a kome e pannan tabata sinku mil homber.

⁴⁵I mesora El a manda Su disipelnan bai den boto i bai Su dilanti na e otro banda, na Betsaida, mientras ku E mes tabata manda e multitut bai.

⁴⁶I despues di a despedi di nan, El a bai na e seru pa hasi orashon.

⁴⁷I ora nochi a sera, e boto tabata meimei di laman, i E so a keda na tera.

⁴⁸I ora ku El a mira ku nan tabata rema masha duru mes, pasobra bientu tabata kontrario, El a bin serka nan mas o menos na e di kuater warda di anochi, kanando riba laman; i E kier a pasa nan forbei.

⁴⁹Ma ora nan a mir'E ta kana riba laman, nan a kere ku tabata un spiritu, i nan a kuminsa grita;

⁵⁰pasobra nan tur a mir'E i a keda yen di sustu. Ma mesora El a papia ku nan i a bisa nan: "Tene kurashi; ta Ami, no tene miedu."

⁵¹I El a bai den boto serka nan, i bientu a stop di supla; i nan a keda masha asombra mes,

⁵²pasobra nan no a sina nada dor di e milager di e pannan, pa motibu ku nan kurason tabata duru.

⁵³I ora nan a krusa, nan a yega tera na Genesaret, i nan a ankra.

⁵⁴I ora nan a sali for di e boto, mesora e hendenan a rekonos'E,

⁵⁵i nan a bai ront den henter e region ei, i tur esnan ku tabata malu nan tabata karga riba kama hiba na e luga kaminda nan a tende ku E tabata.

⁵⁶I unda ku El a yega, sea na un pueblito, of un stat, of kampo, nan tabata pone esnan ku tabata malu riba e plasanan, i tabata rogu'E pa nan djis mishi ku zom di Su mantel; i tur ku a mishi ku esaki a wordu kura.