Read Papantla Totonac Markos 8 Bible Online

Markos 8 - Papantla Totonac bible

Markos 8

¹Den e dianan ei, ora ku un multitut grandi tabata huntu atrobe, i nan no tabatin nada di kome, Jesus a yama Su disipelnan i a bisa nan:

²"Mi tin kompashon di e multitut, pasobra ya ta tres dia kaba ku nan ta serka Mi, i nan no tin nada di kome;

³i si Mi manda nan bai kas ku hamber, nan lo desmaya na kaminda, i algun di nan a bin for di leu."

⁴I Su disipelnan a kontest'E: "Unda akinan den desierto hende lo por hana sufisiente pa sasia e hombernan aki ku pan?"

⁵I El a puntra nan: "Kuantu pan boso tin?" I nan a kontesta: "Shete."

⁶I El a manda e multitut sint'abou na suela; i El a kohe e shete pannan, a gradisi i a kibra nan, i a kuminsa duna esakinan na Su disipelnan pa nan sirbi nan, i nan a sirbi e multitut.

⁷I nan tabatin algun piska chikitu tambe; i despues ku El a bendishona nan, El a duna ordu pa sirbi esakinan tambe.

⁸I nan a kome keda barika yen; i nan a rekohe loke a resta di e pida-pidanan, shete makutu yen.

⁹I tabatin komo kuater mil homber einan, i El a manda nan bai.

¹⁰I mesora El a bai den boto ku Su disipelnan, i a yega na e distrikto di Dalmanuta.

¹¹I e fariseonan a bin i a kuminsa diskuti kuné, i tabata desea di djé un senal for di shelu, pa pon'E na prueba.

¹²I El a hala un rosea profundo den Su spiritu i a bisa: "Pakiko e generashon aki ta desea un senal? Di berdat Mi ta bisa boso, un senal lo no wordu duna na e generashon aki."

¹³I El a bai laga nan, a bolbe barka i a bai na e otro banda.

¹⁴I e disipelnan a lubida di hiba pan; i nan no tabatin nada mas sino un pan so ku nan den boto.

¹⁵I El a ordena nan, bisando: "Tene kuidou! Warda boso di e zurdeg di e fariseonan i di e zurdeg di Herodes."

¹⁶I nan a kuminsa diskuti nan ku nan, ku nan no tin pan.

¹⁷I Jesus, sabiendo esaki, a bisa nan: "Pakiko boso ta diskuti e echo ku boso no tin pan? Ainda boso no ta ripara ni komprende? T'asina duru boso kurason ta?

¹⁸Boso tin wowo, i boso no ta mira? I orea, i boso no ta tende? I boso no ta korda?

¹⁹Dia Mi a kibra e sinku pannan pa e sinku milnan, kuantu makutu grandi yen di pida-pida boso a rekohe?" Nan a kontest'E: "Diesdos."

²⁰"I dia Mi a kibra e shetenan pa e kuater milnan, kuantu makutu yen di pida-pida boso a rekohe?" I nan a kontest'E: "Shete."

²¹I El a bisa nan: "Ainda boso no ta komprende?"

²²I nan a yega Betsaida. I nan a trese un homber siegu serka djé, i a rogu'E pa E pone man riba dje.

²³I El a kohe e siegu na su man i a hib'e pafo di e pueblito; i despues di a skupi riba su wowonan i di a pone Su mannan riba dje, El a puntr'e: "Bo ta mira algu?"

²⁴I e homber a hisa kara wak i a bisa: "Mi ta mira hende, pasobra mi ta mira nan manera palu ta kana ront."

²⁵Djei El a bolbe pone Su mannan riba wowo di e homber; i el a mira bon i a keda restora, i tabata mira tur kos kla-kla.

²⁶I El a mand'e su kas, bisando: "No bai mes den e pueblito."

²⁷I Jesus ku Su disipelnan a bai na e pueblitonan di Cesarea Filipo; i na kaminda E tabata hasi Su disipelnan pregunta, bisando nan: "Ta ken e hendenan ta bisa ku Mi ta?"

²⁸I nan a kontest'E: "Juan Boutista; i tin ta bisa: Elias; ma otronan: un di e profetanan."

²⁹I El a sigui hasi nan pregunta: "Ma ta ken boso ta bisa ku Ami ta?" Pedro a kontesta i a bis'E: "Abo ta e Cristo."

³⁰I El a taha nan striktamente pa no konta ni un hende tokante di djé.

³¹I El a kuminsa sina nan ku e Yu di Hende mester sufri hopi kos i wordu rechasa pa e ansianonan, e saserdotenan prinsipal i e eskribanan, i wordu mata, i despues di tres dia, lanta for di morto.

³²I E tabata papia bon kla di e asunto aki. I Pedro a hal'E un banda i a kuminsa reprend'E.

³³Ma ora ku El a drai wak Su disipelnan, El a reprende Pedro, bisando: "Kita for di Mi dilanti, Satanas; pasobra bo no tin bo pensamentu riba e kosnan di Dios, ma riba esnan di hende."

³⁴I El a yama e multitut i Su disipelnan serka djé i a bisa nan: "Si un hende kier siguiMi, lagu'e nenga su mes, i hisa su krus, i siguiMi.

³⁵Pasobra ken ku kier salba su bida lo perd'e; ma ken ku perde su bida pa Mi kousa i pa kousa di evangelio, lo salb'e.

³⁶Pasobra ki probecho un hende tin si e gana henter mundu i perde su alma?

³⁷Pasobra kiko un hende lo duna en kambio di su alma?

³⁸Pasobra ken ku tin berguensa di Mi i di Mi palabranan den e generashon adultero i pekaminoso aki, e Yu di Hende tambe lo tin berguensa di dje ora ku E bin den e gloria di Su Tata huntu ku e angelnan santu."