Read Papantla Totonac Lukas 19 Bible Online

Lukas 19 - Papantla Totonac bible

Lukas 19

¹I Jesus a drenta Jeriko i tabata pasa dor di e stat.

²I mira, tabatin un homber ku yama Zakeo, i esaki tabata un kabesante di e publikanonan, i e tabata riku.

³I e tabata trata di mira ken Jesus tabata, i e no tabata por pa motibu di e multitut, pasobra e tabata un homber kortiku.

⁴I el a kore bai dilanti i a subi den un palu di sikamor pa por a mir'E, pasobra E tabata bai pasa pa e kaminda ei.

⁵I ora Jesus a yega na e luga ei, El a wak ariba i a bis'e: "Zakeo, bah'abou lihe, pasobra awe Mi mester keda na bo kas."

⁶I el a bah'abou lihe, i a risibié ku alegria.

⁷I ora nan a mira esaki, nan tur a kuminsa murmura, bisando: "El a bai hospeda serka un homber pekado."

⁸Ma Zakeo a lanta para i a bisa Senor: "Mira, Senor, mitar di mi biennan lo mi duna na pober, i si mi a defrouda kualkier hende den algu, lo mi debolbe kuater bes mas tantu."

⁹I Jesus a bis'e: "Awe salbashon a bin na e kas aki, pasobra e tambe ta un yu di Abraham.

¹⁰Pasobra e Yu di Hende a bin pa buska i salba loke tabata perdi."

¹¹I mientras nan tabata skucha e kosnan aki, El a konta un otro parabola, pasobra E tabata serka di Jerusalem, i nan tabata supone ku e reino di Dios tabata bai manifesta su mes unbes.

¹²Pesei El a bisa: "Un homber nobel a bai un tera leu pa risibi un reino pa su mes i despues bolbe.

¹³I el a yama dies di su esklabunan i a duna nan dies mina i a bisa nan: 'Hasi negoshi te ora mi bin bek.'

¹⁴"Ma su konsiudadanonan tabata odi'e, i a manda un delegashon su tras, bisando: 'Nos no kier pa e homber aki reina riba nos.'

¹⁵"I a sosode ku ora el a bolbe, despues di a risibi e reino, el a duna ordu pa yama e esklabunan aki, na kendenan el a duna e plaka, pa bin serka dje pa e por a hana sa kuantu kada un a gana dor di negosha.

¹⁶"I esun di prome a bin i a bisa: 'Maestro, bo mina a gana dies mina mas.'

¹⁷"I el a bis'e: 'Hopi bon, mi bon esklabu; pasobra bo tabata fiel den un kos masha chikitu, tuma outoridat riba dies stat.'

¹⁸"I e di dos a bin i a bisa: 'Senor, bo mina a gana sinku mina.'

¹⁹"I el a bisa esaki tambe: 'I abo lo manda riba sinku stat.'

²⁰"I un otro a bin i a bisa: 'Senor, ata bo mina ku mi a tene warda den un lensu;

²¹pasobra mi tabatin miedu di bo, komo ku bo ta un hende severo; bo ta tuma loke bo no a pone, i ta kosecha loke bo no a sembra.'

²²"El a bis'e: 'Segun bo mes palabranan lo mi huzgabo, abo, esklabu malbado. Bo tabata sa ku mi ta un hende severo ku ta tuma loke mi no a pone i ku ta kosecha loke mi no a sembra.

²³Pakiko anto bo no a pone e plaka na banko, pa ora mi bin mi lant'e ku interes?'

²⁴"I el a bisa esnan ku tabata para einan: 'Kita e mina for di dje, i dun'e na esun ku tin e dies minanan.'

²⁵"I nan a bis'e: 'Maestro, e tin dies mina kaba.'

²⁶"Mi ta bisabo, ku na kada un ku tin, mas lo wordu duna, ma for di esun ku no tin, asta loke e tin lo wordu kita for di dje.

²⁷Ma e enemigunan di mi aki ku no tabata kier pa mi reina riba nan, trese nan akinan i mata nan mi dilanti."

²⁸I despues ku El a bisa e kosnan aki, E tabata bai nan dilanti, subiendo pa bai Jerusalem.

²⁹I a sosode ku ora E tabata yega serka di Betfage i Betania, pega ku e seru ku yama Oleifi, El a manda dos di Su disipelnan,

³⁰bisando: "Bai den e pueblito ku ta keda enfrente di boso, i asina ku boso drenta den dje boso lo hana un yu di buriku mara, ku nunka ni un hende no a sinta riba dje ainda; los e i tres'e akinan.

³¹I si un hende puntra boso: 'Pakiko boso ta los e?' boso mester kontesta asina: 'Senor tin mester di dje.'"

³²I esnan ku a wordu manda a bai, i a han'e manera ku El a bisa nan.

³³I ora nan tabata los e yu di buriku, su dononan a bisa nan: "Pakiko boso ta los e yu di buriku?"

³⁴I nan a bisa: "Senor tin mester di dje."

³⁵I nan a tres'e pa Jesus, i nan a tira nan mantelnan riba e yu di buriku, i a pone Jesus sinta riba dje.

³⁶I segun ku E tabata sigui bai, nan tabata habri nan mantelnan riba kaminda.

³⁷I segun ku E tabata yega mas serka, pega ku e bahada di Seru di Oleifi, henter e multitut di disipelnan a kuminsa alaba Dios yen di goso i na bos haltu pa tur e milagernan ku nan a mira,

³⁸bisando: "Bendishona ta e Rei ku ta bin den e nomber di SENOR;" "Pas den shelu i gloria den e halturanan!"

³⁹I algun di e fariseonan den e multitut a bis'E: "Maestro, reprende Bo disipelnan."

⁴⁰I El a kontesta i a bisa: "Mi ta bisa boso, si esakinan keda ketu, e piedranan lo grita!"

⁴¹I ora ku El a yega mas serka i a mira e stat, El a yora pa su motibu,

⁴²bisando: "Ai, si bo tabata sa riba e dia aki, abo mes, kiko ta trese pas pa bo!

⁴³Ma awor nan ta skondi pa bo Pasobra e dianan lo bin pa bo ku bo enemigunan lo lanta un baluarte ront di bo, i rondonabo i serabo aden di i bashabo abou na suela i bo yunan denter di bo,

⁴⁴i nan lo no laga den bo ni un piedra riba otro, pasobra bo no a korda e tempu ku Dios a bishitabo."

⁴⁵I El a bai den tempel i a kuminsa kore ku esnan ku tabata bende, saka nan afo,

⁴⁶bisando nan: "Ta para skirbi: 'Mi kas lo ta un kas di orashon,' ma boso a hasie un kueba di ladron."

⁴⁷I E tabata sina hende tur dia den tempel; ma e saserdotenan prinsipal i e eskribanan i e kabesantenan di e pueblo tabata buska pa destruié,

⁴⁸ma nan no por a hana nada ku nan por a hasi, pasobra henter e pueblo tabata skucha Su palabranan ku masha atenshon.