Read Papantla Totonac Lukas 7 Bible Online

Lukas 7 - Papantla Totonac bible

Lukas 7

¹Ora Jesus a kaba di papia tur Su palabranan pa e pueblo tende, El a bai Kapernaum.

²I e esklabu di un senturion, kende esaki tabata apresia masha, tabata malu i serka di muri.

³I ora ku el a tende tokante di Jesus, el a manda algun ansiano hudiu serka djé pa pidié bin skapa bida di su esklabu.

⁴I ora nan a yega serka Jesus, nan a rogu'E masha hopi mes, bisando: "E ta digno pa Bo konsed'e esaki,

⁵pasobra e ta stima nos nashon, i ta e a traha e snoa pa nos."

⁶Awor Jesus a bai ku nan. I ora ku E no tabata muchu leu mas for di e kas, e senturion a manda algun amigu serka djé, bisando: "Senor, no tuma molester mas, pasobra mi no ta digno pa Bo bin bou di mi dak;

⁷pesei mi no a konsidera mi mes digno tampoko pa bin serka Bo, ma djis papia un palabra, i mi sirbido lo ta kura.

⁸Pasobra ami tambe ta un homber bou di outoridat, ku solda bou di mi mando; i mi ta bisa esun aki: 'Bai!' i e ta bai; i esun aya: 'Bin!' i e ta bin; i mi esklabu: 'Hasi esaki!' i e ta hasie."

⁹Awor ora Jesus a tende esaki, El a keda maraviya di dje, i a drai wak i a bisa e multitut ku tabata siguié: "Mi ta bisa boso, ni na Israel Mi no a hana un fe asina grandi."

¹⁰I ora ku esnan ku a wordu manda a bolbe na e kas, nan a hana e esklabu bon di salu.

¹¹I a sosode ku e siguiente dia El a bai un stat ku yama Nain; i Su disipelnan a bai huntu kuné, kompana pa un multitut grandi.

¹²Awor ora ku E tabata yega na porta di e stat, ata, un morto tabata wordu hiba pa dera, e uniko yu homber di su mama, kende tabata biuda; i un multitut grandi for di e stat tabata huntu kune.

¹³I ora Senor a mir'e, El a sinti kompashon p'e, i a bis'e: "No yora."

¹⁴I El a yega serka i a mishi ku e kaha di morto; i e kargadonan di morto a keda para. I El a bisa: "Hoben, Mi ta bisabo: Lanta!"

¹⁵I e morto a lanta sinta i a kuminsa papia. I Jesus a entregu'e bek na su mama.

¹⁶I temor a podera di nan tur, i nan a kuminsa glorifika Dios, bisando: "Un gran profeta a lanta meimei di nos!" i "Dios a bishita Su pueblo!"

¹⁷I e notisia aki tokante di djé a plama den henter Judea i den henter e distrikto eibanda.

¹⁸I e disipelnan di Juan a kont'e di tur e kosnan aki.

¹⁹I Juan, yamando dos di su disipelnan serka dje, a manda nan serka Senor pa puntra: "Ta Abo ta Esun ku mester bin, of nos mester spera un otro?"

²⁰I ora ku e hombernan a yega serka djé, nan a bisa: "Juan Boutista a manda nos serka Bo pa puntra: 'Ta Abo ta (O/j)

²¹I na e momento ei E tabata kura hopi hende di malesanan i aflikshonnan i di spiritunan malu; i El a duna bista na hopi ku tabata siegu.

²²I El a kontesta i a bisa nan: "Bai konta Juan loke boso a mira i tende: e siegunan ta mira, e lamnan ta kana, e leprosonan ta wordu hasi limpi, e sordonan ta tende, e mortonan ta wordu lanta i na e pobernan evangelio ta wordu predika.

²³I bendishona ta esun ku no ta sinti su mes ofendi pa Mi motibu."

²⁴I ora ku e mensaheronan di Juan a bai, El a kuminsa papia ku e multitutnan tokante di Juan: "Ta kiko boso a sali bai wak den desierto? Un richi sakudi dor di bientu?

²⁵Ma ta kiko boso a sali bai wak? Un homber bisti na pana fini? Mira, esnan ku ta bon bisti i ta biba den luho bo ta hana den palasionan real.

