Read Papantla Totonac Deuteronomio 1 Bible Online

Deuteronomio 1 - Papantla Totonac bible

Deuteronomio 1

¹Esakinan ta e palabranan ku Moises a papia ku henter Israel na e otro banda di Jordan den desierto, na Araba enfrente di Suf, entre Paran i Tofel, Laban, Hazerot i Dizahab.

²For di Horeb, siguiendo e kaminda di Seru Seir pa Kades-barnea, ta un biahe di diesun dia.

³I a sosode ku den e di kuarenta ana, riba e prome dia di e di diesun luna, Moises a papia ku e yunan di Israel, konforme tur loke SENOR a orden'e pa duna nan,

⁴despues ku el a derota Sehon, rei di e amoreonan, kende tabata biba na Hesbon, i Og, rei di Basan, kende tabata biba na Astarot i Edrei.

⁵Na e otro banda di Jordan, na tera di Moab, Moises a kuminsa splika e lei aki, bisando:

⁶"SENOR nos Dios a papia ku nos na Horeb, bisando: 'Boso a keda basta tempu kaba na e seru aki.

⁷Bira i sigui boso biahe, i bai na e serunan di e amoreonan i serka tur nan bisinanan na Araba, den e serunan i den vaye, na Negev i na kosta di laman, e tera di e kananeonan, i Libano, te na e riu grandi, Riu Eufrates.

⁸Mira, mi a pone e tera boso dilanti; drenta i podera di e tera ku SENOR a hura di duna na boso tatanan, na Abraham, Isaak i Jakob, na nan i na nan desendientenan despues di nan.'

⁹"I mi a papia ku boso e tempu ei, bisando: 'Ami so no por karga e responsabilidat aki pa boso.

¹⁰SENOR boso Dios a multiplika boso, i mira, awe boso ta manera e streanan di shelu den kantidat.

¹¹Ku SENOR, e Dios di boso tatanan, oumenta boso mil biaha mas tantu di loke boso ta, i bendishona boso, meskos ku El a priminti boso!

¹²Kon ami so por karga e peso i e responsabilidat pa boso i boso pleitunan?

¹³Skohe for di boso tribunan hombernan sabi ku tin disernimentu i eksperensia, i ami lo nombra nan komo boso kabesantenan.'

¹⁴"I boso a kontestami i a bisa: 'Loke bo a bisa pa hasi ta bon.'

¹⁵"Asina mi a tuma e kabesantenan di boso tribunan, hombernan sabi i ku eksperensia, i a nombra nan komo kabesante riba boso, lidernan di milnan i di shennan, di sinkuentanan i di diesnan, i ofisialnan pa boso tribunan.

¹⁶I e tempu ei mi a enkarga boso huesnan, bisando: 'Tende e kasonan entre boso paisanonan, i huzga hustamente entre un homber i su paisano, of e stranhero ku ta biba serka dje.

¹⁷No hasi distinshon di persona den huzgamentu; tende chikitu i grandi igual. No tene miedu di hende, pasobra huzgamentu ta di Dios. I e kaso ku ta muchu difisil pa boso, tres'e serka mi i lo mi tende esei.'

¹⁸I e tempu ei mi a ordena boso tur loke boso mester a hasi.

¹⁹"Anto nos a sali for di Horeb i a pasa dor di henter e desierto grandi i teribel ei ku boso a mira, na kaminda pa e serunan di e amoreonan, meskos ku SENOR nos Dios a ordena nos; i nos a yega Kades-barnea.

²⁰I mi a bisa boso: 'Boso a yega na e serunan di e amoreonan ku SENOR nos Dios ta bai duna nos.

²¹Mira, SENOR boso Dios a pone e tera boso dilanti; bai, podera di dje, manera SENOR, e Dios di boso tatanan, a papia ku boso. No tene miedu ni desmaya.'

²²"E ora ei boso tur a aserkami i a bisa: 'Laga nos manda hombernan nos dilanti, pa nan spiona e tera pa nos, i trese informashon pa nos di e kaminda pa kual nos tin ku sigui, i di e statnan ku nos lo drenta.'

²³"I esaki a parsemi bon i mi a tuma diesdos di boso hombernan, un homber pa kada tribu.

