Read Papantla Totonac Deuteronomio 14 Bible Online

Deuteronomio 14 - Papantla Totonac bible

Deuteronomio 14

¹"Boso ta e yunan di SENOR boso Dios; boso no mag korta boso mes, ni feita boso frenta pa motibu di un morto.

²Pasobra bo ta un pueblo santu na SENOR bo Dios; i SENOR a skohebo pa ta un pueblo pekuliar pa Su mes for di tur e pueblonan ku tin riba superfisio di tera.

³"No kome nada abominabel.

⁴Esakinan ta e bestianan ku boso mag kome: buey, karne, kabritu,

⁵bina, gasel, bina di dam, kabritu di mondi, kabritu di seru, antilope i karne di seru.

⁶I entre e bestianan, tur loke tin huf dividi i ku tin huf kompletamente gespleit i ku ta kou kuminda dos biaha, eseinan boso mag kome.

⁷Sinembargo, di esakinan boso no mag kome entre esnan ku ta kou kuminda dos biaha, of entre esnan ku tin huf dividi: kamel, has i konenchi di baranka, pasobra ounke nan ta kou kuminda dos biaha, nan no tin huf dividi; nan ta impuru pa boso.

⁸I porko, pasobra e tin huf dividi si, ma no ta kou kuminda dos biaha, e ta impuru pa boso. Boso no mag kome nada di nan karni ni mishi ku nan kadaver.

⁹"Esakinan boso mag kome di tur loke tin den awa: tur loke tin hala i skama boso mag kome,

¹⁰ma tur loke no tin hala i skama boso no mag kome; esei ta impuru pa boso.

¹¹"Boso mag kome tur parha limpi.

¹²Ma esakinan ta esunnan ku boso no mag kome: aguila, falki-kibrado-di-wesu i falki pretu,

¹³warawara kora, falki i tur sorto di warawara,

¹⁴i tur sorto di raf,

¹⁵abestrus, shoko, meuchi i tur sorto di kinikini,

¹⁶shoko chikitu, shoko grandi, shoko blanku,

¹⁷pelikan, falki ku ta kome bestia morto, samuro,

¹⁸oyevar, tur sorto di garabet, i bubi i raton di anochi.

¹⁹"Tur insekto ku tin hala ta impuru pa boso; boso no mag kome nan.

²⁰Tur parha limpi boso mag kome.

²¹"No kome nada ku muri di su mes. Bo mag duna esaki na e stranhero ku ta keda den bo stat, pa e kom'e, of bo por bend'e ku un stranhero, pasobra abo ta un pueblo santu na SENOR bo Dios. "No herebe un yu di kabritu den lechi di su mama.

²²"Siguramente bo mester duna e diesmo di henter e produkshon di loke bo ta sembra, loke kunuku ta produsi tur ana.

²³I kome den e presensia di SENOR bo Dios, na e luga ku E skohe pa stablese Su nomber, e diesmo di bo mainshi, bo bina nobo i bo zeta, i e primogenitonan di bo kria di baka i di bo tou di bestia chikitu, pa bo sina di teme SENOR bo Dios pa semper.

²⁴I si e distansia ta asina grandi pa bo ku bo no por trese e diesmo, komo ku e luga ku SENOR bo Dios ta skohe pa pone Su nomber ta muchu leu for di bo ora SENOR bo Dios bendishonabo,

²⁵e ora ei kambi'e pa plaka, i tuma e plaka den bo man i bai na e luga ku SENOR bo Dios skohe.

²⁶I bo mag gasta e plaka na kiko ku bo kurason ta desea, na buey, karne, bina, bibida sterki of kiko ku bo kurason ta desea; i ayanan bo mester kome den e presensia di SENOR bo Dios i regosiha, abo i e hendenan di bo kas.

²⁷I no neglisha e levita ku ta den bo stat, pasobra e no tin parti ni erensia huntu ku bo.

²⁸"Na fin di kada tres ana bo mester trese henter e diesmo di bo produkshon di e ana ei, i deposita esaki den bo stat.

²⁹I e levita, pasobra e no tin parti ni erensia huntu ku bo, i e stranhero, e werfano i e biuda ku tin den bo stat, por bin i kome i keda satisfecho, pa SENOR bo Dios bendishonabo den tur e trabou ku bo man ta hasi.