²⁶Ma ta kiko boso a sali bai wak? Un profeta? Si, Mi ta bisa boso, i un ku ta mas ku un profeta.

²⁷Esaki ta esun di kende ta para skirbi: 'Mira, Mi ta manda Mi mensahero dilanti di Bo kara, kende lo prepara Bo kaminda Bo dilanti.'

²⁸Mi ta bisa boso, entre esnan ku a nase for di muhe no tin ni un mas grandi ku Juan; sinembargo, esun di mas chikitu den e reino di Dios ta mas grandi kune."

²⁹I ora henter e pueblo i e publikanonan a tende esaki, nan a rekonose Dios Su hustisia, komo ku nan a wordu batisa ku e boutismo di Juan.

³⁰Ma e fariseonan i e ekspertonan di Lei a rechasa e proposito di Dios pa nan mes, komo ku nan no a wordu batisa dor di Juan.

³¹"Ku kiko anto lo Mi kompara e hendenan di e generashon aki, i ku ken nan ta igual?

³²Nan ta igual ku mucha chikitu ku ta sinta riba plasa i ta grita otro; i nan ta bisa: 'Nos a toka fluit pa boso, i boso no a balia; nos a kanta un kantika di rou, i boso no a yora.'

³³Pasobra Juan Boutista a bin i no ta kome pan ni ta bebe bina; i boso ta bisa: 'E tin un demono!'

³⁴E Yu di Hende a bin i ta kome i bebe; i boso ta bisa: 'Ata un homber golos i un burache, un amigu di publikano i pekado!'

³⁵Ma sabiduria ta wordu hustifika pa medio di tur su yunan."

³⁶Awor un di e fariseonan a pidié pa bin kome serka dje. I El a bai den kas di e fariseo i a bai sinta na mesa.

³⁷I mira, den e stat tabatin un muhe ku tabata un pekado; i ora ku el a hana sa ku Jesus tabata sinta na mesa den kas di e fariseo, el a trese un butishi di alabaster ku perfume aden,

³⁸i el a bai para Su tras na Su pianan ta yora, i a kuminsa muha Su pianan ku su awa di wowo, i tabata seka nan ku su kabei, i tabata sunchi Su pianan i hunta nan ku e perfume.

³⁹Awor ora ku e fariseo ku a kombid'E a mira esaki, el a bisa den su mes: "Si e homber aki tabata un profeta E lo tabata sa ta ken i ki sorto di hende e muhe aki ta ku ta mishi kuné, ku ta un pekado e ta."

⁴⁰I Jesus a kontesta i a bis'e: "Simon, Mi tin algu di bisabo." I Simon a kontesta: "Papia numa, Maestro."

⁴¹"Un sierto fiado di plaka tabatin dos debedo: esun tabata debe sinku shen denario, i e otro sinkuenta.

⁴²I komo ku nan no tabata por a pagu'e bek, el a pordona nan tur dos generosamente. Kual di nan dos anto lo stim'e mas?"

⁴³Simon a kontesta i a bisa: "Mi ta supone ku ta esun ku el a pordona mas." I El a bis'e: "Bo a huzga korekto."

⁴⁴I El a bira wak e muhe i a bisa Simon: "Bo ta mira e muhe aki? Mi a bin den bo kas; abo no a dunaMi awa pa Mi pianan, ma el a muha Mi pianan ku su awa di wowo, i a seka nan ku su kabei.

⁴⁵Abo no a dunaMi sunchi, ma e, for di ora ku Mi a drenta, no a stop di sunchi Mi pianan.

⁴⁶Abo no a hunta Mi kabes ku zeta, ma el a hunta Mi pianan ku perfume.

⁴⁷Pesei Mi ta bisabo, su pikanan, ku ta hopi, a wordu pordona, pasobra el a stima hopi; ma esun ku a wordu pordona poko, ta stima poko."

⁴⁸I El a bisa e muhe: "Bo pikanan a wordu pordona."

⁴⁹I esnan ku tabata sinta na mesa huntu kuné a kuminsa bisa den nan mes: "Ta ken e homber aki ta ku asta pika E ta pordona?"

⁵⁰El a bisa e muhe: "Bo fe a salbabo; bai na pas."