Read Papantla Totonac Lukas 20 Bible Online

Lukas 20 - Papantla Totonac bible

Lukas 20

¹I a sosode riba un di e dianan ei, ora ku E tabata sina e pueblo den tempel i predika evangelio, ku e saserdotenan prinsipal i e eskribanan, huntu ku e ansianonan, a bin konfront'E,

²i nan a papia kuné, bisando: "Bisa nos ku ki outoridat Bo ta hasi e kosnan aki, of ta ken ta esun ku a dunaBo e outoridat aki?"

³I El a kontesta i a bisa nan: "Ami tambe lo hasi boso un pregunta, i boso kontestaMi:

⁴E boutismo di Juan tabata for di shelu of for di hende?"

⁵I nan a delibera nan ku nan, bisando: "Si nos bisa: 'For di shelu,' E lo bisa: 'Pakiko boso no a ker'e?'

⁶Ma si nos bisa: 'For di hende,' henter e pueblo lo piedra nos mata, pasobra nan ta konvensi ku Juan tabata un profeta."

⁷I nan a kontesta ku nan no tabata sa for di unda esaki a bin.

⁸I Jesus a bisa nan: "Ami tampoko lo no bisa boso ku ki outoridat Mi ta hasi e kosnan aki."

⁹I El a kuminsa konta e pueblo e parabola aki: "Un homber a planta un kunuku di wendruif i a hur e ku kunukeronan i a bai hasi un biahe pa un tempu largu.

¹⁰I ora tempu di kosecha a yega, el a manda un esklabu serka e kunukeronan pa nan dun'e un parti di e frutanan di e kunuku di wendruif; ma e kunukeronan a batie i a mand'e bai man bashi.

¹¹I el a bolbe manda un otro esklabu, i nan a bati e tambe, a trat'e na un manera bergonsoso i a mand'e bai man bashi.

¹²I el a bolbe manda un di tres; i nan a herida esaki tambe, i a sak'e afo.

¹³"I dono di e kunuku di wendruif a bisa: 'Kiko lo mi hasi? Lo mi manda mi yu stima; kisas nan lo respet'e.'

¹⁴"Ma ora ku e kunukeronan a mir'e, nan a kuminsa delibera ku otro, bisando: 'Esaki ta e eredero; laga nos mat'e pa e erensia keda pa nos.'

¹⁵I nan a tir'e pafo di e kunuku di wendruif i a mat'e. "Kiko dono di e kunuku di wendruif lo hasi ku nan anto?

¹⁶E lo bin i destrui e kunukeronan aki i lo duna e kunuku di wendruif na otronan." I ora nan a tende esaki, nan a bisa: "Ku esei no sosode nunka!"

¹⁷Ma El a wak nan i a bisa: "Kiko ta nifika anto loke ta para skirbi aki: 'E piedra ku e trahadonan a rechasa, esaki a bira e piedra-di-skina prinsipal'?

¹⁸Ken ku kai riba e piedra ei lo wordu kibra na pida-pida, ma esun ku e kai riba dje, esei e lo plama manera stof."

¹⁹I e eskribanan i e saserdotenan prinsipal tabata buska na e mesun ora ei pa tira man riba djé, ma nan tabatin miedu di e pueblo, pasobra nan a komprende ku E tabata papia e parabola aki kontra nan.

²⁰I nan tabata ten'E na bista, i tabata manda spionnan, kendenan tabata pretende di ta hustu, pa nan por gar'E den Su palabranan, pa asina entregu'E na e poder i outoridat di gobernado.

²¹I nan a hasié pregunta, bisando: "Maestro, nos sa ku Bo ta papia i sina korektamente i Bo no ta hasi distinshon di persona, ma ta sina e kaminda di Dios den berdat.

²²Lei ta permiti nos paga belasting na Cesar, si of no?"

²³Ma El a komprende nan triki i a bisa nan:

²⁴"MustraMi un denario. Ken su imagen i inskripshon tin riba dje?" I nan a bisa: "Di Cesar."

²⁵I El a bisa nan: "Anto duna Cesar loke ta di Cesar, i Dios loke ta di Dios."

²⁶I nan no por a gar'E den Su palabranan den presensia di e pueblo; i nan a keda strana di Su kontesta i a keda ketu.

²⁷Awor algun di e saduseonan, ku ta bisa ku no tin resurekshon, a bin serka djé,

²⁸i nan a hasié pregunta, bisando: "Maestro, Moises a skirbi pa nos ku si un homber su ruman muri, i esaki tin un esposa, ma ni un yu, su ruman homber mester tuma e esposa i lanta desendiente pa su ruman.

²⁹Awor tabatin shete ruman homber; i e di prome a tuma un esposa i a muri sin laga ni un yu.

³⁰I e di dos

³¹i e di tres a tum'e; i di e mesun manera tur shete a muri, sin laga ni un yu.

³²Por ultimo e muhe tambe a muri.

³³Anto den e resurekshon, esposa di kual di nan lo e ta? Pasobra tur shete tabatin e komo esposa."

³⁴I Jesus a bisa nan: "E yunan di e siglo aki ta kasa i ta wordu duna pa kasa,

³⁵ma esnan ku wordu konsidera digno pa tin parti den e siglo ei i den e resurekshon for di e mortonan no ta kasa, ni ta wordu duna pa kasa;

³⁶pasobra nan no por muri mas tampoko, pasobra nan ta manera angel, i ta yunan di Dios, siendo yunan di resurekshon.

³⁷Ma ku e mortonan ta wordu lanta, esei Moises tambe a mustra den e Skritura tokante di e mata, kaminda e ta yama Senor e Dios di Abraham, i e Dios di Isaak, i e Dios di Jakob.

³⁸Awor E no ta e Dios di e mortonan, sino di e bibunan, pasobra pa E tur ta biba."

³⁹I algun di e eskribanan a kontesta i a bisa: "Maestro, Bo a papia bon."

⁴⁰Pasobra nan no tabata tribi hasié pregunta tokante di nada mas.

⁴¹I El a bisa nan: "Di kon nan ta bisa ku e Cristo ta yu di David?

⁴²Pasobra David mes ta bisa den e buki di Salmonan: 'SENOR a bisa mi Senor: "Sinta na Mi man drechi,

⁴³te ora Mi hasi Bo enemigunan un banki pa Bo pianan."'

⁴⁴Pesei, David ta yam'E 'Senor,' i di kon E por ta su yu?"

⁴⁵I mientras ku henter e pueblo tabata skucha, El a bisa e disipelnan:

⁴⁶"Warda boso di e eskribanan ku ta gusta kana ront ku pana largu bisti, i ku ta gusta saludonan di respet riba plasa, i e miho asientonan den snoa i e luganan di onor na bankete,

⁴⁷ku ta devora kas di biuda i ta hasi orashonnan largu pa bista di hende; esakinan lo risibi kondenashon mas pisa."