Read Papantla Totonac Lukas 8 Bible Online

Lukas 8 - Papantla Totonac bible

Lukas 8

¹I a sosode ku djis despues El a kuminsa bai di un stat i di un pueblito pa otro, proklamando i predikando e reino di Dios; i e diesdosnan tabata huntu kuné,

²i tambe algun hende muhe ku a wordu kura di spiritunan malu i di malesanan: Maria, kende tabata wordu yama Magdalena, for di kende a sali shete demono,

³i Juana, esposa di Chuza, e mayordomo di Herodes, i Susana, i hopi otro mas ku tabata kontribui pa nan sosten for di loke nan mes tabatin.

⁴I ora ku un multitut grandi tabata bin huntu, i esnan for di e diferente statnan tabata biaha pa bin serka djé, El a papia pa medio di un parabola:

⁵"E sembrado a sali pa sembra su simia; i segun ku e tabata sembra un parti a kai kantu di kaminda; i esei a wordu trapa, i e parhanan di shelu a kom'e.

⁶I otro simia a kai riba tera yen di piedra, i asina ku esei a nase el a seka pa falta di awa.

⁷I otro simia a kai meimei di mata di sumpina; i e matanan di sumpina a krese huntu kune, i a hogu'e.

⁸I otro simia a kai den bon tera, i a krese, i a produsi un kosecha, shen bes mas tantu." Papiando e kosnan aki E tabata bisa na bos haltu: "Esun ku tin orea pa tende, lagu'e tende."

⁹I Su disipelnan a kuminsa puntr'E kiko e parabola aki ta nifika.

¹⁰I El a bisa: "Na boso a wordu duna pa konose e misterionan di e reino di Dios, ma na e otronan e ta wordu duna den parabola, 'pa mirando nan no mira, i tendiendo nan no komprende.'

¹¹"Awor e parabola ta esaki: e simia ta e palabra di Dios.

¹²I esnan kantu di kaminda ta esnan ku a tende; despues diabel ta bin i ta kita e palabra for di nan kurason pa nan no kere i wordu salba.

¹³I esnan riba e tera yen di piedra ta esnan ku ora nan tende ta risibi e palabra ku goso; i esakinan no tin rais; nan ta kere pa un tempu, i den tempu di tentashon nan ta kai.

¹⁴I e simia ku a kai den mata di sumpina, esakinan ta esnan ku a tende, i segun ku nan ta sigui nan kaminda nan ta wordu hoga dor di preokupashonnan, rikesa i plasernan di bida, i nan fruta no ta madura.

¹⁵I e simia den bon tera ta esnan ku a tende e palabra ku un kurason onesto i bon, i ta retene esaki, i ta duna fruta ku perseveransia.

¹⁶"Awor ningun hende, despues di a sende un lampi, no ta tap'e ku un bari ni ta pon'e bou di kama; ma e ta pon'e riba un kandela, pa esnan ku drenta mira e lus.

¹⁷Pasobra no tin nada skondi ku lo no wordu revela, ni nada sekreto ku lo no bira konosi i sali na kla.

¹⁸Pesei, pone bon atenshon kon boso ta skucha; pasobra na esun ku tin, mas lo wordu duna; i esun ku no tin, asta loke e ta kere ku e tin lo wordu kita for di dje."

¹⁹I Su mama i ruman hombernan a bin serka djé i nan no por a yega serka djé pa motibu di e multitut.

²⁰I un hende a bis'E: "Bo mama i Bo ruman hombernan ta para pafo i kier miraBo."

²¹Ma El a kontesta i a bisa nan: "Mi mama i Mi ruman hombernan ta esnan ku ta tende e palabra di Dios i ta hasie."

²²Awor a sosode riba un di e dianan ei ku E ku Su disipelnan a bai den un boto, i El a bisa nan: "Laga nos krusa bai na e otro banda di e lago." I nan a bai.

²³Ma mientras nan tabata nabega El a pega sono; i a baha un tempestat di bientu fuerte riba e lago, i nan boto a kuminsa yena ku awa i nan tabata na peliger.

²⁴I nan a bai serka djé i a lant'E for di sono, bisando: "Maestro, Maestro, nos ta perese!" I El a lanta for di sono, a reprende e bientu i e olanan grandi, i nan a baha i a bira kalmo.

²⁵I El a bisa nan: "Unda boso fe ta?" I nan tabata spanta i asombra i nan tabata puntra otro: "Ta ken esaki ta anto, ku E ta asta ordena e bientunan i e awa, i nan ta obedes'E?"

²⁶I nan a nabega bai na tera di e gadarenonan, kual ta keda enfrente di Galilea.

²⁷I ora ku El a baha na tera, a bin kontr'E un homber for di e stat, kende tabata posei pa demono i kende pa hopi tempu no a pone pana na su kurpa, i no tabata biba den un kas, ma den e tumbanan.

