Read Papantla Totonac Lukas 24 Bible Online

Lukas 24 - Papantla Totonac bible

Lukas 24

¹Ma riba e prome dia di siman, mainta bon tempran, nan a bai na e tumba i a hiba e spesereinan ku nan a prepara.

²I nan a hana e piedra lora kita for di e tumba,

³ma ora nan a drenta, nan no a hana e kurpa di Senor Jesus.

⁴I a sosode ku mientras nan no tabata sa kiko pa pensa di esaki, ata, direpiente dos homber tabata para banda di nan, bisti na pana briyante.

⁵I den nan spantu e muhenan a buig ku nan kara te na suela, ma e hombernan a bisa nan: "Pakiko boso ta buska Esun bibu serka e mortonan?

⁶E no ta akinan, ma El a resusita. Korda kon El a papia ku boso, tempu ku E tabata na Galilea ainda,

⁷bisando, ku e Yu di Hende mester wordu entrega den man di hombernan pekaminoso i wordu krusifika, i resusita riba e di tres dia."

⁸I nan a korda Su palabranan.

⁹Nan a bolbe for di e tumba i a konta tur e kosnan aki na e diesunnan i na tur e otronan.

¹⁰Awor esakinan tabata Maria Magdalena i Johana i Maria, mama di Santiago; tambe e otro muhenan ku tabata huntu ku nan tabata konta e kosnan aki na e apostelnan.

¹¹I e palabranan aki a parse nan ko'i loko i nan no a kere nan.

¹²[Ma Pedro a lanta i a kore bai na e tumba; i el a buk wak paden i a mira solamente e pananan di lora morto aden; i el a bai su kas, i a keda atmira di loke a sosode.]

¹³I mira, riba e mesun dia ei dos di nan tabata bai na un pueblito ku yama Emaus, ku tabata keda mas o menos diesun kilometer for di Jerusalem.

¹⁴I nan tabata kombersa ku otro tokante di tur e kosnan aki ku a tuma luga.

¹⁵I a sosode ku mientras nan tabata kombersa i diskuti ku otro, Jesus mes a yega serka nan i a kuminsa kana huntu ku nan.

¹⁶Ma nan wowo a wordu stroba, asina ku nan no a rekonos'E.

¹⁷I El a bisa nan: "Ki kombersashon boso tin tantu asina ku otro segun ku boso ta kana?" I nan a keda para ta wak tristu asina.

¹⁸I un di nan ku yama Kleofas a kontesta i a bis'E: "Ta Abo ta e uniko stranhero den Jerusalem ku no sa di e kosnan ku a sosode ayanan den e dianan aki?"

¹⁹I El a bisa nan: "Ki kosnan?" I nan a bis'E: "E kosnan tokante di Jesus di Nazaret, Kende tabata un profeta poderoso den echo i den palabra den bista di Dios i di henter e pueblo,

²⁰i kon e saserdotenan prinsipal i nos gobernantenan a entregu'E na sentensia di morto i a krusifik'E.

²¹Ma nos tabata spera ku E lo tabata Esun ku tabata bai redimi Israel. Ma ku tur esaki, awe ta tres dia kaba ku e kosnan aki a sosode.

²²Ma tambe algun muhe for di meimei di nos a laga nos tur asombra. Ora nan tabata na e tumba mainta tempran,

²³i no a hana Su kurpa, nan a bin bisa ku tambe nan a mira un vishon di angelnan, kendenan a bisa ku E ta na bida.

²⁴I algun di esnan ku tabata huntu ku nos a bai na e tumba i a hana esei meskos ku e muhenan tambe a bisa, ma E nan no a mira."

²⁵I El a bisa nan: "O hombernan sin sinti i floho di kurason pa kere tur loke e profetanan a papia!

²⁶E Cristo no mester a sufri tur e kosnan aki i drenta den Su gloria?"

²⁷I kuminsando ku Moises i ku tur e profetanan El a splika nan e kosnan tokante di Su mes den tur e Skrituranan.

²⁸I nan a yega serka di e pueblito kaminda nan tabata bai, i El a hasi komo si fuera E lo a sigui bai mas leu.

²⁹I nan a insist! i a bis'E: "Keda serka nos, pasobra nochi ta kuminsa sera i dia ta kabando." I El a bai paden pa keda serka nan.

³⁰I a sosode ku ora E tabata sinta na mesa huntu ku nan, El a kohe e pan, a bendishon'e, a kibr'e i a duna nan.

³¹I nan wowo a habri i nan a rekonos'E; i El a disparse for di nan bista.

³²I nan a bisa otro: "Nos kurason no tabata kima den nos mientras ku E tabata papia ku nos na kaminda, mientras ku E tabata splika nos e Skrituranan?"

³³I mesora nan a lanta i a bolbe Jerusalem i a hana reuni huntu e diesunnan i e otronan ku tabata ku nan,

³⁴bisando: "Di berdat, Senor a resusita i a parese na Simon."

³⁵I nan a konta nan eksperensianan na kaminda i kon El a wordu rekonosi dor di nan na e kibramentu di pan.

³⁶I mientras ku nan tabata konta e kosnan aki, Jesus mes a bin para meimei di nan, i a bisa nan: "Pas sea ku boso."

³⁷Nan a spanta i a hana miedu i a kere ku nan tabata mira un spiritu.

³⁸I El a bisa nan: "Pakiko boso ta intrankil, i pakiko ta lanta duda den boso kurason?

³⁹Wak Mi mannan i Mi pianan, ku ta Ami mes; mishi ku Mi i mira, pasobra un spiritu no tin karni i wesu, manera boso ta mira ku Ami tin."

⁴⁰[I ora ku El a bisa esaki, El a mustra nan Su mannan i Su pianan.]

⁴¹I ora ku di alegria ainda nan no por a kere i nan a keda atmira, El a bisa nan: "Boso tin algu aki pa kome?"

⁴²I nan a dun'E pida piska hasa;

⁴³i El a tuma esaki i a kom'e nan dilanti.

⁴⁴I El a bisa nan: "Esakinan ta Mi palabranan ku Mi a papia ku boso mientras ku Mi tabata serka boso ainda, ku tur kos ku ta para skirbi tokante di Mi den e Lei di Moises i e Profetanan i e Salmonan mester wordu kumpli."

⁴⁵E ora ei El a habri nan huisio pa nan komprende e Skrituranan,

⁴⁶i El a bisa nan: "Asina ta para skirbi, ku e Cristo mester a sufri i lanta for di e mortonan riba e di tres dia,

⁴⁷i ku repentimentu pa pordon di pika mester a wordu proklama den Su nomber na tur nashon, kuminsando na Jerusalem.

⁴⁸Boso ta testigu di e kosnan aki.

⁴⁹I mira, Mi ta manda e promesa di Mi Tata riba boso; ma boso mester keda den e stat Jerusalem te ora boso wordu bisti ku poder for di ariba."

⁵⁰I El a hiba nan te na Betania, i El a hisa Su mannan i a bendishona nan.

⁵¹I a sosode ku mientras ku E tabata bendishona nan, El a bai for di nan i a wordu tuma ariba den shelu.

⁵²I nan a bolbe Jerusalem ku gran goso,

⁵³i tabata tur ora bai den tempel, alabando i bendishonando Dios. Amen.