Read Papantla Totonac Lukas 15 Bible Online

Lukas 15 - Papantla Totonac bible

Lukas 15

¹Awor tur e publikanonan i e pekadonan tabata bin serka djé pa skuch'E.

²I tantu e fariseonan komo e eskribanan a kuminsa murmura, bisando: "E homber aki ta risibi pekado i ta kome huntu ku nan."

³I El a konta nan e parabola aki, bisando:

⁴"Kual di boso ku tin shen karne i a perde un di nan no ta laga e nobent'i nuebenan den sabana, i ta bai buska esun perdi, te ora ku e han'e?

⁵I ora ku e han'e, yen di goso e ta pon'e riba su skouder.

⁶I ora ku e yega kas e ta yama su amigunan i su bisinanan huntu, i ta bisa nan: 'Regosiha huntu ku mi, pasobra mi a hana mi karne ku a perde!'

⁷Mi ta bisa boso ku asina tambe lo tin mas goso den shelu pa un pekado ku repenti, ku pa nobent'i nuebe hende hustu ku no tin mester di repentimentu.

⁸"Of kual muhe ku tin dies moneda di plata, si e perde un di nan, no ta sende un lampi i ta bari kas buska kuidadosamente te ora ku e han'e?

⁹I ora ku e han'e e ta yama su amiganan i su bisinanan huntu, bisando: 'Regosiha huntu ku mi, pasobra mi a hana e moneda ku mi a perde!'

¹⁰Asina tambe Mi ta bisa boso, tin goso den presensia di e angelnan di Dios pa un pekado ku repenti."

¹¹I El a bisa: "Un homber tabatin dos yu homber;

¹²i esun mas chikitu di nan dos a bisa su tata: 'Tata, dunami e parti di e erensia ku ta tokami.' I el a parti su rikesa entre nan.

¹³"I un par di dia despues e yu homber mas chikitu a piki tur loke ku e tabatin i a biaha bai pa un tera leu, i ayanan el a malgasta su erensia, hibando un bida di paranda.

¹⁴I despues ku el a kaba di malgasta tur kos, a bin un hamber pisa den e tera ei, i el a kuminsa pasa nesesidat.

¹⁵I el a bai i a pidi trabou serka un di e siudadanonan di e tera ei, i esaki a mand'e den su kunukunan pa kuida porko.

¹⁶I e tabatin gana di yena su barika ku e kaskanan ku e porkonan tabata kome, i ningun hende no tabata dun'e nada.

¹⁷"Ma ora ku el a realisa den ki situashon e tabata, el a bisa: 'Kuantu trahado kontrata di mi tata tin pan na abundansia, anto ami ta muri akinan di hamber!

¹⁸Lo mi lanta i bai serka mi tata, i lo mi bis'e: "Tata, mi a peka kontra shelu i den bo bista;

¹⁹mi no ta digno mas pa wordu yama bo yu; hasimi manera un di bo trahadonan kontrata."'

²⁰I el a lanta i a bai serka su tata. "Ma ora ku e tabata hopi leu ainda, su tata a mir'e i a sinti kompashon p'e, i a kore bai bras'e, i a sunch'e.

²¹"I e yu a bis'e: 'Tata, mi a peka kontra shelu i den bo bista; mi no ta digno mas pa wordu yama bo yu.'

²²"Ma e tata a bisa su esklabunan: 'Pura trese e pana di mas miho i pon'e na su kurpa, i pone un renchi na su man i sandalia na su pia;

²³i trese e bishe gorda, mat'e, i laga nos kome i fiesta;

²⁴pasobra e yu di mi aki tabata morto i a bolbe biba; e tabata perdi, i a wordu hana.' I nan a kuminsa fiesta.

²⁵"Awor su yu mayo tabata na kunuku, i ora ku el a bin i tabata aserka e kas, el a tende muzik i baliamentu.

²⁶I el a yama un di e sirbidonan serka dje i a puntr'e kiko e kosnan aki ta nifika.

²⁷I esaki a bis'e: 'Bo ruman a bin, i bo tata a mata e bishe gorda, pasobra el a han'e bek sano i salvo.'

²⁸"Ma e yu mayo a rabia, i no kier a drenta; i su tata a sali i a rogu'e pa drenta.

²⁹Ma el a kontesta i a bisa su tata: 'Mira! Mi a sirbibo pa asina tantu ana, i nunka mi a keda sin obedese un ordu di bo; i tog nunka bo no a dunami un yu di kabritu pa mi fiesta ku mi amigunan;

³⁰ma ora ku e yu homber di bo aki a bin, kende a malgasta bo plaka ku prostituta, bo a mata e bishe gorda p'e.'

³¹"I el a bis'e: 'Mi yu, abo tabata semper serka mi, i tur loke mi tin ta di bo.

³²Ma nos mester a fiesta i regosiha, pasobra e ruman homber di bo aki tabata morto i el a bolbe biba, i e tabata perdi i a wordu hana.'"