²⁸I ora ku el a mira Jesus, el a dal un gritu i a tira su kurpa abou Su dilanti i a bisa na bos haltu: "Kiko mi tin di hasi ku Bo, Jesus, Yu di e Dios Haltisimo? Mi ta rogaBo, no tormentami."

²⁹Pasobra E tabata ordena e spiritu impuru pa sali for di e homber. Pasobra hopi biaha esaki a podera di dje; i e tabata mara ku kadena i bui i tabata bon sigura, ma asina mes e tabata ranka su kadenanan kibra i tabata wordu hiba den desierto dor di e demono.

³⁰I Jesus a puntr'e: "Kon bo nomber ta?" I el a kontesta: "Legion"; pasobra hopi demono a drenta den dje.

³¹I nan tabata rogu'E pa E no ordena nan sali bai den abismo.

³²Awor aya riba e seru tabatin un trupa grandi di porko ta kome; i e demononan a rogu'E pa permit! nan drenta den e porkonan. I El a permit! nan.

³³I e demononan a sali for di e homber i a drenta den e porkonan; i e trupa a basha na kareda for di e bahada steil, bai den e lago, i a hoga.

³⁴I ora ku e kuidadonan di porko a mira kiko a pasa, nan a kore bai i a konta esaki den stat i den kampo.

³⁵I e hendenan a sali bai mira kiko a pasa; i nan a bin serka Jesus, i a hana e homber, for di kende e demononan a sali, sinta abou na pia di Jesus, bisti i bon na su tino; i nan a hana miedu.

³⁶I esnan ku a mira esaki a konta nan kon e homber ku tabata posei pa demono a wordu kura.

³⁷I tur e hendenan di e tera di e gadarenonan i di e distrikto eibanda a pidié pa bai for di nan, pasobra un gran temor a podera di nan; i El a drenta un boto i a bai atrobe.

³⁸Ma e homber, for di kende e demononan a sali, tabata rogu'E pa e por a kompan'E; ma El a mand'e bai, bisando:

³⁹"Bai bo kas bek i konta ki kosnan grandi Dios a hasi pa bo." I el a bai i tabata proklama den henter e stat ki kosnan grandi Jesus a hasi p'e.

⁴⁰I ora Jesus a bolbe, e multitut a risibié, pasobra nan tur tabata sper'E.

⁴¹I mira, a bin un homber ku yama Jairo, i e tabata un ofisial di snoa; i el a tira su kurpa abou na pia di Jesus, i a kuminsa rogu'E pa bin su kas;

⁴²pasobra e tabatin un yu muhe so, di mas o menos diesdos ana, i esaki tabata muriendo. Ma mientras ku E tabata bai e multitutnan tabata pusha bin tur ront di djé.

⁴³I un muhe ku diesdos ana largu tabata sufri di un derama di sanger ku ningun hende no por a kura,

⁴⁴a aserka Jesus for di patras i a mishi ku zom di Su mantel; i mesora su derama di sanger a stop.

⁴⁵I Jesus a bisa: "Ta ken a mishi ku Mi?" I mientras ku nan tur tabata nenga esei, Pedro a bisa: "Maestro, e multitutnan ta tur ront di Bo i ta pusha bin riba Bo."

⁴⁶Ma Jesus a bisa: "Un hende a mishi ku Mi, pasobra Mi a sinti ku poder a sali for di Mi."

⁴⁷I ora ku e muhe a mira ku e no a keda sin wordu deskubri, el a bin na temblamentu i a tira su kurpa abou Su dilanti, i a deklara den presensia di tur hende e motibu pakiko el a mishi kuné, i kon el a wordu kura mesora.

⁴⁸I Jesus a bis'e: "Yu, bo fe a salbabo; bai na pas."

⁴⁹Mientras ku E tabata papia ainda, a bin un hende for di kas di e ofisial di snoa, bisando: "Bo yu muhe a muri; no molestia e Maestro mas."

⁵⁰Ma ora Jesus a tende esaki, El a kontest'e: "No tene miedu mas; kere solamente, i e lo wordu salba."

⁵¹I ora ku El a yega na e kas, E no a permit! ningun hende drenta huntu kuné, sino solamente Pedro, Juan i Santiago, i tata i mama di e mucha muhe.

⁵²Awor nan tur tabata yora i lamenta p'e; ma El a bisa: "Stop di yora, pasobra e no a muri, ma ta na sono e ta."

⁵³I nan a kuminsa harié, pasobra nan tabata sa ku el a muri.

⁵⁴Ma El a kohe e mucha na su man i a bisa na bos haltu: "Mucha, lanta!"

⁵⁵I e mucha su spiritu a bolbe i el a lanta mesora; i Jesus a duna ordu pa dun'e algu di kome.

⁵⁶I su mayornan a keda masha asombra, ma El a ordena nan pa no konta ningun hende kiko a pasa.