Read Papantla Totonac Lukas 9 Bible Online

Lukas 9 - Papantla Totonac bible

Lukas 9

¹I El a yama e diesdosnan huntu i a duna nan poder i outoridat riba tur demono, i pa kura enfermedatnan.

²I El a manda nan bai proklama e reino di Dios, i kura hende malu.

³I El a bisa nan: "No hiba nada pa na kaminda, ni garoti, ni saku, ni pan, ni plaka, ni ningun tunika ekstra.

⁴I den kualke kas ku boso drenta, keda einan, i sigui biaha for di einan.

⁵I pa loke ta esnan ku no risibi boso, ora boso sali bai for di e stat ei, sakudi e stof kita for di boso pia komo un testimonio kontra nan."

⁶I nan a sali i a kuminsa pasa den tur e pueblitonan, predikando e evangelio, i kurando e enfermonan tur kaminda.

⁷Awor Herodes, e tetrarka, a tende di tur loke tabata sosode; i el a keda hopi konfundi, pasobra algun tabata bisa ku Juan a lanta for di e mortonan,

⁸i algun, ku Elias a parese, i otronan, ku un di e profetanan di prome aya a lanta for di e mortonan.

⁹I Herodes a bisa: "T'ami a laga kap Juan su kabes afo; ma ta ken e homber aki ta, di kende mi ta tende e kosnan aki?" I e tabata sigui buska pa mir'E.

¹⁰I ora ku e apostelnan a bolbe, nan a kont'E tur loke nan a hasi. I El a hiba nan huntu kuné i a bai ku nan so na un stat ku yama Betsaida.

¹¹Ma e multitutnan tabata sa esaki i tabata siguié; i El a risibi nan i tabata papia ku nan tokante di e reino di Dios; i esnan ku mester a wordu kura, El a kura.

¹²Ora ku a kuminsa bira tardi e diesdosnan a bin bis'E: "Manda e multitut bai, pa nan bai na e pueblitonan i kamponan akibanda pa hana luga di keda i pa hana algu di kome, pasobra aki nos ta na un luga desola."

¹³Ma El a bisa nan: "Boso duna nan algu di kome!" I nan a bisa: "Nos no tin nada mas ku sinku pan i dos piska, of nos mester bai kumpra kuminda pa tur e hendenan aki."

¹⁴Pasobra tabatin mas o menos sinku mil hende homber. I El a bisa Su disipelnan: "Laga nan sint'abou na gruponan di sinkuenta."

¹⁵I asina nan a hasi, i a laga nan tur sint'abou.

¹⁶I El a kohe e sinku pannan i e dos piskanan, i mirando ariba na shelu El a bendishona nan i a kibra nan, i a duna nan na e disipelnan pa pone dilanti di e multitut.

¹⁷I nan tur a kome keda barika yen; i e pida-pidanan ku nan a sobra a wordu rekohi, diesdos makutu yen.

¹⁸I a sosode ku mientras ku E tabata hasi orashon Su so, e disipelnan tabata huntu kuné, i El a hasi nan pregunta, bisando: "Ta ken e multitutnan ta bisa ku Mi ta?"

¹⁹I nan a kontesta i a bisa: "Juan Boutista; i otronan ta bisa: Elias; ma otronan, ku un di e profetanan di prome aya a lanta for di e mortonan."

²⁰I El a bisa nan: "Ma ta ken boso ta bisa ku Mi ta?" I Pedro a kontesta i a bisa: "E Cristo di Dios."

²¹I El a taha nan striktamente i a ordena nan pa no konta ningun hende esaki,

²²bisando: "E Yu di Hende mester sufri hopi kos i wordu rechasa pa e ansianonan i saserdotenan prinsipal i eskribanan, i wordu mata, i wordu lanta riba e di tres dia."

²³I El a bisa nan tur: "Si un hende kier bin Mi tras, lagu'e nenga su mes i hisa su krus tur dia i siguiMi.

²⁴Pasobra ken ku kier salba su bida lo perd'e, ma ken ku perde su bida pa Mi kousa, e ta esun ku lo salb'e.

²⁵Pasobra ki probecho un hende tin si e gana henter mundu i e mes keda destrui of perdi?

²⁶Pasobra ken ku tin berguensa di Mi i di Mi palabranan, di dje e Yu di Hende lo tin berguensa ora ku E bin den Su gloria, i e gloria di e Tata i di e angelnan santu.

²⁷Ma di berdat Mi ta bisa boso, tin algun di esnan ku ta para akinan, ku lo no eksperensia morto prome ku nan mira e reino di Dios."

²⁸I un ocho dia asina despues di e palabranan aki, a sosode ku El a hiba Pedro i Juan i Santiago huntu kuné, i a subi bai riba e seru pa hasi orashon.

²⁹I mientras ku E tabata hasi orashon e aparensia di Su kara a kambia, i Su pananan a bira blanku i briyante.

³⁰I mira, dos homber tabata kombersa kuné; i esakinan tabata Moises i Elias,

³¹kendenan, paresiendo den gloria, tabata papia di Jesus Su salida ku E tabata bai kumpli kune na Jerusalem.

