Read Papantla Totonac Lukas 22 Bible Online

Lukas 22 - Papantla Totonac bible

Lukas 22

¹Awor e Fiesta di Pan Sin Zurdeg, ku ta wordu yama Pasku, tabata aserkando.

²I e saserdotenan prinsipal i e eskribanan tabata buska kon nan por a laga mat'E; pasobra nan tabatin miedu di e pueblo.

³I Satanas a drenta den Judas, kende tabata wordu yama Iskariot, siendo un di e diesdosnan.

⁴I el a bai i a delibera ku e saserdotenan prinsipal i e ofisialnan kon e lo por a entregu'E na nan.

⁵I nan tabata kontentu i a kumbini pa dun'e plaka.

⁶I el a konsenti i a kuminsa buska un bon oportunidat pa entregu'E na nan ora ku e multitut no ta presente.

⁷Anto e dia di Pan Sin Zurdeg a yega, riba kual e lamchi di Pasku mester a wordu sakrifika.

⁸I El a manda Pedro i Juan, bisando: "Bai i prepara e Pasku pa nos, pa nos por kom'e."

⁹I nan a bis'E: "Unda Bo kier pa nos prepar'e?"

¹⁰I El a bisa nan: "Mira, ora boso drenta e stat, boso lo kontra ku un homber ku ta karga un purun di awa; siguie bai den e kas kaminda e drenta.

¹¹I boso lo bisa dono di e kas: 'E Maestro ta bisabo: "Unda e sala kaminda Mi tin di kome e Pasku huntu ku Mi disipelnan ta?"'

¹²I e lo mustra boso un sala grandi ariba, tur muebla; prepar'e ayanan."

¹³I nan a bai i a hana tur kos manera El a bisa nan; i nan a prepara e Pasku.

¹⁴I ora ku e momento a yega El a sinta na mesa, i e apostelnan huntu kuné.

¹⁵I El a bisa nan: "Mi a desea masha di kome e Pasku aki huntu ku boso prome ku Mi sufri;

¹⁶pasobra Mi ta bisa boso, ku lo Mi no kom'e nunka mas te ora ku e ta kumpli den e reino di Dios."

¹⁷I ora ku El a kohe un kopa i a duna gradisimentu, El a bisa: "Tuma esaki i partie entre boso;

¹⁸pasobra Mi ta bisa boso, lo Mi no bebe di e fruta di e mata di wendruif mas te ora ku e reino di Dios bin."

¹⁹I ora ku El a kohe pan i a duna gradisimentu, El a kibr'e, i a duna nan esaki, bisando: "Esaki ta Mi kurpa ku ta duna pa boso; hasi esaki na Mi rekuerdo."

²⁰I di e mesun manera El a kohe e kopa despues ku nan a kaba di kome, bisando: "E kopa aki, ku a wordu drama pa boso, ta e aliansa nobo den Mi sanger.

²¹Ma mira, man di esun ku ta traishonaMi ta huntu ku Mi na mesa.

²²Pasobra di berdat e Yu di Hende ta bai manera a wordu determina, ma ai di e homber ei dor di kende E ta wordu traishona!"

²³I nan a kuminsa diskuti nan ku nan, kual di nan esei por ta ku lo a bai hasi e kos aki.

²⁴I tambe a lanta un diskushon entre nan tokante kual di nan tabata wordu konsidera di ta esun di mas grandi.

²⁵I El a bisa nan: "E reinan di e paganonan ta goberna nan; i esnan ku tin outoridat riba nan ta wordu yama 'Shonnan bondadoso.'

²⁶Ma entre boso no mester t'asina; alkontrario, laga esun di mas grandi meimei di boso ta manera esun di mas hoben, i esun ku ta goberna manera esun ku ta sirbi.

²⁷Pasobra ta ken ta mas grandi: esun ku ta sinta na mesa of esun ku ta sirbi? No ta esun ku ta sinta na mesa? Ma Ami ta meimei di boso manera esun ku ta sirbi.

²⁸I boso ta esnan ku a keda na Mi lado den Mi pruebanan;

²⁹i meskos ku Mi Tata a laga un reino pa Mi, Mi ta laga pa boso,

³⁰pa boso kome i bebe na Mi mesa den Mi reino, i boso lo sinta riba trononan pa huzga e diesdos tribunan di Israel.

³¹"Simon, Simon, mira, Satanas a pidi permit pa sefta boso manera trigo,

³²ma Ami a hasi orashon pa bo, pa bo fe no faya; i abo, unabes ku bo a komberti, fortalese bo rumannan."

³³I el a bis'E: "Senor, ku Bo mi ta dispuesto pa no solamente bai prizon, ma pa muri tambe!"

³⁴Ma El a bisa: "Pedro, Mi ta bisabo, gai lo no kanta awe prome ku bo a nenga tres biaha ku bo konoseMi."

³⁵I El a bisa nan: "Tempu ku Mi a manda boso sali bai sin bolsa i sin saku i sin sandalia, boso tabatin falta di algu?" I nan a bisa: "Di nada-nada."

³⁶I El a bisa nan: "Ma awor, esun ku tin un bolsa, lagu'e bai kune, i tambe un saku; i esun ku no tin spada, lagu'e bende su pana i kumpra un.

