Read Papantla Totonac Lukas 17 Bible Online

Lukas 17 - Papantla Totonac bible

Lukas 17

¹I El a bisa Su disipelnan: "Ta inevitabel ku tentashonnan lo bin, ma ai di esun pa medio di kende nan ta bin!

²Lo tabata miho p'e si un piedra-di-mulina a wordu kologa na su garganta i el a wordu tira den laman, ku si e mester hasi un di e chikitunan aki trompeka.

³Tene kuidou! "Si bo ruman peka, reprend'e; i si e repenti, pordon'e.

⁴I si e peka shete biaha pa dia kontra bo, i bolbe serka bo shete biaha, bisando: 'Mi ta repenti,' pordon'e."

⁵I e apostelnan a bisa Senor: "Oumenta nos fe!"

⁶I Senor a bisa: "Si boso tabatin fe manera un simia di moster, boso lo a bisa e palu di sikamor aki: 'Sea ranka ku rais ku tur i sea planta den laman'; i esei lo a obedese boso.

⁷"Ma kual di boso ku tin un esklabu ku ta plug of ku ta kuida karne, ora ku e yega di kunuku lo bis'e: 'Bin mesora i sinta na mesa kome'?

⁸Ma lo e no bis'e: 'Prepara algu pa mi kome, i faha bo mes i sirbimi te ora ku ami a kaba di kome i bebe; i despues abo por kome i bebe'?

⁹E no ta gradisi e esklabu pasobra el a hasi loke el a wordu ordena pa hasi, no t'asina?

¹⁰Asina boso tambe, ora boso hasi tur loke boso a wordu ordena, bisa: 'Nos ta esklabunan inutil; nos a hasi solamente loke nos mester a hasi.'"

¹¹I a sosode ku mientras E tabata na kaminda pa Jerusalem, Jesus tabata pasa entre Samaria i Galilea.

¹²I ora ku El a drenta den un sierto pueblito, dies homber leproso, ku tabata para na un distansia, a bin kontr'E;

¹³i nan a halsa nan bos, bisando: "Jesus, Maestro, tene miserikordia di nos!"

¹⁴I ora ku El a mira nan, El a bisa nan: "Bai i mustra boso mes na e saserdotenan." I a sosode ku ora nan tabata bai, nan a bira limpi.

¹⁵Awor un di nan, ora ku el a mira ku el a wordu kura, a bolbe, glorifikando Dios na bos haltu,

¹⁶i el a tira su kurpa abou ku su kara te na suela na pia di Jesus, i a duna gradisimentu na djé. I esaki tabata un samaritano.

¹⁷I Jesus a kontesta i a bisa: "No ta dies a wordu hasi limpi? Awor e nuebenan, unda nan ta?

¹⁸No tabatin ni un otro ku a bolbe pa duna gloria na Dios, sino e stranhero aki so?"

¹⁹I El a bis'e: "Lanta i bai; bo fe a salbabo."

²⁰Awor ora ku e fariseonan a puntr'E tokante di ki tempu e reino di Dios lo a bin, El a kontesta nan i a bisa: "E reino di Dios no ta bin ku senalnan ku por wordu mira;

²¹tampoko hende lo no bisa: 'Mira, at'e aki!' of: 'At'e aya!' Pasobra ata e reino di Dios ta meimei di boso."

²²I El a bisa e disipelnan: "E dianan lo bin ku boso lo anhela pa mira un di e dianan di e Yu di Hende, i boso lo no mira esei.

²³I nan lo bisa boso: 'Mir'aki! Mir'aya!' No bai, i no kore nan tras.

²⁴Pasobra meskos ku lamper, ora ku e ta korta for di un parti di shelu, ta lusa te na e otro parti di shelu, asina e Yu di Hende lo ta den Su dia.

²⁵Ma prome E mester sufri hopi kos i wordu rechasa dor di e generashon aki.

²⁶"I meskos ku a sosode den e dianan di Noe, asina lo ta tambe den e dianan di e Yu di Hende:

²⁷nan tabata kome, nan tabata bebe, nan tabata kasa, nan tabata wordu duna pa kasa, te na e dia ku Noe a drenta e arka, i e diluvio a bin i a destrui nan tur.

²⁸"Tabata meskos ku a sosode den e dianan di Lot: nan tabata kome, nan tabata bebe, nan tabata kumpra, nan tabata bende, nan tabata planta, nan tabata traha kas;

²⁹ma riba e dia ku Lot a sali for di Sodoma a yobe kandela i swafel for di shelu i a destrui nan tur.

³⁰"Lo ta meskos riba e dia ku e Yu di Hende wordu revela.

³¹Riba e dia ei no laga esun ku ta riba dak, i kende su biennan ta den kas, baha pa kohe nan bai ku nan; i meskos, no laga esun ku ta den kunuku bai bek.

³²Korda riba Lot su esposa.

³³Ken ku buska pa salba su bida lo perd'e, i ken ku perde su bida lo preserv'd.

³⁴Mi ta bisa boso, riba e anochi ei lo tin dos hende riba un kama; un lo wordu tuma i e otro lo keda.

³⁵Lo tin dos muhe ta mula na e mesun luga; un lo wordu tuma i e otro lo wordu laga atras.

³⁶[Dos homber lo ta den kunuku; un lo wordu tuma i e otro lo wordu laga atras."]

³⁷I nan a kontesta i a bis'E: "Unda, Senor?" I El a bisa nan: "Kaminda e kadaver ta, einan e aguilanan tambe lo reuni."