³²Awor sono a podera di Pedro i di esnan ku tabata huntu kune; ma ora nan a spierta, nan a mira Su gloria i dos homber para huntu kuné.

³³I a sosode ku ora esakinan tabata despedi di djé, Pedro a bisa Jesus: "Maestro, ta bon pa nos ta akinan; i laga nos traha tres tabernakel: un pa Bo, un pa Moises i un pa Elias"--sin realisa kiko e tabata bisa.

³⁴I mientras ku e tabata bisa esaki, a forma un nubia ku a sombra nan; i nan a hana miedu ora nan tabata drenta den e nubia.

³⁵I a sali un bos for di den e nubia, bisando: "Esaki ta Mi Yu Skohi; tende na djé!"

³⁶I ora ku e bos a stop di papia, Jesus so a keda. I nan a keda ketu, i den e dianan ei nan no a konta ningun hende nada di e kosnan ku nan a mira.

³⁷I riba e siguiente dia, ora nan a baha for di e seru, un multitut grandi a bin kontr'E.

³⁸I mira, un homber for di den e multitut tabata grita, bisando: "Maestro, mi ta rogaBo pa wak mi yu homber, pasobra e ta mi uniko yu homber,

³⁹i mira, un spiritu ta gar'e, i direpiente e ta kuminsa grita, i e ta pon'e hana steipi te skuma, i ora ku e ta maltrat'e, kasi e no ta lagu'e los.

⁴⁰I mi a roga Bo disipelnan pa nan saka e spiritu impuru afo, ma nan no tabata por."

⁴¹I Jesus a kontesta i a bisa: "O generashon inkredulo i perverso, kuantu tempu mas lo Mi ta serka boso, i mester soporta boso? Trese bo yu akinan."

⁴²I mientras ku e tabata aserkando, e demono a bent'e abou na suela i a pon'e hana steipi. Ma Jesus a reprende e spiritu impuru i a kura e mucha homber i a dun'e bek na su tata.

⁴³I nan tur a keda asombra di e grandesa di Dios. Ma mientras ku tur hende tabata keda atmira di tur loke Jesus tabata hasi, El a bisa Su disipelnan:

⁴⁴"Laga e palabranan aki penetra den boso orea, pasobra e Yu di Hende lo wordu entrega den man di hende."

⁴⁵Ma nan no a komprende e palabranan aki, i esaki a keda skondi pa nan, asina ku nan no por a komprend'e; i nan tabatin miedu di puntr'E tokante di e palabranan aki.

⁴⁶I a lanta un diskushon entre nan, kual di nan lo tabata esun di mas grandi.

⁴⁷Ma Jesus, sabiendo kiko nan tabata pensa den nan kurason, a kohe un mucha i a pon'e para banda di djé,

⁴⁸i a bisa nan: "Ken ku risibi e mucha aki den Mi nomber, ta Ami e ta risibi; i ken ku risibiMi, ta risibi Esun ku a mandaMi; pasobra esun di mas chikitu den boso, t'esei ta esun di mas grandi."

⁴⁹I Juan a kontesta i a bisa: "Maestro, nos a mira un hende ta saka demono den Bo nomber; i nos a tah'e, pasobra e no ta un di nos."

⁵⁰Ma Jesus a bis'e: "No tah'e, pasobra esun ku no ta kontra boso ta ku boso."

⁵¹I a sosode ku ora e dianan di Su asenshon tabata aserkando, El a dirigi Su kara pa bai Jerusalem;

⁵²i El a manda mensaheronan Su dilanti. I nan a bai i a drenta den un pueblito di e samaritanonan pa hasi preparashon p'E.

⁵³Ma nan no a risibié, pasobra E tabata biahando ku Su kara fiho den direkshon di Jerusalem.

⁵⁴I ora Su disipelnan Santiago i Juan a ripara esaki, nan a puntra: "Senor, Bo kier pa nos ordena kandela baha for di shelu i kaba ku nan, manera Elias a hasi?"

⁵⁵Ma El a drai wak, i a reprende nan, [i a bisa: "Boso no sa di ki sorto di spiritu boso ta;

⁵⁶pasobra e Yu di Hende no a bin pa destrui bida di hende, ma pa salba nan."] I nan a sigui nan kaminda bai un otro pueblito.

⁵⁷I ora nan tabata na kaminda, un hende a bis'E: "Lo mi siguiBo unda ku Bo bai."

⁵⁸I Jesus a bis'e: "Zoro tin kueba i parha di shelu tin neishi, ma e Yu di Hende no tin ningun luga pa pone Su kabes."

⁵⁹I El a bisa un otro: "SiguiMi." Ma el a kontesta: "Permitimi prome pa bai i dera mi tata."

⁶⁰Ma El a bis'e: "Laga e mortonan dera nan mortonan; ma pa loke t'abo, bai i proklama e reino di Dios tur kaminda."

⁶¹I un otro tambe a bisa: "Lo mi siguiBo, Senor; ma permitimi prome pa despedi di mi hendenan di kas."

⁶²Ma Jesus a bis'e: "Ningun hende ku ta pone man na plug i ta wak patras no ta apto pa e reino di Dios."