Read Papantla Totonac Markos 7 Bible Online

Markos 7 - Papantla Totonac bible

Markos 7

¹I e fariseonan i algun di e eskribanan, kendenan a bin for di Jerusalem, a bin para ront di djé

²i a mira ku algun di Su disipelnan tabata kome nan pan ku man impuru, esta, sin laba.

³(Pasobra e fariseonan i tur e hudiunan no ta kome sin ku nan laba nan man kuidadosamente prome, kumpliendo asina ku e tradishon di e ansianonan;

⁴i ora nan bin for di plasa nan no ta kome sin ku nan a laba nan mes prome; i tin hopi otro kos di tradishon ku nan a risibi pa nan kumpli kune, manera labamentu di kopa i kanika i wea di brons.)

⁵I e fariseonan i e eskribanan a puntr'E: "Pakiko Bo disipelnan no ta kana segun tradishon di e ansianonan, ma ta kome nan pan ku man impuru?"

⁶I El a bisa nan: "Ku rason Isaias a profetisa di boso, hipokritnan, manera ta para skirbi: 'E pueblo aki ta onraMi ku nan lepnan, ma nan kurason ta leu for di Mi.

⁷Ma en bano nan ta adoraMi, sinando komo doktrina e preseptonan di hende.'

⁸Neglishando e mandamentu di Dios, boso ta tene boso mes na e tradishon di hende."

⁹Tambe El a bisa nan: "Bunita asina boso ta pone e mandamentu di Dios un banda pa kumpli ku boso tradishon.

¹⁰Pasobra Moises a bisa: 'Onra bo tata i bo mama'; i 'Esun ku papia malu di tata of mama, laga mat'e';

¹¹ma boso ta bisa: 'Si un hende bisa su tata of su mama: Tur loke ku mi tin, ku mi por a yuda boso kune, ta Korban (es desir, duna na Dios),'

¹²anto boso no ta permitie mas pa hasi nada ni pa su tata ni pa su mama,

¹³hasiendo asina e palabra di Dios bira sin balor dor di boso tradishon ku boso a pasa ofer pa otronan; i hopi kosnan asina boso ta hasi."

¹⁴I ora ku El a yama e multitut serka djé atrobe, El a bisa nan: "Boso tur skuchaMi i komprende:

¹⁵no tin nada pafo di hende, ku ta bai den hende, ku por hasie impuru; ma e kosnan ku ta sali for di hende ta loke ta kontamina hende.

¹⁶[Si un hende tin orea pa tende, lagu'e tende."]

¹⁷I ora ku El a laga e multitut i a bai den e kas, Su disipelnan a hasié pregunta tokante di e parabola.

¹⁸I El a bisa nan: "Boso tambe ta asina sin komprendementu? Boso no ta komprende ku tur loke ta drenta di pafo den un hende no por kontamin'e;

¹⁹pasobra esei no ta bai den su kurason, ma den su barika i ta wordu elimina?" Asina El a deklara tur kuminda puru.

²⁰I El a bisa: "Loke ta sali for di hende, ta esei ta loke ta kontamina hende.

²¹Pasobra for di paden, for di kurason di hende, ta sali mal pensamentu, fornikashon, ladronisia, matamentu, adulterio,

²²echonan di kudishi i maldat, tambe engano, sensualidat, envidia, kalumnia, orguyo i bobedat.

²³Tur e maldatnan aki ta sali for di paden i ta kontamina hende."

²⁴I for di einan El a lanta bai na e region di Tiro i Sidon. I ora ku El a bai den un kas, E no tabata kier pa ni un hende sa esaki; ma E no por a keda skondi.

²⁵Pasobra un muhe, kende su yu muhe chikitu tabatin un spiritu impuru, ora ku el a tende di djé, mesora a bin i a tira su kurpa abou na Su pia.

²⁶Awor e muhe tabata un pagano, nasi na Sirofenisia. I e tabata keda pidié pa saka e demono for di su yu muhe.

²⁷I El a bis'e: "Laga e yunan kome nan barika yen prome, pasobra no ta pas pa kohe pan di e yunan tir'e pa e kachonan."

²⁸Ma el a kontesta i a bis'E: "Si, Senor, ma asta e kachonan bou di mesa ta kome e garnachinan di pan di e yunan."

²⁹I El a bis'e: "Pa motibu di e palabra aki, bai numa; e demono a sali for di bo yu muhe."

³⁰I ora ku el a bai su kas bek, el a hana su yu drumi riba kama; i e demono a sali for di dje.

³¹I El a sali atrobe for di e region di Tiro, i pasando dor di Sidon El a yega na Laman di Galilea, denter di e region di Dekapolis.

³²I nan a trese serka djé un hende ku tabata sordo i ku tabatin lenga pega; i nan a rogu'E pa E pone Su man riba dje.

³³I El a hal'e un banda, aparta for di e multitut, i a hinka Su dede den su orea, i El a skupi i a mishi ku su lenga,

³⁴i El a hisa Su kara wak na shelu, a hala un rosea profundo i a bis'e: "Efata!" esta: "Sea habri!"

³⁵I su oreanan a habri mesora, i e kuerde di su lenga a los, i el a kuminsa papia kla-kla.

³⁶I El a ordena nan pa no konta ningun hende; ma mas E ordena nan pa no konta, mas nan tabata proklama e notisia.

³⁷I nan a keda masha asombra mes, bisando: "El a hasi tur kos asina bon; E ta hasi sordo tende i mudo papia."