Read Papantla Totonac Lukas 4 Bible Online

Lukas 4 - Papantla Totonac bible

Lukas 4

¹I Jesus, yen di Spiritu Santu, a bolbe for di Jordan i a wordu hiba dor di e Spiritu den desierto

²pa kuarenta dia, i El a wordu tenta dor di diabel. I E no a kome nada durante di e dianan ei; i ora ku e dianan a pasa, El a hana hamber.

³I diabel a bis'E: "Si Bo ta e Yu di Dios, bisa e piedra aki pa e bira pan."

⁴I Jesus a kontest'e: "Ta para skirbi: 'Hende lo no biba di pan so.'"

⁵I el a hib'E na un luga haltu i a mustr'E tur e reinonan di mundu den un momento di tempu.

⁶I diabel a bis'E: "Lo mi dunaBo henter e dominio aki i su gloria; pasobra esei a wordu entrega na mi, i mi ta dun'e na esun ku mi kier.

⁷Pesei, si Bo adorami, tur esaki lo ta di Bo."

⁸I Jesus a kontesta i a bis'e: "Ta para skirbi: 'Adora SENOR bo Dios i sirbi E so.'"

⁹I el a hib'E Jerusalem i a pon'E para riba e pinakulo di e tempel i a bis'E: "Si Bo ta e Yu di Dios, tira Bo kurpa abou for di aki;

¹⁰pasobra ta para skirbi: 'E lo duna Su angelnan enkargo tokante di Bo pa nan wardabo,'

¹¹i, 'Den nan mannan nan lo kargaBo, pa Bo no dal Bo pia na piedra.'"

¹²I Jesus a kontesta i a bis'e: "Ta bisa: 'No tenta SENOR bo Dios.'"

¹³I ora diabel a kaba ku tur tentashon, el a lagu'E pa un tempu.

¹⁴I Jesus a bolbe na Galilea den e poder di e Spiritu; i Su fama a plama den henter e distrikto eibanda.

¹⁵I El a kuminsa sina e hendenan den nan snoanan i tur hende tabata elogi'E.

¹⁶I El a bin Nazaret, kaminda El a lanta komo mucha. I manera tabata Su kustumber El a bai den snoa riba dia di Sabat, i a lanta para pa lesa.

¹⁷I nan a dun'e e buki di profeta Isaias. I El a habri e buki i a hana e luga kaminda tabata para skirbi:

¹⁸"E Spiritu di SENOR ta riba Mi, pasobra El a ungiMi pa predika evangelio na e pobernan; El a mandaMi pa proklama libertat na e prezonan, i restorashon di bista na e siegunan, pa duna libertat na esnan ku ta wordu oprimi,

¹⁹pa proklama e ana agradabel di SENOR."

²⁰I El a sera e buki i a duna esaki bek na e sirbido i a sinta; i bista di tur hende den snoa tabata fiha riba djé.

²¹I El a kuminsa bisa nan: "Awe e Skritura aki a keda kumpli boso dilanti."

²²I tur tabata duna bon testimonio di djé, i tabata keda strana di e palabranan agradabel ku tabata sali for di Su boka; i nan tabata puntra: "No ta yu di Jose esaki ta?"

²³I El a bisa nan: "Sin duda boso lo sita e proverbio aki pa Mi: 'Dokter, kura bo mes! Tur kos ku nos a tende ku a wordu hasi na Kapernaum, hasi nan aki den Bo mes stat tambe.'"

²⁴I El a bisa: "Di berdat Mi ta bisa boso: Ningun profeta no ta wordu asepta den su mes stat.

²⁵Ma di berdat Mi ta bisa boso, tabatin hopi biuda na Israel den e dianan di Elias, tempu ku shelu tabata sera pa tres ana i seis luna, tempu ku a bin un hamber pisa den henter e tera;

²⁶i tog Elias no a wordu manda serka ningun di nan, sino solamente na Sarepta, na tera di Sidon, serka un muhe biuda.

²⁷I tabatin hopi leproso na Israel den e tempu di profeta Elisa; i ningun di nan no a wordu hasi limpi, sino solamente Naaman di Siria."

²⁸I tur ku tabata den snoa a yena ku furia ora nan a tende e kosnan aki,

²⁹i nan a lanta i a sak'E for di e stat, i a hib'E na rant di e seru, riba kual nan stat tabata traha, pa tir'E abou for di e baranka steil.

³⁰Ma El a pasa meimei di nan sigui Su kaminda.

³¹I El a yega Kapernaum, un stat di Galilea, i E tabata sina nan riba dia di Sabat;

³²i nan a keda strana di Su sinansa, pasobra Su palabra tabata ku outoridat.

³³I tabatin un hende den snoa ku tabata posei pa e spiritu di un demono impuru, i el a grita na bos haltu:

³⁴"Laga nos! Kiko nos tin di hasi ku Bo, Jesus di Nazaret? Bo a bin pa destrui nos? Mi sa ken Bo ta: Esun Santu di Dios!"

³⁵I Jesus a reprend'e, bisando: "Keda ketu, i sali for di dje!" I ora ku e demono a bent'e abou na suela meimei di nan, el a sali bai for di dje sin hasie ningun dano.

³⁶I nan tur a keda asombra, i nan tabata diskuti nan ku nan, bisando: "Ta ki palabra esaki ta? Pasobra ku outoridat i poder E ta ordena e spiritunan impuru, i nan ta sali."

³⁷I e notisia tokante di djé tabata plama den tur bario di e distrikto eibanda.

³⁸I El a lanta, a sali for di snoa i a bai kas di Simon. Awor Simon su suegra tabata malu ku keintura haltu, i nan a hasi un petishon na Jesus p'e.

³⁹I El a bai para na kabes di su kama i a reprende e keintura, i e keintura a lagu'e; i mesora el a lanta i a sirbi nan.

⁴⁰I ora solo tabata baha, tur ku tabatin hende malu ku tur sorto di malesa a trese nan serka djé; i poniendo Su mannan riba kada un di nan E tabata kura nan.

⁴¹I tambe demononan tabata sali for di hopi hende, i nan tabata grita i bisa: "Abo ta e Yu di Dios!" I E tabata reprende nan i no tabata permit! nan papia, pasobra nan tabata sa ku E ta e Cristo.

⁴²I ora dia a habri, El a sali bai na un luga solitario; i e multitutnan tabata busk'E, i tabata bin serka djé, i tabata purba ten'E pa E no bai for di nan.

⁴³Ma El a bisa nan: "Mi mester predika e reino di Dios na e otro statnan tambe, pasobra ta pa e proposito aki Mi a wordu manda."

⁴⁴I El a sigui predika den e snoanan di Galilea.