Read Papantla Totonac Lukas 18 Bible Online

Lukas 18 - Papantla Totonac bible

Lukas 18

¹Awor E tabata konta nan un parabola pa mustra nan ku nan mester hasi orashon tur ora bai i no desmaya,

²bisando: "Den un sierto stat tabatin un hues ku no tabatin temor pa Dios, ni respet pa hende.

³I tabatin un biuda den e stat ei ku tur ora bai tabata bin serka dje, bisando: 'Hasi hustisia pa mi kontra mi atversario.'

⁴"I pa un tempu e no tabata kier; ma despues el a bisa den su mes: 'Maske mi no tin temor pa Dios, ni respet pa hende,

⁵tog, pasobra e biuda aki ta molestiami, lo mi hasi hustisia p'e, pa e no kansami dor di bin kada bes asina.'"

⁶I Senor a bisa: "Tende loke e hues inhustu a bisa;

⁷awor Dios lo no hasi hustisia na Su skohinan ku ta sklama na djé di dia i anochi, i lo E tarda pa kontesta nan?

⁸Mi ta bisa boso ku E lo hasi hustisia pronto pa nan. Sinembargo, ora ku e Yu di Hende bin, lo E hana fe riba mundu?"

⁹I tambe El a konta e parabola aki na sierto hendenan ku tabata konfia den nan mes ku nan tabata hustu, i tabata wak otronan ku menospresio:

¹⁰"Dos homber a bai den tempel pa hasi orashon; esun tabata un fariseo i e otro un publikano.

¹¹E fariseo a lanta para i tabata hasi orashon asin'aki den su mes: 'Dios, mi ta gradisiBo ku mi no ta manera e otro hendenan: ladron, inhustu, adultero, ni tampoko manera e publikano aki.

¹²Mi ta yuna dos biaha pa siman; mi ta duna e di dies parti di tur mi entrada.'

¹³"Ma e publikano, para na un distansia, no kier a hisa ni su wowo na shelu, ma tabata bati riba su pechu, bisando: 'Dios, tene miserikordia di mi, pekado!'

¹⁴"Mi ta bisa boso, e homber aki, kontrario di e otro, a bai su kas hustifika; pasobra ken ku halsa su mes lo wordu umiya, ma esun ku umiya su mes lo wordu halsa."

¹⁵I nan tabata trese nan yunan chikitu serka djé pa E pone man riba nan; ma ora e disipelnan a mira esaki, nan a kuminsa reprende nan.

¹⁶Ma Jesus a yama nan, bisando: "Laga e muchanan bin serka Mi, i no stroba nan, pasobra e reino di Dios ta pertenese na esnan manera esakinan.

¹⁷Di berdat Mi ta bisa boso, esun ku no risibl e reino di Dios manera un mucha lo no drenta den dje."

¹⁸I un gobernante a puntr'E: "Bon Maestro, kiko mi mester hasi pa ereda bida eterno?"

¹⁹I Jesus a bis'e: "Pakiko bo ta yamaMi bon? Ni un hende no ta bon sino Dios so.

²⁰Bo konose e mandamentunan: 'No komete adulterio; no mata; no horta; no duna testimonio falsu; onra bo tata i bo mama.'"

²¹I el a bisa: "Tur e kosnan aki mi a warda for di mi hubentut."

²²I ora Jesus a tende esaki, El a bis'e: "Un kos bo falta ainda; bende tur bo propiedatnan, i partie pa hende pober, i lo bo tin tesoro den shelu; i bin, siguiMi."

²³Ma ora ku el a tende e kosnan aki, el a bira masha tristu, pasobra e tabata masha riku mes.

²⁴I Jesus a wak e i a bisa: "Ki difisil ta pa esnan ku ta riku drenta e reino di Dios!

²⁵Pasobra ta mas fasil pa un kamel pasa dor di wowo di un angua, ku pa un hende riku drenta e reino di Dios."

²⁶I esnan ku a tende esaki a puntra: "Ta ken por wordu salba anto?"

²⁷Ma El a bisa: "E kosnan imposibel pa hende ta posibel pa Dios."

²⁸I Pedro a bisa: "Mira, nos a bandona loke ta di nos, i a siguiBo."

²⁹I El a bisa nan: "Di berdat Mi ta bisa boso, no tin ningun hende ku a bandona kas of esposa of ruman hombernan of mayornan of yunan, pa kousa di e reino di Dios,

³⁰ku lo no risibl hopi bes mas tantu den e tempu aki, i den e siglo ku ta bin, bida eterno."

³¹I El a hala e diesdosnan un banda i a bisa nan: "Mira, nos ta bai Jerusalem, i tur kos ku ta skirbi pa medio di e profetanan tokante di e Yu di Hende lo wordu kumpli.

³²Pasobra E lo wordu entrega na e paganonan, i lo wordu bofona i maltrata i skupi.

³³I nan lo sut'E i mat'E. I riba e di tres dia E lo lanta for di morto."

³⁴I nan no a komprende ningun di e kosnan aki, i e palabranan aki tabata skondi pa nan, i nan no a komprende e kosnan ku a wordu bisa.

³⁵I a sosode ku ora E tabata aserkando Jeriko tabatin un homber siegu sinta kantu di kaminda ta pidi limosna.

³⁶I ora ku el a tende un multitut ta pasa, el a puntra kiko esaki por ta.

³⁷I nan a bis'e ku Jesus di Nazaret tabata pasa.

³⁸I el a grita bisa: "Jesus, Yu di David, tene miserikordia di mi!"

³⁹I esnan ku tabata bai dilanti tabata rous e mand'e keda ketu; ma el a grita mas duru ainda: "Yu di David, tene miserikordia di mi!"

⁴⁰I Jesus a keda para i a ordena pa tres'e serka djé; i ora ku el a yega serka, El a puntr'e:

⁴¹"Kiko bo kier pa Mi hasi pa bo?" I el a bisa: "Senor, mi kier rekobra mi bista!"

⁴²I Jesus a bis'e: "Risibi bo bista; bo fe a salbabo."

⁴³I mesora el a rekobra su bista i a siguié, glorifikando Dios. I ora tur e hendenan a mira esaki, nan a duna alabansa na Dios.