Read Papantla Totonac Lukas 14 Bible Online

Lukas 14 - Papantla Totonac bible

Lukas 14

¹I a sosode ku ora El a bai den kas di un di e lideman di e fariseonan riba dia di Sabat pa kome pan, nan tabata ten'E bon na bista.

²I mira, dilanti di djé tabatin un homber ku tabata sufri di dewater.

³I Jesus a kontesta i a papia ku e ekspertonan di Lei i e fariseonan, bisando: "Lei ta permit! pa kura riba dia di Sabat, si of no?"

⁴Ma nan a keda ketu. I El a koh'e tene, i a kur'e i a mand'e bai.

⁵I El a bisa nan: "Kual di boso, si su yu of su buey kai den pos, lo no sak'e mesora riba dia di Sabat?"

⁶I nan no por a kontesta riba esaki.

⁷I ora ku El a ripara kon e invitadonan tabata skohe e luganan di onor na mesa, El a kuminsa konta nan un parabola, bisando:

⁸"Ora ku un hende invitabo pa un fiesta di kasamentu, no bai sinta na e luga di onor, pa no sosode ku el a invita un hende mas distingui ku bo,

⁹i esun ku a invita boso tur dos bin bisabo: 'Traha luga pa e homber aki'; i e ora ei abo, ku berguensa, bai tuma e ultimo luga.

¹⁰Ma ora bo wordu invita, bai sinta na e ultimo luga, pa ora ku esun ku a invitabo bin, e bisabo: 'Amigu, subi bai mas ariba'; e ora ei lo bo wordu onra den bista di tur esnan ku ta na mesa huntu ku bo.

¹¹Pasobra ken ku halsa su mes lo wordu umiya, i esun ku umiya su mes lo wordu halsa."

¹²I tambe El a bisa esun ku a invit'E: "Ora bo tene un komementu merdia of anochi, no invita bo amigunan, ni bo rumannan, ni bo famianan, ni bisinanan riku, pa nan tambe, na nan turno, no invitabo i bo hana bo pago bek.

¹³Ma ora bo tene un bankete, invita e pobernan, e mankaronnan, e lamnan, i e siegunan,

¹⁴i lo bo ta bendishona, pasobra nan no tin manera pa pagabo bek; pasobra lo bo wordu paga bek na e resurekshon di e hustunan."

¹⁵I ora ku un di esnan ku tabata sinta na mesa huntu kuné a tende esaki, el a bis'E: "Bendishona ta tur esnan ku lo kome pan den e reino di Dios!"

¹⁶Ma El a bis'e: "Un homber tabata tene un bankete grandi, i el a invita hopi hende;

¹⁷i na ora di kome el a manda su esklabu pa bisa esnan ku a wordu invita: 'Bin, pasobra tur kos ta kla awor.'

¹⁸"Ma nan tur a kuminsa diskulpa nan mes. Esun di prome a bis'e: 'Mi a kumpra pida tereno i mi mester sali bai wak e; mi ta pidibo despensami.'

¹⁹"I un otro a bisa: 'Mi a kumpra sinku yugo di buey i mi ta bai test nan; mi ta pidibo despensami.'

²⁰"I un otro a bisa: 'Mi a kaba di kasa i pa e motibu ei mi no por bin.'

²¹"I e esklabu a bolbe i a konta su shon esaki. E ora ei e kabes di kas a rabia i a bisa su esklabu: 'Sali bai mesora den e kayanan i hanchinan di stat i trese akiden e pobernan, e mankaronnan, e siegunan i e lamnan.'

²²"I e esklabu a bisa: 'Mi shon, loke bo a ordena a wordu hasi, i ainda tin mas luga.'

²³"I e shon a bisa e esklabu: 'Bai na tur e kamindanan grandi i banda di e serkanan, i obliga nan drenta, pa mi kas por ta yen.

²⁴Pasobra mi ta bisa boso, ningun di e hombernan ei ku a wordu invita lo no purba mi kuminda.'"

²⁵Awor multitutnan grandi tabata kana huntu kuné; i El a drai wak i a bisa nan:

²⁶"Si un hende bin serka Mi, i no odia su tata i mama i esposa i yunan i ruman hombernan i ruman muhenan, si, asta su mes bida, e no por ta Mi disipel.

²⁷Esun ku no karga su krus i bin Mi tras no por ta Mi disipel.

²⁸"Pasobra kual di boso, ora ku e kier traha un toren, no ta sinta kalkula e gastunan prome, pa mira si e tin sufisiente pa kab'e?

²⁹Sino, ora ku el a pone fundeshi i no por kab'e, tur ku mira esaki lo kuminsa hasi bofon di dje,

³⁰bisando: 'E homber aki a kuminsa konstrui i no tabata por a kaba.'

³¹"Of kual rei, ora ku e ta sali pa bai guera kontra un otro rei, lo no sinta pensa bon prome si e ta sufisiente fuerte ku dies mil, pa enfrenta esun ku ta bin kontra dje ku binti mil?

³²Of si e no por, e ta manda un delegashon, mientras ku e otro ta leu ainda, i ta pidi kondishonnan di pas.

³³Asina anto, ningun di boso ku no ta renunsia tur loke e tin no por ta Mi disipel.

³⁴"Pesei, salu ta bon; ma asta salu, si e perde smak, ku kiko lo e wordu sasona?

³⁵E no ta sirbi ni pa tera ni pa seru di mest; nan ta tir'e afo. "Esun ku tin orea pa tende, lagu'e tende."