Read Papantla Totonac Lukas 6 Bible Online

Lukas 6 - Papantla Totonac bible

Lukas 6

¹Awor a sosode ku riba dia di Sabat E tabata pasando dor di kunukunan di mainshi; i Su disipelnan tabata kita e tapushinan di mainshi, frega nan den nan man i kome nan.

²Ma algun di e fariseonan a bisa: "Pakiko boso ta hasi loke Lei no ta permiti pa hasi riba dia di Sabat?"

³I kontestando nan Jesus a bisa: "Ni lesa boso no a lesa loke David a hasi ora ku e i esnan ku tabata huntu kune a hana hamber,

⁴kon el a bai den e kas di Dios, i a kohe e pan konsagra kome, loke Lei no ta permit! pa ningun hende kome, sino solamente e saserdotenan, i a duna esaki na esnan ku tabata huntu kune?"

⁵I E tabata bisa nan: "E Yu di Hende ta Senor di Sabat."

⁶I a sosode riba un otro dia di Sabat ku El a bai den snoa i tabata sina e hendenan; i einan tabatin un homber, kende su man drechi tabata seku.

⁷I e eskribanan i e fariseonan tabata ten'E bon na bista, pa wak si E tabata kura riba dia di Sabat, pa nan por a hana motibu pa akus'E.

⁸Ma E tabata konose nan pensamentunan, i El a bisa e homber ku e man seku: "Lanta bin para meimei aki!" I el a lanta i a bai para ayanan.

⁹I Jesus a bisa nan: "Mi kier puntra boso un kos: Lei ta permit! pa riba dia di Sabat hasi bon of hasi malu, salba un bida of destruie?"

¹⁰I despues di a wak nan tur, El a bisa e homber: "Rek bo man!" I esei el a hasi; i su man a bira bon atrobe.

¹¹Ma nan mes tabata furioso, i tabata diskuti nan ku nan kiko nan por a hasi kontra Jesus.

¹²I a sosode den e dianan ei ku El a subi bai riba seru pa hasi orashon, i El a pasa henter anochi den orashon na Dios.

¹³I ora dia a habri El a yama Su disipelnan serka djé, i a skohe diesdos di nan, kendenan tambe El a yama apostel:

¹⁴Simon, kende El a yama Pedro tambe, i su ruman Andres; i Santiago i Juan; i Felipe i Bartolome;

¹⁵i Mateo i Tomas; Santiago, yu homber di Alfeo, i Simon, kende tabata wordu yama Zelote;

¹⁶Judas, yu homber di Santiago, i Judas Iskariot, kende a bira un traido.

¹⁷I El a baha huntu ku nan i a keda para riba un luga plat; i ayanan tabatin un multitut grandi di Su disipelnan, i un multitut grandi di hende for di henter Judea i Jerusalem i e region na kosta di Tiro i Sidon,

¹⁸kendenan a bin pa tend'E i pa wordu kura di nan malesanan; i esnan ku tabata wordu tormenta pa spiritunan impuru tabata wordu kura.

¹⁹I henter e multitut tabata buska manera pa mishi kuné, pasobra poder tabata sali for di djé i tabata kura nan tur.

²⁰I El a hisa kara wak Su disipelnan i a bisa: "Bendishona ta boso ku ta pober, pasobra di boso e reino di Dios ta.

²¹Bendishona ta boso ku tin hamber awor, pasobra boso lo wordu sasia. Bendishona ta boso ku ta yora awor, pasobra boso lo hari.

²²Bendishona ta boso ora hende ta odia boso i ta eksklui boso i ta insulta boso, i ta rechasa boso nomber komo malu, pa kousa di e Yu di Hende.

²³"Sea kontentu den e dia ei i bula di goso, pasobra mira, boso rekompensa ta grandi den shelu; pasobra meskos nan tatanan tabata hasi ku e profetanan.

²⁴"Ma ai di boso ku ta riku, pasobra ya boso a risibi boso konsuelo kaba.

²⁵Ai di boso ku ta barika yen awor, pasobra boso lo tin hamber. Ai di boso ku ta hari awor, pasobra boso lo lamenta i yora.