³⁷Pasobra Mi ta bisa boso, ku loke ta para skirbi aki mester keda kumpli den Mi: 'I El a wordu konta huntu ku transgresornan'; pasobra loke ta para skirbi di Mi mester wordu kumpli."

³⁸I nan a bisa: "Senor, mira, ata dos spada aki." I El a bisa nan: "Ta basta."

³⁹I El a sali i a bai Seru di Oleifi manera tabata Su kustumber; i e disipelnan tambe tabata siguié.

⁴⁰I ora ku El a yega na e luga ei, El a bisa nan: "Hasi orashon pa boso no kai den tentashon."

⁴¹I El a retira Su mes for di nan na un distansia di un tira di piedra, i El a hinka rudia i a kuminsa hasi orashon,

⁴²bisando: "Tata, si ta Bo boluntat, kita e kopa aki for di Mi; sinembargo, no Mi boluntat, ma di Bo sosode."

⁴³Awor a parese un angel for di shelu na djé pa fortales'E.

⁴⁴I siendo den ansha di morto E tabata hasi orashon masha ferviente. I Su sodo a bira manera gotanan di sanger ku tabata kai abou na suela.

⁴⁵I ora ku El a kaba di hasi orashon, El a bin serka Su disipelnan i a hana nan na sono pa motibu di tristesa,

⁴⁶i El a bisa nan: "Pakiko boso ta drumi? Lanta i hasi orashon pa boso no kai den tentashon."

⁴⁷Mientras ku E tabata papia ainda, ata, un multitut a bin, i esun ku yama Judas, un di e diesdosnan, tabata kana nan dilanti, i el a kana bin serka Jesus pa dun'E un sunchi.

⁴⁸I Jesus a bis'e: "Judas, bo ta traishona e Yu di Hende ku un sunchi?"

⁴⁹I ora esnan ku tabata para ront di djé a mira kiko tabata bai sosode, nan a bisa: "Senor, Bo kier pa nos dal ku spada?"

⁵⁰I un di nan a dal e esklabu di e sumosaserdote i a kap su orea drechi kit'afo.

⁵¹Ma Jesus a kontesta i a bisa: "Stop! No sigui mas." I El a mishi ku su orea i a kur'e.

⁵²I Jesus a bisa e saserdotenan prinsipal i e ofisialnan di tempel i e ansianonan ku a bin kontra djé: "Boso a sali bin ku spada i klop manera ta kontra un ladron boso a bin?

⁵³Mientras ku Mi tabata tur dia den tempel serka boso, boso no a tira man riba Mi; ma e ora aki i e poder di skuridat ta di boso."

⁵⁴I despues di a arest'E, nan a bai kuné i a hib'E na kas di e sumosaserdote; i Pedro tabata sigui na un distansia.

⁵⁵I ora nan a sende un kandela meimei di e plenchi i a sinta huntu, Pedro a bai sinta meimei di nan.

⁵⁶I un sirbido muhe, ku a mir'e sinta den klaridat di e kandela, a wak e bon i a bisa: "E homber aki tambe tabata huntu kuné."

⁵⁷Ma Pedro a nenga esaki, bisando: "Muhe, mi no konos'E."

⁵⁸I un ratu despues un otro a mir'e i a bisa: "Bo tambe ta un di nan!" Ma Pedro a bisa: "Homber, no ta berdat!"

⁵⁹I mas o menos un ora despues un otro homber a insist!, bisando: "Sigur-sigur e homber aki tambe tabata huntu kuné, pasobra e tambe ta un galileo."

⁶⁰Ma Pedro a bisa: "Homber, mi no sa di kiko bo ta papia." I mesora, mientras ku e tabata papia ainda, un gai a kanta.

⁶¹I Senor a drai wak Pedro. I Pedro a korda e palabra di Senor, kon El a bis'e: "Prome ku un gai kanta awe, lo bo nengaMi tres biaha."

⁶²I Pedro a bai pafo, i a yora amargamente.

⁶³I e hombernan ku tabata tene Jesus prezo tabata hasi bofon di djé i tabata sut'E,

⁶⁴i nan tabata tapa Su kara i tabata puntr'E, bisando: "Profetisa, ta ken t'esun ku a dal Bo?"

⁶⁵I hopi otro kos mas nan tabata bisa kontra djé, blasfemando.

⁶⁶I ora dia a habri, e ansianonan di e pueblo a reuni, tantu saserdote prinsipal komo eskriba, i nan a hib'E na nan sala di konsilio, bisando:

⁶⁷"Si ta Abo ta e Cristo, bisa nos." Ma El a bisa nan: "Si Mi bisa boso, boso lo no kere;

⁶⁸i si Mi hasi un pregunta, boso lo no kontestaMi ni lagaMi bai.

⁶⁹Ma for di awor padilanti e Yu di Hende lo ta sinta na man drechi di e poder di Dios."

⁷⁰I nan tur a bisa: "Ta Abo ta e Yu di Dios anto?" I El a bisa nan: "Si, Ami ta."

⁷¹I nan a bisa: "Ki testimonio mas nos mester? Pasobra nos mes a tende esaki for di Su mes boka."