Read Papantla Totonac Markos 9 Bible Online

Markos 9 - Papantla Totonac bible

Markos 9

¹I El a bisa nan: "Di berdat Mi ta bisa boso, tin algun di esnan ku ta para akinan ku lo no eksperensia morto prome ku nan mira e reino di Dios bin ku poder."

²I seis dia despues Jesus a hiba Pedro, Santiago i Juan huntu kuné, i a bai ku nan riba un seru haltu kaminda nan tabata nan so. I El a wordu transfigura nan dilanti;

³i Su pananan a bira radiante i blanku-blanku, manera ningun labado-di-pana riba tera por hasi.

⁴I Elias a parese na nan huntu ku Moises; i nan tabata kombersa ku Jesus.

⁵I Pedro a kontesta i a bisa Jesus: "Rabi, ta bon pa nos ta akinan; i laga nos traha tres tabernakel, un pa Bo, un pa Moises i un pa Elias."

⁶Pasobra e no tabata sa kiko pa bisa; pasobra nan tabata tur spanta.

⁷E ora ei a forma un nubia ku a sombra nan, i a sali un bos for di e nubia, bisando: "Esaki ta Mi Yu stima; tende na djé!"

⁸I direpiente, ora nan a wak ront, nan no a mira ni un hende mas huntu ku nan, sino Jesus so.

⁹I ora nan tabata baha for di e seru El a ordena nan pa no konta ningun hende loke nan a mira, te ora ku e Yu di Hende lo a lanta for di e mortonan.

¹⁰I nan a tene e palabra aki pa nan mes, i tabata diskuti ku otro kiko lanta for di e mortonan por ta nifika.

¹¹I nan tabata hasié pregunta, bisando: "Ta pakiko e eskribanan ta bisa ku Elias mester bin prome?"

¹²I El a kontesta nan: "Elias ta bin prome i ta restora tur kos. Ma kon anto ta para skirbi di e Yu di Hende ku E lo mester sufri hopi kos i wordu trata ku despresio?

¹³Ma Ami ta bisa boso ku Elias di berdat a bin, i nan a hasi kune manera nan a hana ta bon, manera ta para skirbi di dje."

¹⁴I ora nan a yega serka e disipelnan, nan a mira un multitut grandi ront di nan, i algun eskriba ta diskuti ku nan.

¹⁵I asina ku henter e multitut a mir'E, nan a keda masha asombra, i a kore bin pa kumind'E.

¹⁶I El a puntra nan: "Ta kiko boso ta diskuti ku nan?"

¹⁷I un hende for di e multitut a kontest'E: "Maestro, mi a trese serka Bo mi yu homber ku ta posei pa un spiritu ku ta hasie mudo;

¹⁸i unda ku esaki koh'e, e ta tir'e abou na suela, i e ta skuma i morde riba djente i ta bira tur steif. I mi a bisa Bo disipelnan pa saka e spiritu afo, ma nan no tabata por."

¹⁹I El a kontesta nan i a bisa: "O generashon inkredulo, kuantu tempu mas lo Mi ta serka boso? Kuantu tempu mas Mi mester soporta boso? Tres'e pa Mi!"

²⁰I nan a trese e mucha homber p'E. I ora ku el a mir'E, mesora e spiritu a pon'e hana steipi, i el a dal abou i tabata lora bai bin ta skuma.

²¹I El a puntra su tata: "Kuantu tempu e kos aki ta pasando kune?" I el a kontesta: "Di tempu ku e ta mucha.

²²I hopi biaha el a tir'e den kandela i den awa pa destruie. Ma si Bo por hasi algu, tene kompashon ku nos i yuda nos!"

²³I Jesus a bis'e: "'Si Bo por!' Tur kos ta posibel pa esun ku ta kere."

²⁴Mesora tata di e mucha a dal un gritu bisa: "Mi ta kere; yudami den mi inkredulidat!"

