Read Papantla Totonac Lukas 5 Bible Online

Lukas 5 - Papantla Totonac bible

Lukas 5

¹Awor a sosode ku mientras e multitut tabata pusha bin para tur ront di djé i tabata skucha e palabra di Dios, E mes tabata para kantu di e lago di Genesaret;

²i El a mira dos boto kantu di e lago; i e piskadonan a sali for di nan i tabata laba nan redanan.

³I El a bai den un di e botonan, esun di Simon, i a pidie pa hala un poko for di kantu. I El a sinta i a kuminsa sina e multitutnan for di den e boto.

⁴I ora ku El a kaba di papia, El a bisa Simon: "Bai kaminda tin awa hundu i tira boso redanan pa boso kohe piska."

⁵I Simon a kontesta i a bisa: "Maestro, nos a traha duru henter anochi i no a kohe nada, ma riba Bo palabra lo mi tira e redanan."

⁶I ora nan a hasi esaki, nan a kohe un kantidat grandi di piska; i nan redanan a kuminsa kibra;

⁷i nan a hasi sena na nan kompaneronan den e otro boto, pa nan bin yuda nan. I nan a bin i a yena tur dos boto, asina ku nan a kuminsa senk.

⁸Ma ora Simon Pedro a mira esei, el a tira su kurpa abou na pia di Jesus, bisando: "Bai for di mi, pasobra mi ta un hende pekaminoso, O Senor!"

⁹Pasobra tantu e komo tur esnan ku tabata huntu kune a keda masha strana di e kantidat di piska ku nan a kohe;

¹⁰i meskos tambe Santiago i Juan, yu hombernan di Zebedeo, kendenan tabata kompanero di Simon. I Jesus a bisa Simon: "No tene miedu, for di awor padilanti lo bo ta piskado di hende."

¹¹I ora nan a trese nan botonan na tera, nan a laga tur kos i a siguié.

¹²I a sosode ku mientras E tabata na un di e statnan, ata, tabatin un homber yen di lepra ku a mira Jesus, i el a tira su kurpa abou ku su kara te na suela i a rogu'E, bisando: "Senor, si Bo kier, Bo por hasimi bira limpi."

¹³I El a saka Su man i a mishi kune, bisando: "Mi kier, sea limpi." I mesora e lepra a kita for di dje.

¹⁴I El a orden'e pa no konta ningun hende: "Ma bai i mustra bo mes na e saserdote, i hasi un ofrenda pa bo purifikashon, meskos ku Moises a ordena, komo un testimonio pa nan."

¹⁵Ma e notisia tokante di djé tabata plama mas i mas, i multitutnan grandi tabata bin huntu pa tend'E i pa wordu kura di nan malesanan.

¹⁶Sinembargo, hopi biaha E tabata retira Su mes den desierto pa hasi orashon.

¹⁷I a sosode ku riba un dia E tabata sina e hendenan; i tabatin algun fariseo i sinado di lei sinta einan, kendenan a bin for di tur pueblo di Galilea i Judea i for di Jerusalem; i e poder di Senor tabata presente kuné pa kura hende.

¹⁸I mira, algun homber tabata karga riba un kama un homber ku tabata paralisa; i nan tabata buska manera pa tres'e paden, i pa pon'e Su dilanti.

¹⁹I ora nan no a hana un manera pa tres'e paden, pa motibu di e multitut, nan a subi riba dak i a bah'e ku su kama dor di e panchinan, net meimei, dilanti di Jesus.

²⁰I mirando nan fe, El a bisa: "Amigu, bo pikanan ta pordona."

²¹I e eskribanan i fariseonan a kuminsa rasona, bisando: "Ta ken e homber aki ta ku ta papia blasfemia? Ken por pordona pikanan, si no ta Dios so?"

²²Ma Jesus, Kende tabata sa di nan pensamentunan, a kontesta i a bisa nan: "Pakiko boso ta rasona den boso kurason?

²³Kiko ta mas fasil pa bisa: 'Bo pikanan a wordu pordona,' of pa bisa: 'Lanta i kana'?

²⁴Ma pa boso sa ku e Yu di Hende tin outoridat riba tera pa pordona pikanan," El a bisa e paralitiko: "Mi ta bisabo, lanta, kohe bo kama i bai kas."

²⁵I mesora el a lanta nan dilanti, a kohe loke e tabata drum! ariba i a bai kas, glorifikando Dios.

²⁶I nan tur a keda masha asombra mes i a glorifika Dios; i yen di temor nan a bisa: "Nos a mira kosnan remarkabel awe."

²⁷I despues di esei El a sali bai pafo i a mira un publikano ku yama Levi sinta den ofisina di belasting, i El a bis'e: "SiguiMi."

²⁸I el a laga tur kos atras, i a lanta i a siguié.

²⁹I Levi a tene un bankete grandi p'E na su kas; i tabatin un multitut grandi di publikano i otro hende ku tabata sinta na mesa huntu ku nan.

³⁰I e fariseonan i nan eskribanan a kuminsa murmura kontra Su disipelnan, bisando: "Pakiko boso ta kome i bebe huntu ku e publikanonan i pekadonan?"

³¹I Jesus a kontesta i a bisa nan: "No ta esnan ku ta salu tin mester di dokter, sino esnan ku ta malu.

³²Mi no a bin pa yama e hustunan, sino pekadonan, na repentimentu."

³³I nan a bis'E: "E disipelnan di Juan ta yuna i hasi orashon ku frekuensia; e disipelnan di e fariseonan tambe ta hasi meskos; ma esnan di Bo ta kome i bebe."

³⁴I Jesus a bisa nan: "Boso por laga esnan ku ta atende e bruidehom yuna, mientras ku e bruidehom ta huntu ku nan?

³⁵Ma e dianan lo bin ku e bruidehom lo wordu kita for di nan; den e dianan ei nan lo yuna."

³⁶I tambe E tabata konta nan un parabola: "Ningun hende no ta sker un pida for di un bisti nobo i pegu'e na un bisti bieu; pasobra no solamente e lo sker e nobo, ma e pida for di e nobo lo no pas ku e bieu tampoko.

³⁷I ningun hende no ta pone bina nobo den saku-di-kueru bieu; sino e bina nobo ta hasi e sakunan rementa i e bina ta bash'afo, i e sakunan ta bai perdi.

³⁸Ma bina nobo mester wordu poni den saku-di-kueru nobo.

³⁹I ningun hende, despues di a bebe bina bieu, ta desea bina nobo, pasobra e ta bisa: 'E bieu ta miho.'"