Read Papantla Totonac Lukas 11 Bible Online

Lukas 11 - Papantla Totonac bible

Lukas 11

¹I a sosode ku E tabata hasi orashon na un luga, i ora ku El a kaba, un di Su disipelnan a bis'E: "Senor, sina nos hasi orashon, meskos ku Juan tambe a sina su disipelnan."

²I El a bisa nan: "Ora boso ta hasi orashon, bisa: 'Nos Tata ku ta den shelu, Bo nomber sea santifika. Ku Bo reino bin.

³Duna nos awe nos pan di kada dia.

⁴I pordona nos nos pikanan, pasobra nos tambe ta pordona tur esnan ku ta debe nos. I no hiba nos den tentashon.'"

⁵I El a bisa nan: "Supone ku un di boso tin un amigu, i mei anochi bo ta bai serka dje, i ta bis'e: 'Amigu, fiami tres pan,

⁶pasobra un amigu di mi a yega for di un biahe serka mi, i mi no tin nada pa pone su dilanti'.

⁷"I for di paden e lo kontesta i bisa: 'No molestiami; ya porta ta sera kaba i mi yunan i ami ta riba kama; mi no por lanta pa dunabo nada.'

⁸Mi ta bisa boso, maske e no lanta dun'e nada pasobra e ta su amigu, tog, pa motibu di su impertinensia e lo lanta i dun'e tur loke e tin mester.

⁹"I Mi ta bisa boso, pidi, i lo wordu duna na boso; buska, i boso lo hana; bati, i lo wordu habri pa boso.

¹⁰Pasobra ken ku pidi, ta risibi; i esun ku buska, ta hana; i pa esun ku bati, lo wordu habri.

¹¹"Supone ku un tata entre boso, si su yu pidie un piska, lo e dun'e un kolebra?

¹²Of si e pidie un webu, lo e dun'e un skorpion?

¹³Si boso anto, siendo malbado, sa di duna kosnan bon na boso yunan, kuantu mas boso Tata selestial lo duna e Spiritu Santu na esnan ku pidié!"

¹⁴I E tabata saka un demono, i esaki tabata mudo. I a sosode ku ora e demono a sali, e homber mudo a papia; i e multitutnan a keda asombra.

¹⁵Ma algun di nan a bisa: "E ta saka demono pa medio di Beelzebu, e prens di demononan."

¹⁶I otronan, pa pon'E na prueba, tabata pidié un senal for di shelu.

¹⁷Ma E tabata konose nan pensamentunan, i a bisa nan: "Tur reino dividi kontra su mes ta keda ruina; i un kas dividi kontra su mes ta kai.

¹⁸I si Satanas tambe ta dividi kontra su mes, kon su reino lo keda para? Pasobra boso ta bisa ku Ami ta saka demono pa medio di Beelzebu.

¹⁹I si Ami ta saka demono pa medio di Beelzebu, pa medio di ken boso yu hombernan ta saka nan? Pesei eseinan lo ta boso huesnan.

²⁰Ma si Ami ta saka demono pa medio di e dede di Dios, anto e reino di Dios a yega serka boso.

²¹"Ora ku e homber fuerte, bon arma, ta kuida su mes palasio, su propiedatnan ta bon sigura;

²²ma ora ku un ku ta mas fuerte kune atak'e i podera di dje, esei ta kita for di dje henter su armadura riba kual e tabata konfia, i ta parti su botin.

²³"Esun ku no ta ku Mi ta kontra Mi; i esun ku no ta rekohe huntu ku Mi ta plama.

²⁴"Ora ku un spiritu impuru sali for di un hende, e ta pasa dor di luganan seku, buskando sosiegu, i ora ku e no hana esei, e ta bisa: 'Lo mi bolbe na mi kas for di unda mi a sali.'

²⁵I ora ku e bin, e ta han'e bari i tur na ordu.

²⁶E ora ei e ta bai i ta hiba huntu kune shete otro spiritu mas malbado kune, i nan ta drenta paden i ta keda biba einan; i e ultimo estado di e hende ei ta bai bira pio ku esun prome."

²⁷I a sosode ku mientras E tabata papia e kosnan aki un di e muhenan den e multitut a halsa su bos, i a bis'E: "Bendishona ta e barika ku a kargaBo, i e pechunan ku a kriaBo."

²⁸Ma El a bisa; "Alkontrario, bendishona ta esnan ku ta tende e palabra di Dios, i ta ward'e."