²⁶Ai di boso ora tur hende ta papia bon di boso, pasobra meskos nan tatanan tabata hasi ku e profetanan falsu.

²⁷"Ma na boso ku ta tende Mi ta bisa, stima boso enemigunan, hasi bon na esnan ku ta odia boso,

²⁸bendishona esnan ku ta maldishona boso, hasi orashon pa esnan ku ta maltrata boso.

²⁹Ken ku dal bo na esun banda di kara, ofres'e e otro banda tambe; i ken ku kita bo mantel for di bo, lagu'e kohe bo tunika tambe.

³⁰Duna na tur hende ku pidibo, i ken ku kohe loke ta di bo, no eksigi esaki bek.

³¹I meskos ku boso kier pa hende hasi ku boso, boso tambe hasi ku nan.

³²"I si boso stima esnan ku ta stima boso, ki merito esei ta pa boso? Pasobra asta pekadonan ta stima esnan ku ta stima nan.

³³I si boso hasi bon na esnan ku ta hasi bon na boso, ki merito esei ta pa boso? Pasobra asta pekadonan ta hasi meskos.

³⁴I si boso fia esnan for di kendenan boso ta spera di risibi, ki merito esei ta pa boso? Asta pekadonan ta fia pekadonan, pa risibi meskos bek.

³⁵Ma stima boso enemigunan, i hasi bon, i fia sin spera di hana nada bek; i boso rekompensa lo ta grandi, i boso lo ta yunan di e Haltisimo; pasobra E mes ta karinoso pa ku ingratonan i malbadonan.

³⁶Sea miserikordioso, meskos ku boso Tata ta miserikordioso.

³⁷"No huzga, i boso lo no wordu huzga; no kondena, i boso lo no wordu kondena; pordona, i boso lo wordu pordona.

³⁸Duna, i lo wordu duna na boso: un midi bon yena, bon primi, bon sakudi, ku ta basha ofer, nan lo drama den boso skochi. Pasobra ku e mesun midi ku boso midi kune lo wordu midi bek pa boso."

³⁹I tambe El a konta nan un parabola: "Akaso un siegu por guia un siegu? Nan tur dos lo no kai den buraku?

⁴⁰Un disipel no ta mas ku su maestro; ma tur hende, despues di a kaba di sina tur kos, lo ta meskos ku su maestro.

⁴¹"I pakiko bo ta wak e stof ku tin den wowo di bo ruman, ma no ta ripara e balki ku tin den bo mes wowo?

⁴²Of kon bo por bisa bo ruman: 'Ruman, lagami saka e stof for di bo wowo,' mientras ku abo mes no ta mira e balki ku tin den bo mes wowo? Abo hipokrit, saka prome e balki for di bo mes wowo, i e ora ei lo bo mira bon kla pa saka e stof ku tin den wowo di bo ruman.

⁴³"Pasobra no tin palu bon ku ta duna mal fruta, ni palu malu ku ta duna bon fruta.

⁴⁴Pasobra kada palu ta konosi na su fruta. Pasobra hende no sa kita figo for di mata di sumpina, ni nan no sa kita wendruif for di mata di wabi.

⁴⁵E bon hende, for di e bon tesoro di su kurason, ta saka loke ta bon; i e mal hende, for di e mal tesoro, ta saka loke ta malu; pasobra for di e abundansia di kurason su boka ta papia.

⁴⁶"I pakiko boso ta yamaMi: 'Senor, Senor,' i no ta hasi loke Mi ta bisa?

⁴⁷Ken ku bin serka Mi i tende Mi palabranan i hasi nan, lo Mi mustra boso ku ken e ta igual:

⁴⁸e ta igual ku un homber ku a traha un kas, kende a koba hundu i a pone un fundeshi riba e baranka; i ora ku a bin un diluvio, e torente di awa a suta duru kontra e kas ei i no por a sakudie, pasobra e tabata bon traha.

⁴⁹Ma esun ku a tende i no a hasi nada ta igual ku un homber ku a traha un kas riba tera sin ningun fundeshi; i e torente di awa a suta duru kontra dje i mesora el a bash'aden, i e ruina di e kas ei tabata grandi."