Read Papantla Totonac Lukas 1 Bible Online

Lukas 1 - Papantla Totonac bible

Lukas 1

¹Ya ku hopi hende a trata di kompila un relato di e kosnan ku a sosode meimei di nos,

²meskos ku esnan ku for di prinsipio tabata testigu ku nan mes wowo i ku tabata sirbidonan di e palabra a entrega nan na nos,

³a parsemi bon tambe despues di a investiga tur kos kuidadosamente for di prinsipio, pa skirbi esaki pa bo den un forma ordena, O ekselentisimo Teofilo,

⁴pa bo por sa e berdat eksakto tokante di e kosnan ku bo a wordu sina.

⁵Den e dianan di Herodes, rei di Judea, tabatin un sierto saserdote ku yama Zakarias, di e divishon di Abias; i e tabatin un esposa for di e yu muhenan di Aaron, i su nomber tabata Elisabet.

⁶I nan tur dos tabata hustu den bista di Dios i tabata kana ireprochabel den tur e mandamentunan i ordenansanan di Senor.

⁷I nan no tabatin yu, pasobra Elisabet tabata steril, i nan tur dos tabata di edat hopi avansa.

⁸Awor a sosode ku mientras Zakarias tabata eherse su sirbishi saserdotal dilanti di Dios segun e ordu di su divishon,

⁹konforme e kustumber di e sirbishi saserdotal, el a wordu skohi dor di tira lot pa bai den e tempel di Senor i kima sensia.

¹⁰I henter e multitut di pueblo tabata hasi orashon pafo na e ora di ofrese sensia.

¹¹I un angel di Senor a parese na dje, para na banda drechi di e altar di sensia.

¹²I Zakarias a turdi ora ku el a mir'e, i miedu a drent'e.

¹³Ma e angel a bis'e: "No tene miedu, Zakarias, pasobra bo petishon a wordu tend!, i bo esposa Elisabet lo hana un yu homber pa bo, i lo bo dun'e e nomber Juan.

¹⁴I lo bo tin goso i alegria, i hopi lo regosiha pa motibu di su nasementu.

¹⁵Pasobra e lo ta grandi den bista di Senor, i e lo no bebe bina ni bibida sterki; i e lo wordu yena ku Spiritu Santu for di den barika di su mama.

¹⁶I e lo hasi hopi di e yunan di Israel bolbe serka Senor nan Dios.

¹⁷I ta e ta esun ku lo bai dilanti di djé den e spiritu i poder di Elias, pa restora kurason di e tatanan na e yunan, i e desobedesidonan na e aktitut di e hustunan, pa asina forma un pueblo bon prepara pa Senor."

¹⁸I Zakarias a bisa e angel: "Kon mi por ta sigur di esaki? Pasobra mi ta un homber bieu i mi esposa ta di edat avansa."

¹⁹I e angel a kontesta i a bis'e: "Ami ta Gabriel, kende ta para den e presensia di Dios; i mi a wordu manda pa papia ku bo, i pa trese e bon nobo aki pa bo.

²⁰I mira, lo bo keda mudo i sin por papia te dia ku e kosnan aki tuma luga, pasobra bo no a kere mi palabranan ku lo wordu kumpli na nan debido tempu."

²¹I e pueblo tabata warda riba Zakarias, i a hana strano ku el a tarda asina tantu den tempel.

²²Ma ora ku el a sali e no tabata por a papia ku nan; i nan a realisa nan mes ku el a mira un vishon den tempel; i el a keda hasi sena ku nan i a keda mudo.

²³I a sosode ku ora e dianan di su sirbishi saserdotal a keda kumpli, el a bai kas bek.

²⁴I despues di e dianan aki su esposa Elisabet a sali na estado; i sinku luna largu el a tene su mes skondi, bisando:

²⁵"Esaki ta e manera ku Senor a trata ku mi den e dianan ku El a mustra Su grasia na mi, pa kita mi reproche for di meimei di hende."

²⁶Awor den e di seis luna angel Gabriel a wordu manda pa Dios na un stat den Galilea ku yama Nazaret,

²⁷serka un birgen ku tabata komprometi ku un homber ku yama Jose, di e desendientenan di David; i nomber di e birgen tabata Maria.

²⁸I ora ku e angel a drenta bai serka dje, el a bis'e: "Saludo, abo ku ta altamente faboresi! Senor ta ku bo."

²⁹Ma Maria a keda masha turdi ora ku el a tende e palabranan aki, i a keda pensa kiko e saludo ei por ta nifika.

³⁰I e angel a bis'e: "No tene miedu, Maria, pasobra bo a hana grasia serka Dios.

³¹I mira, lo bo konsebi den bo matris i duna lus na un yu homber, i lo bo yam'E Jesus.

³²E lo ta grandi i lo wordu yama Yu di e Haltisimo; i Senor Dios lo dun'E e trono di Su tata David;

³³i E lo reina riba e kas di Jakob pa semper, i Su reino lo no tin fin."

³⁴I Maria a bisa e angel: "Kon esaki por ta, siendo ku mi ta un birgen?"

³⁵I e angel a kontesta i a bis'e: "Spiritu Santu lo bin riba bo, i e poder di e Haltisimo lo sombrabo; i pa e motibu ei Esun Santu ku tin ku nase lo wordu yama e Yu di Dios.