²⁵I ora Jesus a mira ku tabatin un multitut ta kore hala serka, El a reprende e spiritu impuru, bisando e: "Abo, spiritu mudo i sordo, Mi ta ordenabo, sali for di dje i no bai nunka mas den dje."

²⁶I e spiritu a grita i a pone e mucha hana steipi pisa, i a sali. I e mucha a bira meskos ku un hende morto, asina ku hopi hende tabata bisa: "El a muri!"

²⁷Ma Jesus a koh'e na su man i a lant'e; i el a lanta para.

²⁸I ora ku El a bai den kas, Su disipelnan a puntr'E ora nan tabata nan so kuné: "Pakiko nos no por a sak'e?"

²⁹I El a bisa nan: "E sorto aki no por sali pa medio di nada otro sino ku orashon so."

³⁰I for di einan nan a sali i a pasa dor di Galilea, i E no tabata kier pa ningun hende hana sa di esei.

³¹Pasobra E tabata sina Su disipelnan i bisa nan: "E Yu di Hende lo wordu entrega den man di hende, i nan lo mat'E; i despues ku El a wordu mata, E lo resusita riba e di tres dia."

³²Ma nan no a komprende e palabranan aki, i nan tabatin miedu di puntr'E.

³³I nan a yega Kapernaum; i ora ku E tabata den kas, El a puntra nan: "Ta kiko boso tabata diskuti na kaminda?"

³⁴Ma nan a keda ketu, pasobra na kaminda nan a diskuti ku otro kual di nan tabata esun di mas grandi.

³⁵I ora ku El a kai sinta, El a yama e diesdosnan i a bisa nan: "Si un hende kier ta esun di prome, lagu'e ta e ultimo di tur, i sirbido di tur."

³⁶I El a kohe un mucha i a pon'e para meimei di nan; i ora ku El a tum'e den Su brasa, El a bisa nan:

³⁷"Ken ku risibi un mucha manera esaki den Mi nomber, ta Ami e ta risibi; i ken ku risibiMi, no ta Ami e ta risibi, sino Esun ku a mandaMi."

³⁸Juan a bis'E: "Maestro, nos a mira un hende ta saka demono den Bo nomber, i nos a tah'e, pasobra e no ta sigui nos."

³⁹Ma Jesus a bisa: "No tah'e, pasobra no tin ni un hende ku lo hasi milager den Mi nomber, i djis despues papia malu di Mi.

⁴⁰Pasobra esun ku no ta kontra nos ta ku nos.

⁴¹Pasobra ken ku duna boso un kopa di awa bebe den Mi nomber, pasobra boso ta pertenese na Cristo, di berdat Mi ta bisa boso, di ningun manera e lo no perde su rekompensa.

⁴²"I ken ku hasi un di e chikitunan aki ku ta kere den Mi, trompeka, lo tabata miho p'e si un piedra di mulina pisa a wordu kologa na su garganta, i e wordu tira den laman.

⁴³I si bo man hasibo trompeka, kort'e kit'afo; miho bo drenta bida mankaron, ku teniendo bo dos mannan bo bai den fiernu, den e kandela ku no ta paga nunka,

⁴⁴[kaminda nan bichi no ta muri i e kandela no ta paga.]

⁴⁵I si bo pia hasibo trompeka, kort'e kit'afo; miho bo drenta bida lam, ku teniendo bo dos pianan bo wordu tira den fiernu, den e kandela ku no ta paga nunka,

⁴⁶[kaminda nan bichi no ta muri i e kandela no ta paga.]

⁴⁷I si bo wowo hasibo trompeka, sak'e tir'afo; miho bo drenta e reino di Dios ku un wowo so ku, teniendo dos wowo, bo wordu tira den kandela di fiernu,

⁴⁸kaminda 'nan bichi no ta muri i e kandela no ta paga.'

⁴⁹Pasobra tur hende lo wordu sala ku kandela.

⁵⁰"Salu ta bon; ma si salu perde su smak, ku kiko lo bo hasie salu atrobe? Perkura pa tin salu den boso mes, i tene pas ku otro."