Read Papantla Totonac Lukas 16 Bible Online

Lukas 16 - Papantla Totonac bible

Lukas 16

¹I tambe El a bisa Su disipelnan: "Tabatin un homber riku ku tabatin un mayordomo, i di esei nan a bis'e ku e tabata malgasta su propiedatnan.

²I el a yam'e i a bis'e: 'Ta kiko e kos aki ku mi ta tende di bo? Duna kuenta di bo mayordomia, pasobra bo no por ta mayordomo mas.'

³"I e mayordomo a bisa den su mes: 'Kiko lo mi hasi? Pasobra mi shon ta kita e mayordomia for di mi. Pa koba tera mi no tin basta forsa; pa pidi limosna mi tin berguensa.

⁴Mi sa kiko lo mi hasi, pa ora mi puesto di mayordomo wordu kita for di mi nan risibimi den nan kasnan.'

⁵"I el a manda yama kada un di e debedonan di su shon, i el a bisa esun di prome: 'Kuantu bo ta debe mi shon?'

⁶"I el a kontesta: 'Shen midi di zeta.' "I el a bis'e: 'Kohe bo papel di debe i sinta lihe skirbi sinkuenta.'

⁷"E ora ei el a bisa esun di dos: 'I kuantu abo ta debe?' "I el a kontesta: 'Shen midi di trigo.' "El a bis'e: 'Kohe bo papel di debe i skirbi ochenta.'

⁸"I e shon a gaba e mayordomo inhustu, pasobra el a trata ku astusia; pasobra e yunan di e siglo aki ta mas astuto relashona ku nan mes sorto ku e yunan di lus.

⁹I Mi ta bisa boso, gana amigu pa boso mes pa medio di e rikesa di inhustisia, pa ora esei faya, nan risibi boso den e habitashonnan eterno.

¹⁰"Esun ku ta fiel den un kos masha chikitu, ta fiel tambe den hopi; i esun ku ta inhustu den un kos masha chikitu, ta inhustu tambe den hopi.

¹¹Si boso anto no tabata fiel den e uzo di rikesa inhustu, ken lo konfia boso ku e berdadero rikesa?

¹²I si boso no tabata fiel den e uzo di loke ta di otro hende, ken lo duna boso loke ta di boso mes?

¹³"Ningun sirbido no por sirbi dos shon; pasobra of e lo odia esun i stima e otro, of e lo ta leal na esun i despresia e otro. Boso no por sirbi Dios i rikesa."

¹⁴Awor e fariseonan, kendenan tabata stimado di plaka, tabata skucha tur e kosnan aki, i nan tabata hasi bofon di djé.

¹⁵I El a bisa nan: "Boso ta esnan ku ta hustifika boso mes den bista di hende, ma Dios konose boso kurason; pasobra loke ta di masha hopi balor pa hende ta abominabel den bista di Dios.

¹⁶"E Lei i e Profetanan a wordu proklama te na Juan; for di e tempu ei e evangelio di e reino di Dios ta wordu predika, i tur hende ta forsa drenta den dje.

¹⁷Ma ta mas fasil pa shelu i tera pasa ku pa un tilde di e Lei faya.

¹⁸"Ken ku diborsia su esposa i kasa ku un otro ta komete adulterio; i esun ku kasa ku un muhe diborsia di su esposo ta komete adulterio.

¹⁹"Awor tabatin un homber riku, i semper e tabata bisti na purpura i pana di lino fini, i tabata gosa di un bida di luho tur dia.

²⁰I un homber pober, ku yama Lazaro, a wordu poni na su porta, tur na yaga,

²¹i tabatin gana di kome e garnachinan ku tabata kai for di mesa di e homber riku; i asta e kachonan tabata bin lembe su yaganan.

²²"Awor a sosode ku e homber pober a muri i el a wordu hiba dor di e angelnan den skochi di Abraham; i e homber riku tambe a muri i a wordu dera.

²³I den fiernu el a hisa kara wak, siendo den tormento, i a mira Abraham djaleu, i Lazaro den su skochi.

²⁴I el a grita bisa: 'Tata Abraham, tene miserikordia di mi, i manda Lazaro pa e dop punta di su dede den awa i freska mi lenga; pasobra mi ta sufri agonia den e flam di kandela aki.'

²⁵"Ma Abraham a bisa: 'Mi yu, korda ku durante di bo bida bo a risibi kosnan bon, mientras ku Lazaro a risibi kosnan malu; ma awor e ta wordu konsola akinan, i abo ta den agonia.

²⁶I fuera di tur esaki, entre nos ku boso tin un presipisio grandi, asina ku esnan ku kier pasa for di akinan bai serka boso, no por, ni ningun hende no por krusa pasa for di einan bin serka nos.'

²⁷"I el a bisa: 'Anto mi ta rogabo, Tata, pa bo mand'e na kas di mi tata--

²⁸pasobra mi tin sinku ruman homber--pa e spierta nan, pa nan tambe no bin na e luga di tormento aki.'

²⁹"Ma Abraham a bisa: 'Nan tin Moises i e Profetanan; laga nan tende nan.'

³⁰"I el a bisa: 'No, Tata Abraham, ma si un hende for di e mortonan bai serka nan, nan lo repenti!'

³¹"Ma Abraham a bis'e: 'Si nan no skucha na Moises i e Profetanan, nan lo no wordu konvensi tampoko maske un hende lanta for di e mortonan.'"