Read Papantla Totonac Deuteronomio 10 Bible Online

Deuteronomio 10 - Papantla Totonac bible

Deuteronomio 10

¹"E tempu ei SENOR a bisami: 'Kap pa bo mes dos tabla-di-piedra manera esunnan di prome, i subi bin serka Mi riba seru i traha un arka di palu pa bo mes.

²I lo Mi skirbi riba e tablanan e palabranan ku tabatin riba e prome tablanan ku bo a kibra na pida-pida, i bo mester pone nan den e arka.'

³"Asina mi a traha un arka di palu di akasia i a kap dos tabla-di-piedra manera esunnan di prome, i a subi bai riba e seru ku e dos tablanan den mi man.

⁴I El a skirbi riba e tablanan konforme e prome skirbimentu, e Dies Mandamentunan ku SENOR a papia ku boso riba e seru for di meimei di e kandela riba e dia di asamblea, i SENOR a dunami nan.

⁵E ora ei mi a bira i a baha for di e seru i a pone e tablanan den e arka ku mi a traha; i aya nan a keda, manera SENOR a ordenami."

⁶(Awor e yunan di Israel a sali for di Beerot-bene-jaakan, bai Mosera. Aya Aaron a muri i aya nan a der'e, i su yu homber Eleazar a sirbi komo saserdote na su luga.

⁷For di aya nan a sali pa Gudgoda, i for di Gudgoda pa Jotbata, un tera yen di roi di awa.

⁸E tempu ei SENOR a aparta e tribu di Levi pa karga e arka di aliansa di SENOR, pa para dilanti di SENOR pa sirbié i pa bendishona den Su nomber te dia djawe.

⁹Pesei Levi no tin parti ni erensia ku su ruman hombernan; SENOR ta su erensia, meskos ku SENOR bo Dios a bis'e.)

¹⁰"Ademas, mi a keda riba e seru kuarenta dia i kuarenta nochi, manera e prome biaha, i SENOR a skuchami e biaha ei tambe; SENOR no kier a destruibo.

¹¹E ora ei SENOR a bisami: 'Lanta, sigui bo biahe dilanti di e pueblo, pa nan drenta i podera di e tera ku Mi a hura na nan tatanan di duna nan.'

¹²"I awor, Israel, kiko SENOR bo Dios ta pidi di bo, si no ta pa teme SENOR bo Dios, pa kana den tur Su kamindanan i stim'E, i pa sirbi SENOR bo Dios ku henter bo kurason i ku henter bo alma,

¹³i pa warda e mandamentunan di SENOR i Su statutonan ku mi ta ordenabo awe pa bo mes bon?

¹⁴"Mira, na SENOR bo Dios ta pertenese shelu i e shelu di shelunan, tera i tur loke tin den dje.

¹⁵Sinembargo, ta riba bo tatanan SENOR a pone Su afekshon pa stima nan, i El a skohe boso, nan desendientenan despues di nan, riba tur pueblo, manera ta awe.

¹⁶Sirkumsida anto e prepusio di boso kurason i no hasi boso nek steif mas.

¹⁷Pasobra SENOR boso Dios ta e Dios di diosnan i e Senor di senornan, e Dios grandi, poderoso i temibel, Kende no ta hasi distinshon di persona, ni ta asepta plaka pasa bou di mesa.

¹⁸E ta hasi hustisia na werfano i biuda, i ta mustra Su amor pa e stranhero dor di dun'e kuminda i pana pa bisti.

¹⁹Asina anto, mustra boso amor pa e stranheronan, pasobra boso tabata stranhero na tera di Egipto.

²⁰Teme SENOR bo Dios i sirbié; pega na djé i hura den Su nomber.

²¹E ta bo alabansa i E ta bo Dios, Kende a hasi e kosnan grandi i temibel aki pa bo ku bo wowo a mira.

²²Bo tatanan a baha bai Egipto, setenta persona na tur, i awor SENOR bo Dios a hasibo mes hopi ku e streanan di shelu.