Read Papantla Totonac Lukas 12 Bible Online

Lukas 12 - Papantla Totonac bible

Lukas 12

¹Bou di e sirkumstansianan aki, ora ku miles i miles di hende a reuni di manera ku nan tabata trapa otro, El a kuminsa bisa prome na Su disipelnan: "Warda boso di e zurdeg di e fariseonan, lokual ta hipokresia.

²No tin nada tapa ku lo no wordu revela, i nada skondi ku hende lo no hana sa.

³Pesei, tur loke boso a papia den skuridat lo wordu tendi den klaridat, i loke boso a papia ketu-ketu den e kambernan mas paden lo wordu proklama for di riba dak.

⁴"I Mi ta bisa boso, Mi amigunan, no tene miedu di esnan ku ta mata e kurpa, i ku despues di esei no por hasi nada mas.

⁵Ma lo Mi mustra boso ken boso mester teme. Teme Esun ku despues ku El a mata tin outoridat pa tira den fiernu; si, Mi ta bisa boso, teme E!

⁶No t'asina ku sinku mofi ta wordu bendi pa dos plaka? I ni un di nan no ta wordu lubida dilanti di Dios.

⁷Di berdat, asta e drachinan di kabei riba boso kabes, tur ta konta. No tene miedu; boso bal mas ku un kantidat di mofi.

⁸"I Mi ta bisa boso, ken ku konfesaMi dilanti di hende, e Yu di Hende tambe lo konfesa e hende ei dilanti di e angelnan di Dios;

⁹ma esun ku nengaMi dilanti di hende lo wordu nenga dilanti di e angelnan di Dios.

¹⁰I ken ku papia un palabra kontra e Yu di Hende, esaki lo wordu pordona; ma esun ku blasfema kontra Spiritu Santu, esaki lo no wordu pordona.

¹¹"I ora nan hiba boso dilanti di snoa i dilanti di e gobernantenan i outoridatnan, no preokupa kon of kiko boso mester papia na boso defensa, of kiko boso mester bisa;

¹²pasobra Spiritu Santu lo sina boso na e mes momento ei kiko boso mester bisa."

¹³I un hende for di e multitut a bis'E: "Maestro, bisa mi ruman homber pa parti e erensia ku mi."

¹⁴Ma Jesus a bis'e: "Homber, ta ken a poneMi komo hues of refri riba boso?"

¹⁵I El a bisa nan: "Tene kuidou, i warda boso di tur golosidat; pasobra bida di hende no ta konsisti di e abundansia di e kosnan ku e tin."

¹⁶I El a konta nan un parabola, bisando: "E tereno di un sierto homber riku tabata masha produktivo.

¹⁷I el a kuminsa rasona den su mes, bisando: 'Kiko lo mi hasi? Pasobra mi no tin luga pa warda mi kosecha.'

¹⁸"I el a bisa: 'Esaki lo mi hasi: Lo mi basha mi mangasinanan abou i traha otro mangasinanan mas grandi ainda, i den nan lo mi warda tur mi trigo i mi biennan.

¹⁹I lo mi bisa mi alma: "Alma, bo tin hopi biennan montona pa hopi ana; tuma sosiegu, kome, bebe i fiesta."'

²⁰"Ma Dios a bis'e: 'Abo, bobo! Awenochi mes bo alma lo wordu eksigi for di bo; i awor ken lo bira dono di loke bo a prepara?'

²¹"Asina ta e hende ku ta montona tesoro pa su mes, i no ta riku pa ku Dios."

²²I El a bisa Su disipelnan: "Pa e motibu aki Mi ta bisa boso: No preokupa pa boso bida, kiko boso lo kome, ni pa boso kurpa, kiko boso lo bisti.

²³Pasobra bida ta mas ku kuminda, i kurpa mas ku pana di bisti.

²⁴Konsidera e rafnan, pasobra nan no ta sembra ni kosecha; i nan no tin luga pa warda provishon, ni mangasina; i tog Dios ta alimenta nan; kuantu mas ku parha boso no ta bal!

²⁵I kual di boso, dor di preokupa, por anadi un kodo na su haltura?

²⁶Si boso anto no por hasi ni sikiera un kos asina chikitu, pakiko boso ta preokupa pa otro asuntonan?

²⁷"Konsidera e lelinan, kon nan ta krese; nan no ta traha mata kurpa, ni nan no ta hila; ma Mi ta bisa boso ku ni Salomon den tur su gloria no tabata bistl manera un di esakinan.

²⁸Ma si di tal manera Dios ta bisti e yerba di sabana, lokual awe t'ei i manan ta wordu tira den fornu, kuantu mas E lo bisti boso, O hendenan di poko fe!

²⁹I no buska kiko boso lo kome of kiko boso lo bebe, i no sigui preokupa.