²⁴I nan a bira i a subi bai den e serunan i a yega na e vaye di Eskol i a spion'e.

²⁵E ora ei nan a kohe di e fruta di e tera den nan man i a trese esaki pa nos, i nan a trese un reportahe pa nos i a bisa: 'E tera ku SENOR nos Dios ta bai duna nos ta bon.'

²⁶"Sinembargo, boso no tabata kier a bai, ma a rebeldia kontra e ordu di SENOR boso Dios;

²⁷i boso tabata murmura den boso tentnan i a bisa: 'Ta pasobra SENOR ta odia nos El a saka nos for di tera di Egipto pa entrega nos den man di e amoreonan pa destrui nos.

²⁸Unda nos por subi bai? Nos rumannan a hasi nos kurason dirti, bisando: "E hendenan ta mas grandi i mas haltu ku nos; e statnan ta grandi i fortifika te na shelu. I ademas, nos a mira e yu hombernan di e anakeonan ayanan."'

²⁹"E ora ei mi a bisa boso: 'No spanta ni tene miedu di nan.

³⁰SENOR boso Dios, Kende ta bai boso dilanti, E mes lo bringa pa boso, meskos ku El a hasi pa boso na Egipto dilanti di boso bista,

³¹i den desierto, kaminda boso a mira kon SENOR boso Dios a karga boso, meskos ku un homber ta karga su yu, riba henter e kaminda ku boso a kana, te ora boso a yega na e luga aki.'

³²"Ma apesar di tur esaki boso no a konfia den SENOR boso Dios,

³³Kende ta bai boso dilanti riba boso kaminda pa buska un luga pa boso kampa: anochi den un kandela i di dia den un nubia, pa mustra boso e kaminda ku boso mester pasa.

³⁴"E ora ei SENOR a tende boso palabranan i E tabata rabia i a hasi un huramentu, bisando:

³⁵'Ni un di e hombernan aki, e generashon malbado aki, lo no mira e bon tera ku Mi a hura di duna boso tatanan,

³⁶ku eksepshon di Kaleb, yu homber di Jefone; e si lo mir'e, i e ku su yu hombernan lo Mi duna e tera ku el a pone su pia ariba, pasobra el a sigui SENOR kompletamente.'

³⁷"Pa boso motibu SENOR tabata rabia ku mi tambe, bisando: 'Ni abo tampoko lo no drenta ayanan.

³⁸Josue, yu homber di Nun, kende ta para bo dilanti, e si lo drenta ayanan; enkurash'e, pasobra e lo hasi Israel ered'e.

³⁹Ademas, boso yu chikitunan ku boso a bisa ku nan lo a bira viktima, i boso yu hombernan ku na e momento aki no tin konosementu di bon i malu, lo drenta ayanan, i lo Mi duna nan e tera, i nan lo podera di dje.

⁴⁰Ma pa loke ta boso, bira bai den desierto i pasa pa e kaminda di Laman Kora.'

⁴¹"E ora ei boso a kontesta i a bisami: 'Nos a peka kontra SENOR; nos kier subi bai i bringa, meskos ku SENOR nos Dios a ordena nos.' I kada un di boso a faha su mes ku su armanan di guera, i a konsidera esaki komo algu fasil pa subi bai den e serunan.

⁴²"I SENOR a bisami: 'Bisa nan: "No subi bai ni bringa, pasobra Mi no ta meimei di boso, pa boso no wordu derota dilanti di boso enemigunan."'

⁴³"Asina mi a papia ku boso, ma boso no kier a skucha. Ma boso a rebeldia kontra e ordu di SENOR i a aktua ku tribilidat i a subi bai den e serunan.

⁴⁴I e amoreonan, kendenan tabata biba den e serunan ei, a sali bin kontra boso, i a kore ku boso manera abeha ta hasi, i a derota boso for di Seir te na Horma.

⁴⁵E ora ei boso a bolbe i a yora dilanti di SENOR; ma SENOR no a skucha boso bos, ni a paga atenshon na boso.

⁴⁶Asina boso a keda hopi dia na Kades, tur e tempu ku boso a pasa ayanan.