²⁹I segun ku e multitutnan tabata oumenta, El a kuminsa bisa: "E generashon aki ta un generashon malbado; e ta buska un senal, ma ningun senal lo no wordu duna na dje, sino solamente e senal di Jonas.

³⁰Pasobra meskos ku Jonas a bira un senal pa e ninivitanan, asina e Yu di Hende lo ta pa e generashon aki.

³¹E Reina di Suit lo lanta den e huisio huntu ku e hombernan di e generashon aki i kondena nan, pasobra el a bin for di e finnan di mundu pa tende e sabiduria di Salomon; i mira, mas ku Salomon t'aki!

³²E hombernan di Ninive lo lanta den e huisio huntu ku e generashon aki i konden'e, pasobra nan a repent! dor di e predikashi di Jonas; i mira, mas ku Jonas t'aki.

³³"Ningun hende, despues di a sende un lampi, no ta pon'e den un bodega, ni bou di un kaha di midi trigo, ma riba un kandela, pa esnan ku drenta por mira e lus.

³⁴E lampi di bo kurpa ta bo wowo; ora bo wowo ta bon, henter bo kurpa tambe ta yen di lus; ma ora ku e ta malu, bo kurpa tambe ta yen di skuridat.

³⁵Pesei, perkura pa e lus den bo no ta skuridat.

³⁶Asina anto, si henter bo kurpa ta yen di lus, sin ningun parti skur den dje, e lo ta kompletamente ilumina, manera ora e lampi ta iluminabo ku su rayonan."

³⁷Awor ora ku El a kaba di papia, un fariseo a pidié pa kome serka dje; i El a bai paden, i a bai sinta na mesa.

³⁸I ora ku e fariseo a mira esaki, el a keda strana ku E no a laba Su mes prome ku kome.

³⁹Ma Senor a bis'e: "Awor boso, fariseonan, ta limpia parti pafo di kopa i di tayo; ma parti paden boso ta yen di ladronisia i maldat.

⁴⁰Boso, bobonan, no ta Esun ku a traha e parti pafo a traha e parti paden tambe?

⁴¹Ma duna loke ta paden komo limosna, i e ora ei tur kos ta limpi pa boso.

⁴²"Ma ai di boso, fariseonan! Pasobra boso ta duna un di dies parti di menta i ruda i di tur sorto di yerba, i tog no ta hasi kaso di hustisia i di amor di Dios. Ma esakinan ta e kosnan ku boso mester a hasi, sin neglisha e otronan.

⁴³"Ai di boso, fariseonan! Pasobra boso ta gusta e prome asientonan den snoa, i e saludonan di respet riba plasa.

⁴⁴"Ai di boso, eskribanan i fariseonan, hipokritnan! Pasobra boso ta manera grafnan ku hende no ta mira, i e hendenan ku ta kana pasa riba nan no sa mes."

⁴⁵I un di e ekspertonan di Lei a kontest'E, bisando: "Maestro, dor di bisa e kosnan aki Bo ta ofende nos tambe."

⁴⁶Ma El a bisa: "Ai di boso tambe, ekspertonan di Lei! Pasobra boso ta pone riba hende karganan pisa pa karga, mientras ku boso mes, ni ku un dede boso no ta mishi ku e karganan ei.

⁴⁷"Ai di boso! Pasobra boso ta traha e monumentonan di e profetanan, i tabata boso tatanan ku a mata nan.

⁴⁸Asina boso ta testigunan i ta aproba e echonan di boso tatanan; pasobra ta nan a mata nan, i boso ta traha nan tumbanan.

⁴⁹Pa e motibu aki tambe e sabiduria di Dios a bisa: 'Lo Mi manda profetanan i apostelnan serka nan; i algun di nan nan lo mata i algun nan lo persigui,

⁵⁰asina ku e sanger di tur e profetanan, drama desde fundashon di mundu, por wordu eksigi di e generashon aki,

⁵¹for di e sanger di Abel te na e sanger di Zakarias, kende a perese entre e altar i e kas di Dios; si, Mi ta bisa boso, esaki lo wordu eksigi di e generashon aki.'

⁵²"Ai di boso, ekspertonan di Lei! Pasobra boso a kohe e yabi di konosementu bai kune. Boso mes no a drenta, i esnan ku tabata drentando, boso a stroba."

⁵³I ora ku El a bai for di einan, e eskribanan i e fariseonan a kuminsa atak'E pisa i interogu'E tokante di hopi kos,

⁵⁴trahando komplot kontra djé, pa koh'E den trampa ku algu ku E por a bisa, pa nan por a akus'E.