³⁰Pasobra tur e kosnan aki e nashonnan di mundu ta buska ku diligensia; ma boso Tata sa ku boso tin mester di e kosnan aki.

³¹Ma buska Su reino, i e kosnan aki lo wordu anadi na boso.

³²"No tene miedu, tou chikitu, pasobra a agrada boso Tata pa duna boso e reino.

³³Bende boso propiedatnan i duna limosna; traha pa boso mes bolsa ku no ta gasta, un tesoro den shelu ku no ta kaba nunka, kaminda ladron no por yega, ni mot no por destrui.

³⁴Pasobra kaminda boso tesoro ta, einan boso kurason tambe lo ta.

³⁵"Mira pa boso hep ta faha, i pa boso lampinan ta send!

³⁶I sea manera hombernan ku ta warda riba nan shon, pa ora ku e bolbe di e fiesta di kasamentu i e bin bati, nan por habri p'e mesora.

³⁷Bendishona ta e esklabunan ei ku e shon lo hana ta vigila ora ku e bin. Di berdat Mi ta bisa boso ku e lo faha su mes pa sirbi, i lo invita nan sinta na mesa pa sirbi nan.

³⁸Sea ku e bin den e di dos warda di anochi, of den e di tres, i hana nan asina, bendishona ta e esklabunan ei.

³⁹I sea sigur di esaki, ku si e kabes di kas tabata sa ki ora e ladron tabata di bin, e lo no a permiti pa kibra drenta su kas.

⁴⁰Boso tambe, sea prepara, pasobra na un ora ku boso no ta spera e Yu di Hende ta bin."

⁴¹I Pedro a bisa: "Senor, ta ku nos Bo ta papia e parabola aki, of ku tur otro hende tambe?"

⁴²I Senor a bisa: "Ken anto ta e fiel i prudente mayordomo, kende su shon lo nombra riba su sirbidonan, pa duna nan nan parti di kuminda na su debido tempu?

⁴³Bendishona ta e esklabu ei ku ta hasiendo asina ora su shon bin.

⁴⁴Di berdat Mi ta bisa boso ku e lo lagu'e keda na enkargo di tur su propiedatnan.

⁴⁵Ma si e esklabu ei bisa den su kurason: 'Mi shon ta tarda pa bin,' i e kuminsa suta e esklabunan, tantu homber komo muhe, i kuminsa kome i bebe i bira burachi,

⁴⁶e shon di e esklabu ei lo bin riba un dia ku e no ta spera, i na un ora ku e no sa, i lo kap e na pida-pida, i dun'e un luga huntu ku e inkredulonan.

⁴⁷"I e esklabu ei ku tabata konose e boluntat di su shon, ma no a prepara su mes, ni a hasi di akuerdo ku su boluntat, lo hana hopi sota,

⁴⁸ma esun ku no tabata sa esei, i a hasi kosnan ku merese sota, lo hana poko sota. I di kada un, na kende hopi a wordu duna, hopi lo wordu eksigi; i esun ku hopi a wordu konfia na dje, di esei nan lo eksigi muchu mas.

⁴⁹"Mi a bin pa tira kandela riba mundu; i kuantu Mi ta desea ku esaki tabata sendi kaba!

⁵⁰Ma Mi tin un boutismo pa wordu batisa kune, i ki angustia Mi ta sinti te ora ku esaki keda kumpli!

⁵¹Boso ta kere ku Mi a bin pa trese pas riba mundu? Mi ta bisa boso, no, ma mas bien divishon;

⁵²pasobra for di awor sinku hende den un kas lo ta dividi, tres kontra dos, i dos kontra tres.

⁵³Nan lo ta dividi, tata kontra yu homber, i yu homber kontra tata; mama kontra yu muhe, i yu muhe kontra mama; suegra kontra nuera, i nuera kontra suegra."

⁵⁴I tambe E tabata bisa e multitutnan: "Ora boso mira un nubia ta bin for di pabou, mesora boso ta bisa: 'Tin awaseru na kaminda,' i asina ta sosode.

⁵⁵I ora boso sinti un bientu di suit ta supla, boso ta bisa: 'Ta bai hasi masha kalor awe,' i asina ta sosode.

⁵⁶Boso, hipokritnan! Boso sa kon pa analisa e aparensia di tera i shelu, ma di kon boso no ta analisa e tempu aki?

⁵⁷"I pakiko boso no ta huzga di boso mes loke ta hustu?

⁵⁸Pasobra mientras ku bo ta bai ku bo kontrapartida pa presenta dilanti di gobierno, hasi tur esfuerso pa na kaminda bo drecha kuenta kune, pa e no lastrabo hiba dilanti di hues, i hues entregabo na polis, i polis serabo den prizon.

⁵⁹Mi ta bisabo ku lo bo no sali for di einan te ora bo a paga delaster un sen."