Read Papantla Totonac Lukas 2 Bible Online

Lukas 2 - Papantla Totonac bible

Lukas 2

¹Awor a sosode den e dianan ei ku Cesar Augusto a saka un dekreto, ku mester a tene un senso di henter e mundu habita.

²E senso aki a tuma luga pa prome biaha tempu ku Sirenio tabata gobernado di Siria.

³I tur hende tabata bai pa wordu registra pa e senso, kada un na su mes stat.

⁴I Jose tambe a sali for di Galilea, for di e stat Nazaret, pa bai Judea, na e stat di David ku yama Betlehem, pasobra e tabata di e kas i famia di David,

⁵pa wordu registra huntu ku Maria, kende tabata komprometi kune i tabata spera yu.

⁶I a sosode ku mientras nan tabata ayanan, e dianan a keda kumpli pa e duna lus.

⁷I el a duna lus na su yu homber primogenito; i el a lor'E den pana i a pon'E den un pesebre, pasobra no tabatin luga pa nan den posada.

⁸I den e mesun region tabatin wardadonan ku tabata keda den e sabananan, i ku anochi tabata tene warda riba nan tou di karne.

⁹I direpiente un angel di Senor a presenta nan dilanti, i e gloria di Senor tabata resplandese tur ront di nan; i nan a spanta masha.

¹⁰I e angel a bisa nan: "No tene miedu; pasobra mira, mi ta trese bon nobo di gran goso pa boso ku lo ta pa henter e pueblo;

¹¹pasobra awe den e stat di David a nase pa boso un Salbador, Kende ta Cristo e Senor.

¹²I esaki lo ta e senal pa boso: boso lo hana un bebi lora den pana, i drum! den un pesebre."

¹³I direpiente a parese huntu ku e angel un multitut di e ehersito selestial, dunando alabansa na Dios i bisando:

¹⁴"Gloria na Dios den halturanan, i na tera pas meimei di hende ku ta agrad'E."

¹⁵I a sosode ku ora e angelnan a laga nan i a bai shelu, e wardadonan a kuminsa bisa otro: "Laga nos bai Betlehem awor i mira e kos aki ku a sosode i ku Senor a partisipa na nos."

¹⁶I nan a bai pura i a hana Maria i Jose, i e bebi ku tabata drum! den pesebre.

¹⁷I ora nan a mira esaki, nan a partisipa loke a wordu bisa na nan tokante di e Yu aki.

¹⁸I tur ku a tende esaki a keda strana di e kosnan ku e wardadonan a konta nan.

¹⁹Ma Maria a warda tur e kosnan aki, i a keda pensa riba nan den su kurason.

²⁰I e wardadonan a bai bek, glorifikando i alabando Dios pa tur loke nan a tende i mira, manera a wordu konta na nan.

²¹I riba e di ocho dia, ora ku a bira tempu pa sirkumsid'E, nan a dun'E e nomber Jesus, manera e angel a yam'E prome ku El a wordu konsebi den matris.

²²I ora ku e dianan di nan purifikashon, di akuerdo ku e lei di Moises, a keda kumpli, nan a hib'E Jerusalem pa present'E na Senor

²³(manera ta para skirbi den e Lei di Senor: "Tur yu homber primogenito ku habri matris lo wordu yama santu pa SENOR"),

²⁴i pa ofrese un sakrifisio di akuerdo ku loke a wordu bisa den e Lei di Senor: "Dos tortelduif of dos pichon."

²⁵I mira, tabatin un homber na Jerusalem ku yama Simeon; i e homber aki tabata hustu i deboto i tabata spera e konsolashon di Israel; i Spiritu Santu tabata riba dje.

²⁶I a wordu revela na dje dor di Spiritu Santu ku e lo no mira morto prome ku el a mira e Cristo di Senor.

²⁷I movi dor di e Spiritu el a bai den tempel; i ora ku e mayornan a trese e yu Jesus, pa hasi kuné segun e kustumber di Lei,

²⁸el a tum'E den su brasanan, i el a bendishona Dios i a bisa:

²⁹"Awor Senor, Bo ta laga bo sirbido bai na pas, segun Bo palabra;

³⁰pasobra mi wowonan a mira Bo salbashon,

³¹ku Bo a prepara den presensia di tur pueblo,

³²un lus di revelashon pa e paganonan, i e gloria di Bo pueblo Israel."

³³I Su tata i mama a keda strana di e kosnan ku tabata wordu bisa di djé.

³⁴I Simeon a bendishona nan i a bisa Su mama Maria: "Mira, e Yu aki ta destina pa e kaida i pa e lantamentu di hopi hende na Israel i pa un senal ku lo wordu kontradisi--

³⁵i un spada lo traspasa asta bo mes alma--pa e pensamentunan di hopi kurason wordu revela."

³⁶I tabatin un profeta, Ana, yu muhe di Fanuel, di e tribu di Aser. E tabata di edat hopi avansa i el a biba shete ana ku su esposo despues di e dia di su matrimonio,

³⁷i despues komo biuda te na edat di ochent'i kuater ana. I nunka e no tabata sali for di tempel, i tabata sirbi di dia i anochi ku yunamentu i orashon.

³⁸I na e momento ei el a yega serka i a kuminsa duna gradisimentu na Dios, i a sigui papia di djé ku tur esnan ku tabata spera e redenshon di Jerusalem.

³⁹I ora nan a kumpli ku tur kos, di akuerdo ku e Lei di Senor, nan a bolbe Galilea, na nan mes stat Nazaret.

⁴⁰I e Mucha tabata krese i bira fuerte i a wordu yena ku sabiduria; i e grasia di Dios tabata riba djé.

⁴¹I tur ana Su mayornan tabata bai Jerusalem pa e Fiesta di Pasku.

⁴²I ora ku El a yega na edat di diesdos ana, nan a bai ayanan manera tabata e kustumber di e Fiesta;

⁴³i despues ku e dianan di e Fiesta a pasa, ora ku su mayornan tabata riba kaminda pa bai kas, e mucha Jesus a ked'atras na Jerusalem, sin ku nan a ripara.

⁴⁴Nan a kere ku E tabata den e grupo di biahero i nan a sigui pa un distansia di un dia di biahe; i nan a kuminsa busk'E entre nan famianan i konosinan.

⁴⁵I ora nan no a han'E, nan a bolbe Jerusalem pa busk'E.

⁴⁶I a sosode ku despues di tres dia nan a han'E den tempel, sinta meimei di e sinadonan, ta skucha nan i ta hasi nan pregunta.

⁴⁷I tur esnan ku a tend'E a keda strana di Su komprendementu i Su kontestanan.

⁴⁸I ora nan a mir'E, nan a keda asombra; i Su mama a bis'E: "Yu, pakiko Bo a hasi e kos aki ku nos? Mira, Bo tata i ami tabata buskaBo ansiosamente."

⁴⁹El a bisa nan: "Pakiko boso tabata buskaMi? Boso no tabata sa ku Mi mester tabata den e kas di Mi Tata?"

⁵⁰I nan no tabata komprende e palabranan ku E tabata papia ku nan.

⁵¹I El a bai ku nan i a yega Nazaret; i El a keda someti na nan; i Su mama tabata warda tur e palabranan aki den su kurason.

⁵²I Jesus tabata krese den sabiduria i estatura, i den grasia serka Dios i hende.