Read Papantla Totonac Lukas 10 Bible Online

Lukas 10 - Papantla Totonac bible

Lukas 10

¹Awor despues di esaki Senor a nombra setenta otro, i a manda nan dos-dos Su dilanti pa tur stat i luga, kaminda E mes tabata pa bai.

²I E tabata bisa nan: "E kosecha ta masha grandi, ma trahado ta poko; pesei, pidi e Senor di kosecha pa manda trahado den Su kosecha.

³Boso bai anto; Mi ta manda boso manera lamchi meimei di lobo.

⁴No hiba bolsa, ni saku, ni sandalia; i no saluda ningun hende na kaminda.

⁵"I den kualke kas ku boso drenta, bisa prome: 'Pas sea ku e kas aki.'

⁶I si tin un hende di pas einan, boso pas lo keda riba dje; ma si no tin, boso pas lo bolbe serka boso.

⁷I keda den e kas ei, i kome i bebe loke nan duna boso, pasobra e trahado ta digno di su sueldo. No keda bai di un kas pa otro.

⁸"I den kualke stat ku boso drenta, i nan risibi boso, kome loke wordu poni boso dilanti;

⁹i kura e enfermonan ku tin einan, i bisa nan: 'E reino di Dios a yega serka boso.'

¹⁰Ma ora boso drenta un stat i nan no risibi boso, sali bai den su kayanan i bisa:

¹¹'Te asta e stof di boso stat ku ta pega na nos pia nos ta sakudi kita kontra boso; ma sea sigur di esaki, ku e reino di Dios a yega serka.'

¹²Mi ta bisa boso, riba e dia ei lo ta mas tolerabel pa Sodoma ku pa e stat ei.

¹³"Ai di bo, Korazin! Ai di bo, Betsaida! Pasobra si na Tiro i na Sidon a wordu hasi e milagernan ku a sosode den boso, ya pa hopi tempu kaba nan lo a repenti, sinta den pana di saku i shinishi.

¹⁴Ma den e huisio lo ta mas tolerabel pa Tiro i Sidon ku pa boso.

¹⁵I abo, Kapernaum, ta te na shelu bo kier wordu halsa? Te na fiernu lo bo wordu rebaha!

¹⁶"Esun ku tende na boso ta tende na Mi, i esun ku rechasa boso, ta Ami e ta rechasa; i esun ku rechasaMi ta rechasa Esun ku a mandaMi."

¹⁷I e setentanan a bolbe ku goso, bisando: "Senor, asta e demononan ta someti na nos den Bo nomber."

¹⁸I El a bisa nan: "Mi a mira Satanas kai for di shelu manera lamper.

¹⁹Mira, Mi a duna boso outoridat pa trapa riba kolebra i skorpion, i riba tur poder di e enemigu, i nada lo no hasi boso dano.

²⁰Ma no regosiha den esaki, ku e spiritunan ta someti na boso, ma regosiha ku boso nombernan ta skirbi den shelu."

²¹Na e mesun momento ei Jesus a regosiha grandemente den Spiritu Santu, i a bisa: "Mi ta alabaBo, O Tata, Senor di shelu i tera, ku Bo a skonde e kosnan aki pa sabinan i inteligentenan i a revela nan na mucha chikitu. Si, Tata, pasobra asina tabata agradabel den Bo bista.

²²"Tur kos a wordu entrega na Mi dor di Mi Tata, i ningun no sa Ken e Yu ta, sino e Tata so, i Ken e Tata ta, sino e Yu so, i esun na kende e Yu kier revel'E."

²³I El a drai wak Su disipelnan, i nan so El a bisa: "Bendishona ta e wowonan ku ta mira e kosnan ku boso ta mira,

²⁴pasobra Mi ta bisa boso, ku hopi profeta i rei tabata desea di mira e kosnan ku boso ta mira, ma no a mira nan, i di tende e kosnan ku boso ta tende, ma no a tende nan."

²⁵I mira, un eksperto di Lei a lanta para i a pon'E na prueba, bisando: "Maestro, kiko mi mester hasi pa ereda bida eterno?"

²⁶I Jesus a bis'e: "Kiko ta para skirbi den Lei? Kiko bo ta lesa den dje?"

²⁷I el a kontesta i a bisa: "Stima SENOR bo Dios ku henter bo kurason, i ku henter bo alma, i ku tur bo forsa, i ku henter bo mente; i bo prohimo manera bo mes."

²⁸I Jesus a bis'e: "Bo a kontesta bon; hasi esaki i lo bo biba."

²⁹Ma e kier a hustifika su mes i a bisa Jesus: "I ta ken ta mi prohimo?"

³⁰Jesus a kontesta i a bisa: "Un homber tabata baha di Jerusalem bai Jeriko, i el a kai den man di ladron; i nan a kita tur kos for di dje i a batie, i a bai lagu'e mitar morto.

³¹I pa kasualidat un saserdote tabata baha bai pa e kaminda ei, i ora ku el a mir'e, el a pas'e forbei bai pa e otro banda.

³²I meskos un levita tambe, ora ku el a yega na e luga ei i a mir'e, a pas'e forbei bai pa e otro banda.

³³Ma un samaritano, ku tabata biahando, a yega serka di dje; i ora ku el a mir'e, el a sinti kompashon,

³⁴i a bai serka dje i a mara su heridanan i a basha zeta i bina riba nan; i el a pon'e riba su buriku, a hib'e na un posada i a perkura p'e.

³⁵I e siguiente dia el a saka dos denario duna e dono di posada i a bisa: 'Perkura p'e; i ki gastu mas ku bo hasi lo mi pagabo ora mi bolbe.'

³⁶"Kual di e tresnan aki bo ta kere tabata prohimo di e homber ku a kai den man di ladron?"

³⁷I el a bisa: "Esun ku a mustra miserikordia na dje." I Jesus a bis'e: "Bai i hasi meskos."

³⁸Awor segun ku nan tabata sigui nan biahe, El a bai na un pueblito; i un muhe ku yama Marta a risibié den su kas.

³⁹I e tabatin un ruman muhe ku yama Maria, kende, sinta na pia di Senor, tabata skucha Su Palabra.

⁴⁰Ma Marta tabata masha okupa ku tantu kos di hasi; i el a bin serka Jesus, i a bisa: "Senor, no ta importaBo ku mi ruman muhe ta laga mi so sirbi? Bis'e anto pa yudami."

⁴¹Ma Senor a kontesta i a bis'e: "Marta, Marta, bo ta preokupa i ta molestia bo kurpa ku asina hopi kos;

⁴²ma poko kos ta nesesario, en realidat un so, pasobra Maria a skohe e parti bon ku lo no wordu kita for di dje."