Read Papantla Totonac Lukas 13 Bible Online

Lukas 13 - Papantla Totonac bible

Lukas 13

¹Awor na e mesun okashon tabatin algun hende presente ku tabata kont'E di e galileonan, kende nan sanger Pilato a meskla ku nan sakrifisionan.

²I El a kontesta i a bisa nan: "Boso ta kere ku e galileonan aki tabata pekadonan mas grandi ku tur otro galileo, pasobra esaki a pasa ku nan?

³Mi ta bisa boso, no, ma si boso no repenti, boso tur lo perese meskos.

⁴Of boso ta kere ku e diesochonan ei, riba kendenan e toren den Siloam a kai i a mata nan, tabata mas kulpabel ku tur e hendenan ku ta biba na Jerusalem?

⁵Mi ta bisa boso, no, ma si boso no repenti, boso tur lo perese meskos."

⁶I El a kuminsa konta e parabola aki: "Un homber tabatin un palu di figo ku a wordu planta den su kunuku di wendruif; i el a bin buska fruta na dje i no a hana nada.

⁷I el a bisa e kuidado di kunuku di wendruif: 'Mira, pa tres ana kaba mi ta bin buska fruta na e palu di figo aki sin hana nada. Kap e! Pakiko e mester kaba ku forsa di e tera?'

⁸"I el a kontesta i a bis'e: 'Shon, lagu'e para e ana aki ainda, te ora ku mi koba ront di dje i pone gordura;

⁹i si e duna fruta otro ana, bon; ma si no t'asina, kap e.'"

¹⁰I E tabata sina riba dia di Sabat den un di e snoanan.

¹¹I mira, tabatin un muhe ku pa diesocho ana tabatin un spiritu di malesa; i e tabata tur dobla i di ningun manera no por a stret su kurpa.

¹²I ora Jesus a mir'e, El a yam'e serka djé i a bis'e: "Muhe, bo ta libra di bo malesa."

¹³I El a pone Su mannan riba dje; i mesora e muhe su kurpa a bira stret atrobe, i el a kuminsa glorifika Dios.

¹⁴I e ofisial di snoa, indigna pasobra Jesus a kura hende riba dia di Sabat, a kuminsa bisa e multitut: "Tin seis dia ku hende mester traha; bin anto riba e dianan ei pa wordu kura i no riba dia di Sabat."

¹⁵Ma Senor a kontest'e i a bisa: "Boso, hipokritnan, kada un di boso no ta los su buey of su buriku for di pesebre, i hib'e pa bebe awa riba Sabat?

¹⁶I e muhe aki, siendo un yu muhe di Abraham, kende Satanas tabatin mara pa diesocho ana, e no mester a wordu libra for di e kadena aki riba dia di Sabat?"

¹⁷I ora ku El a bisa esaki, tur Su kontrapartidanan a keda na berguensa; i henter e multitut tabata regosiha pa tur e kosnan glorioso ku E tabata hasi.

¹⁸Pesei E tabata bisa: "Kiko e reino di Dios parse, i ku kiko lo Mi kompar'e?

¹⁹E ta manera un simia di moster ku un homber a kohe i a planta den su hofi; i esaki a krese bira un palu; i e parhanan di shelu a traha neishi den su ramanan."

²⁰I El a bolbe bisa: "Ku kiko lo Mi kompara e reino di Dios?

²¹E ta manera zurdeg ku un muhe a kohe i a skonde den tres midi di harina, te ora ku esaki a bira kompletamente zur."

²²I E tabata pasa dor di e statnan i pueblitonan ta sina hende, i siguiendo Su kaminda pa Jerusalem.

²³I un hende a puntr'E: "Senor, ta algun hende so ta wordu salba?" I El a bisa nan:

²⁴"Hasi tur esfuerso pa drenta dor di e porta smal; pasobra hopi, Mi ta bisa boso, lo buska pa drenta i lo no por.

²⁵Unabes ku e kabes di kas lanta i sera porta, boso lo para pafo i bati na porta, bisando: 'Senor, habri pa nos!' "E ora ei E lo kontesta i bisa boso: 'Mi no sa di unda boso ta.'

²⁶"E ora ei boso lo kuminsa bisa: 'Nos a kome i bebe den Bo presensia, i Bo a sina e hendenan den nos kayanan'.

²⁷"I E lo bisa: 'Mi ta bisa boso, Mi no sa di unda boso ta; bai for di Mi, boso tur, hasidonan-di-maldat.'

²⁸"I ayanan lo tin yoramentu i mordementu riba djente ora boso mira Abraham i Isaak i Jakob i tur e profetanan den e reino di Dios, ma boso mes tira pafo.

²⁹I nan lo bin for di pariba i pabou, i for di nort i suit, i lo sinta na mesa den e reino di Dios.

³⁰I mira, tin ultimonan ku lo ta e promenan, i promenan ku lo ta e ultimonan."

³¹Na e mesun tempu ei algun fariseo a bin bis'E: "Sali bai for di aki, pasobra Herodes kier mataBo."

³²I El a bisa nan: "Bai i bisa e zoro ei: 'Mira, Mi ta saka demono i Mi ta kura hende awe i manan, i riba e di tres dia lo Mi alkansa Mi meta.'

³³Sinembargo, Mi mester sigui biaha awe i manan i otro manan; pasobra no por ta ku un profeta ta perese pafo di Jerusalem.

³⁴"O Jerusalem, Jerusalem, e stat ku ta mata e profetanan i ta piedra esnan ku ta wordu manda serka dje! Kuantu biaha Mi kier a hunta bo yunan, meskos ku un galina ta hunta su puitunan bou di su halanan, i boso no tabata kier!

³⁵Mira, boso kas ta keda desola pa boso; i Mi ta bisa boso, boso lo no miraMi te ora ku e tempu yega ku boso ta bisa: 'Bendishona ta Esun ku ta bin den e nomber di SENOR!'"