Read Papantla Totonac Deuteronomio 11 Bible Online

Deuteronomio 11 - Papantla Totonac bible

Deuteronomio 11

¹"Pesei, stima SENOR bo Dios i semper kumpli ku Su enkargo, Su statutonan, Su ordenansanan i Su mandamentunan.

²I komprende awe ku mi no ta papia ku boso yunan ku no a konose ni a mira e disiplina di SENOR boso Dios, Su grandesa, Su man poderoso i Su brasa ekstendi,

³i Su senalnan i Su obranan ku El a hasi meimei di Egipto ku Farao, rei di Egipto, i ku henter su tera;

⁴i loke El a hasi ku e ehersito di Egipto, ku su kabainan i su garoshinan, dia ku El a hasi e awa di Laman Kora pasa riba nan, ora nan tabata persigui boso, i kon SENOR a destrui nan kompletamente;

⁵i loke El a hasi ku boso den desierto te ora boso a yega na e luga aki;

⁶i loke El a hasi ku Datan i Abiram, e yu hombernan di Eliab, yu homber di Ruben, ora tera a habri su boka traga nan, nan famianan, nan tentnan i tur ser bibu ku tabata sigui nan, meimei di henter Israel--

⁷ma boso mes wowo a mira henter e gran obra di SENOR ku El a hasi.

⁸"Pesei, warda tur mandamentu ku mi ta ordena boso awe, pa boso ta fuerte, i pa boso drenta i podera di e tera ku boso ta bai krusa pa podera di dje;

⁹pa boso prolonga boso dianan riba e tera ku SENOR a hura na boso tatanan di duna nan i nan desendientenan, un tera ku tin lechi i miel na abundansia.

¹⁰Pasobra e tera ku bo ta bai drenta pa podera di dje no ta manera tera di Egipto for di kual boso a bin, kaminda bo tabata sembra bo simia i muh'e ku bo pia manera ta muha un hofi di berdura.

¹¹Ma e tera ku boso ta bai krusa pa podera di dje, un tera di seru i vaye, ta bebe awa di yobida di shelu,

¹²un tera ku SENOR bo Dios ta perkura p'e; semper wowo di SENOR bo Dios ta riba dje, for di prinsipio di ana te na fin.

¹³"I lo sosode ku si boso obedese kuidadosamente mi mandamentunan ku mi ta ordena boso awe, pa stima SENOR boso Dios i pa sirbié ku henter boso kurason i henter boso alma,

¹⁴E lo duna awaseru pa boso tera na su tempu, e awaseru tempran i e awaseru lat, pa bo por rekohe bo trigo, bo bina nobo i bo zeta.

¹⁵I E lo duna yerba den bo kunukunan pa bo bestianan, i lo bo kome i keda satisfecho.

¹⁶"Tene kuidou pa boso kurason no wordu gana i boso bira bai i sirbi otro diosnan i adora nan.

¹⁷Sino e rabia di SENOR lo sende kontra boso, i E lo sera e shelunan, asina ku lo no tin awaseru, ni tera lo no duna su fruta; i boso lo perese mesora for di e bon tera ku SENOR ta duna boso.

¹⁸Pesei, pone e palabranan aki di mi den boso kurason i den boso alma; i mara nan komo un senal na boso man, i nan lo ta manera banchi na boso frenta.

¹⁹Sina boso yunan e palabranan aki, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.

²⁰I skirbi nan riba e koseinnan-di-porta di bo kas i riba bo portanan di kura,

²¹pa boso dianan i e dianan di boso yu hombernan lo ta multiplika riba e tera ku SENOR a hura na boso tatanan di duna nan, tanten ku e shelunan ta keda ariba di tera.

²²"Pasobra si boso perkura di warda henter e mandamentu aki ku Mi ta ordena boso pa boso kumpli kune, pa stima SENOR boso Dios, pa kana den tur Su kamindanan i tene duru na djé,

²³e ora ei SENOR lo kore ku tur e nashonnan aki for di boso dilanti, i boso lo kore ku nashonnan mas grandi i mas poderoso ku boso.

²⁴Tur luga ku boso plant'i pia trapa lo ta di boso; boso frontera lo ta for di e desierto te na Libano i for di e riu, Riu Eufrates, te na e Laman di Pabou.

²⁵Ningun hende lo no por para boso dilanti; SENOR boso Dios lo pone miedu i temor pa boso riba henter e tera ku boso pone boso pia ariba, manera El a bisa boso.

²⁶"Mira, mi ta pone awe boso dilanti un bendishon i un maldishon:

²⁷e bendishon, si boso skucha e mandamentunan di SENOR boso Dios, ku mi ta ordena boso awe;

²⁸i e maldishon, si boso no skucha e mandamentunan di SENOR boso Dios, ma ta bira bai for di e kaminda ku mi ta ordena boso awe, dor di sigui otro diosnan ku boso no a konose.

²⁹I lo sosode ku ora SENOR bo Dios tresebo den e tera ku bo ta bai drenta pa podera di dje, bo mester pone e bendishon riba Seru Gerizim i e maldishon riba Seru Ebal.

³⁰No ta na e otro banda di Jordan, pabou di e kaminda den direkshon di kaminda solo ta baha, na tera di e kananeonan ku ta biba na Araba, dilanti di Gilgal, banda di e palunan di eik di More, nan ta keda?

³¹Pasobra boso ta na punto di krusa Jordan pa drenta i podera di e tera ku SENOR boso Dios ta duna boso, i boso mester podera di dje i biba den dje,

³²i boso mester perkura di kumpli ku tur e statutonan i huisionan ku mi ta pone boso dilanti awe.