Read Papantla Totonac Deuteronomio 12 Bible Online

Deuteronomio 12 - Papantla Totonac bible

Deuteronomio 12

¹"Esakinan ta e statutonan i e huisionan ku boso mester perkura di kumpli ku nan na e tera ku SENOR, e Dios di bo tatanan, a dunabo pa bo podera di dje tanten ku boso ta biba riba tera.

²Boso mester destrui henteramente tur e luganan kaminda e nashonnan, ku boso mester kore ku nan, ta sirbi nan diosnan, riba e montananan haltu, riba e serunan i bou di tur palu berde.

³I boso mester basha nan altarnan abou, kibra nan pilarnan sagrado na pida-pida i kima nan imagennan di Asera ku kandela; i boso mester kap e imagennan graba di nan diosnan bash'abou, i kita nan nomber kompletamente for di e luga ei.

⁴Boso no mester aktua na e manera aki pa ku SENOR boso Dios.

⁵Ma boso mester buska SENOR na e luga ku SENOR boso Dios lo skohe for di tur boso tribunan, pa stablese Su nomber ayanan komo Su luga di biba, i ayanan boso mester bai.

⁶I ayanan boso mester hiba boso ofrendanan kima, boso sakrifisionan, boso diesmonan, e ofrendanan di halsamentu, boso ofrendanan di promesa, boso ofrendanan boluntario i e primogenitonan di boso kria di baka i di boso tou di bestia chikitu.

⁷Ayanan tambe boso i e hendenan di boso kas mester kome dilanti di SENOR boso Dios, i regosiha den tur obra di boso man, ku SENOR bo Dios a bendishonabo kune.

⁸"Di ningun manera boso no mester hasi loke nos ta hasi aki awe: tur hende ta hasi loke ta korekto den su mes bista.

⁹Pasobra te ainda boso no a yega na e luga di sosiegu i e erensia ku SENOR boso Dios ta duna boso.

¹⁰Ora boso krusa Jordan i ta biba den e tera ku SENOR boso Dios ta duna boso pa ereda, i E duna boso sosiegu for di tur boso enemigunan ront di boso, asina ku boso ta biba den siguridat,

¹¹e ora ei lo sosode ku na e luga ku SENOR boso Dios lo skohe pa Su nomber keda, ayanan boso mester trese tur loke mi ordena boso: boso ofrendanan kima, boso sakrifisionan, boso diesmonan, e ofrenda di halsamentu i tur boso ofrendanan di promesa di mas miho, ku boso mester hura na SENOR.

¹²I regosiha dilanti di SENOR boso Dios, boso i boso yu hombernan i yu muhenan, boso sirbidonan homber i sirbidonan muhe i e levita ku ta biba paden di boso portanan di stat, komo ku e no tin parti ni erensia ku boso.

¹³Perkura pa bo no ofrese bo ofrendanan kima na kualke luga ku bo mira,

¹⁴sino na e luga ku SENOR skohe den un di bo tribunan, ayanan bo mester ofrese bo ofrendanan kima, i ayanan bo mester hasi tur loke mi ordenabo.

¹⁵" Sinembargo, bo por mata i kome karni paden di tur bo portanan di stat, tur loke bo kurason ta desea, segun e bendishon di SENOR bo Dios ku El a dunabo; tantu e hende impuru komo esun limpi por kome di dje, manera ta kome gasel of bina.

¹⁶Solamente, boso no mag kome e sanger; boso mester bash'e riba tera manera awa.

¹⁷Paden di bo portanan di stat bo no mag kome e diesmo di bo mainshi, ni bina nobo ni zeta, ni e primogenitonan di bo kria di baka ni di bo tou di bestia chikitu, ni ningun di bo ofrendanan di promesa ku bo ta priminti, ni bo ofrendanan boluntario, ni bo ofrenda di halsamentu.

¹⁸Ma bo mester kome nan dilanti di SENOR bo Dios na e luga ku SENOR bo Dios lo skohe, abo ku bo yu homber i yu muhe, bo sirbidonan homber i sirbidonan muhe, i e levita ku ta biba paden di bo portanan di stat; i bo mester regosiha dilanti di SENOR bo Dios den tur obra di bo man.

¹⁹Perkura pa bo no bandona e levita tanten ku bo ta biba na bo tera.

²⁰"Ora SENOR bo Dios ekstende bo frontera manera El a primintibo, i bo bisa: 'Mi kier kome karni,' pasobra bo tin deseo di kome karni, e ora ei bo mag kome karni, manera bo kurason ta desea.

²¹Si e luga ku SENOR bo Dios skohe pa pone Su nomber ta muchu leu for di bo, e ora ei bo por mata di bo kria di baka i di bo tou di bestia chikitu ku SENOR a dunabo, manera mi a ordenabo; i bo por kome paden di bo portanan di stat tur loke bo kurason ta desea.

²²Manera ta kome gasel of bina, asina bo mester kom'e; tantu e hende impuru komo esun limpi por kome di dje.

²³Solamente, sea sigur di no kome e sanger, pasobra e sanger ta e bida, i bo no mag kome e bida huntu ku e karni.

²⁴Bo no mag kom'e; bo mester bash'e riba suela manera awa.

²⁵No kom'e, pa bai bon ku bo i ku bo yu hombernan despues di bo, pasobra lo bo ta hasiendo loke ta bon den bista di SENOR.

²⁶"Solamente e kosnan santu ku bo tin i bo ofrendanan di promesa bo mester kohe i bai na e luga ku SENOR skohe.

²⁷I ofrese bo ofrendanan kima, e karni i e sanger, riba e altar di SENOR bo Dios; i e sanger di bo sakrifisionan mester wordu basha riba e altar di SENOR bo Dios, ma e karni bo mag kome.

²⁸Perkura di skucha tur e palabranan aki ku mi ta ordenabo, pa bai bon ku bo i ku bo yu hombernan despues di bo pa semper, pasobra lo bo ta hasiendo loke ta bon i korekto den bista di SENOR bo Dios.

²⁹"Ora SENOR bo Dios korta kita for di bo dilanti e nashonnan na unda bo ta bai pa kore ku nan, i bo kore ku nan i biba den nan tera,

³⁰perkura pa bo no kai den e trampa di sigui nan, despues ku nan ta keda destrui bo dilanti, i pa bo no informa tokante di nan diosnan, bisando: 'Kon e nashonnan aki ta sirbi nan diosnan, pa ami tambe hasi meskos?'

³¹Bo no mester komportabo asina pa ku SENOR bo Dios, pasobra tur echo abominabel ku SENOR ta odia nan a hasi pa nan diosnan; pasobra asta nan yu hombernan i yu muhenan nan ta kima den kandela na nan diosnan.

³²"Perkura di kumpli ku tur loke mi ordenabo; no anadi ni kita for di dje.