³⁶I mira, bo pariente Elisabet tambe a konsebi un yu homber den su biehes; i esaki, kende tabata wordu yama steril, awor ta den su di seis luna.

³⁷Pasobra pa Dios nada lo no ta imposibel."

³⁸I Maria a bisa: "Ata e sirbido di Senor; laga sosode ku mi segun bo palabra." I e angel a kita bai lagu'e.

³⁹Awor den e dianan ei Maria a lanta i a bai pura na e serunan, na un stat di Juda,

⁴⁰i a bai den e kas di Zakarias i a saluda Elisabet.

⁴¹I a sosode ku ora Elisabet a tende Maria su saludo, e bebi a bula den su barika; i Elisabet a wordu yena ku Spiritu Santu.

⁴²I el a grita na bos haltu i a bisa: "Bendishona bo ta entre muhenan, i bendishona ta e fruta di bo barika!

⁴³I di unda mi ta merese esaki, ku mama di mi Senor ta bin serka mi?

⁴⁴Pasobra mira, ora ku e zonidu di bo saludo a yega na mi orea e bebi a bula di goso den mi barika.

⁴⁵I bendishona ta esun ku a kere ku loke Senor a bis'e lo wordu kumpli."

⁴⁶I Maria a bisa: "Mi alma ta engrandese Senor,

⁴⁷i mi spiritu a regosiha den Dios mi Salbador.

⁴⁸Pasobra El a mira e estado umilde di Su sirbiente; pasobra mira, for di awor tur generashon lo yamami bendishona.

⁴⁹Pasobra Esun Poderoso a hasi kosnan grandi pa mi; i santu ta Su nomber.

⁵⁰I Su miserikordia ta di generashon pa generashon pa ku esnan ku tin temor p'E.

⁵¹El a hasi echonan poderoso ku Su brasa; El a plama esnan ku tabata orguyoso den e pensamentunan di nan kurason.

⁵²El a baha gobernantenan for di nan trono, i a halsa esnan ku tabata umilde.

⁵³El a yena esnan ku tin hamber ku kosnan bon; i a manda e rikunan bai man bashi.

⁵⁴El a duna yudansa na Su sirbido Israel, pa rekorda Su miserikordia,

⁵⁵manera El a papia ku nos tatanan, ku Abraham i su desendientenan pa semper."

⁵⁶I Maria a keda komo tres luna serka Elisabet i despues a bai su kas bek.

⁵⁷Awor e tempu a yega pa Elisabet duna lus, i el a duna lus na un yu homber.

⁵⁸I su bisinanan i famianan a tende ku Senor a demostra Su gran miserikordia na dje; i nan tabata regosiha huntu kune.

⁵⁹I a sosode ku riba e di ocho dia nan a bin pa sirkumsida e yu, i nan kier a yam'e Zakarias, meskos ku su tata.

⁶⁰Ma su mama a kontesta i a bisa: "No, e mester yama Juan."

⁶¹I nan a bis'e: "No tin ni un hende den bo famia ku tin e nomber ei."

⁶²I ku sena nan a puntra su tata kon e tabata kier pa e yu wordu yama.

⁶³I el a pidi un borchi i a skirbi lo siguiente: "Su nomber ta Juan." I nan tur a keda asombra.

⁶⁴I mesora su boka a wordu habri i su lenga a los, i el a kuminsa papia, alabando Dios.

⁶⁵I temor a baha riba tur esnan ku tabata biba ront di nan; i tur e asuntonan aki a wordu papia den tur e serunan di Judea.

⁶⁶I tur esnan ku a tende esakinan a warda nan den nan kurason, bisando: "Kiko e yu aki lo bira anto?" Pasobra e man di Senor siguramente tabata kune.

⁶⁷I su tata Zakarias a wordu yena ku Spiritu Santu, i a profetisa, bisando:

⁶⁸"Bendishona sea Senor Dios di Israel, pasobra El a bishita nos i a trese redenshon pa Su pueblo,

⁶⁹i a lanta un kachu di salbashon pa nos den kas di Su sirbido David--

⁷⁰manera El a papia pa medio di boka di Su profetanan santu for di prome aya--

⁷¹salbashon for di nos enemigunan, i for di man di tur esnan ku ta odia nos;

⁷²pa demostra miserikordia na nos tatanan, i pa rekorda Su aliansa santu,

⁷³e huramentu ku El a hasi na nos tata Abraham,

⁷⁴pa konsede nos pa nos, siendo libra for di man di nos enemigunan, por a sirbié sin temor,

⁷⁵den santidat i hustisia dilanti di djé, tur e dianan di nos bida.

⁷⁶I abo, mi yu, lo wordu yama profeta di e Haltisimo; pasobra abo lo bai dilanti di SENOR pa prepara Su kamindanan;

⁷⁷pa duna Su pueblo konosementu di salbashon pa medio di pordon di nan pikanan,

⁷⁸pa motibu di e miserikordia tierno di nos Dios, ku kual e Salida di Solo for di ariba lo bishita nos,

⁷⁹pa resplandese riba esnan ku ta biba den skuridat i den e sombra di morto, pa dirigi nos pianan hiba riba e kaminda di pas."

⁸⁰I e yu a krese i a bira fuerte den spiritu, i e tabata biba den e desiertonan te na e dia ku el a presenta publikamente na Israel.