Read Papantla Totonac Deuteronomio 15 Bible Online

Deuteronomio 15 - Papantla Totonac bible

Deuteronomio 15

¹"Na fin di kada shete ana bo mester kansela debe.

²I esaki ta e manera pa kansela debe: tur fiado mester kansela loke el a fia su prohimo; e no mester eksigie bek for di su prohimo ni for di su ruman, pasobra SENOR su ana pa kansela debe a wordu proklama.

³For di un stranhero bo por eksigi esaki, ma tur loke bo ruman homber tin di bo, bo man mester kansela.

⁴Sinembargo, lo no tin hende pober meimei di bo, komo ku SENOR siguramente lo bendishonabo na e tera ku SENOR bo Dios ta dunabo komo erensia pa bo podera di dje,

⁵si solamente bo skucha atentamente na e bos di SENOR bo Dios, pa perkura di kumpli ku henter e mandamentu aki ku mi ta ordenabo awe.

⁶Pasobra SENOR bo Dios lo bendishonabo manera El a primintibo, i abo lo fia na hopi nashon, ma abo si lo no pidi fiansa, i lo bo goberna riba hopi nashon, ma nan lo no goberna riba bo.

⁷"Si tin un hende pober serka bo, un di bo rumannan, den un di bo statnan na e tera ku SENOR bo Dios ta dunabo, no hasi bo kurason duru, ni sera bo man pa bo ruman pober,

⁸ma habri bo man hanchu p'e i generosamente fi'e sufisiente pa su nesesidat den tur loke e ta falta.

⁹Tene kuidou pa no tin un pensamentu perverso den bo kurason, bisando: 'E di shete ana, e ana pa kansela debe ta serka,' i bo mira bo ruman pober ku mal wowo i bo keda sin dun'e nada, e ora ei e por sklama na SENOR kontra bo i esaki lo wordu konta komo pika pa bo.

¹⁰Dun'e generosamente i no tene duele den bo kurason ora bo ta dun'e, pasobra pa e kos aki SENOR bo Dios lo bendishonabo den tur bo trabou i den tur loke bo ta hasi.

¹¹Pasobra nunka lo no falta hende pober na e tera; pesei mi ta ordenabo, bisando: 'Lo bo habri bo man hanchu pa bo ruman, pa esun den nesesidat i pa e hende pober na bo tera.'

¹²"Si bo ruman, un homber of muhe hebreo, wordu bendi ku bo, e ora ei e lo sirbibo seis ana, ma e di shete ana bo mester lagu'e bai liber.

¹³I ora bo lagu'e bai liber, no mand'e bai man bashi.

¹⁴Dun'e generosamente for di bo tou di bestia chikitu, for di bo plenchi-di-bati-mainshi i for di bo baki-di-pers-wendruif; dun'e segun SENOR bo Dios a bendishonabo.

¹⁵Korda ku bo tabata esklabu na tera di Egipto i ku SENOR bo Dios a redimibo; pesei mi ta ordenabo e kos aki awe.

¹⁶"I lo sosode ku si e esklabu bisabo: 'Mi no kier bai for di bo,' pasobra e ta stima abo i e hendenan di bo kas, komo ku ta bai e bon serka bo,

¹⁷e ora ei kohe un prim i pasa esaki dor di su orea kontra e porta, i e lo ta bo sirbido pa semper; i hasi meskos tambe ku bo sirbido muhe.

¹⁸"Lo no kai bo duru ora bo lagu'e bai liber, pasobra el a dunabo seis ana di dobel sirbishi di un homber kontrata; asina SENOR bo Dios lo bendishonabo den tur loke bo ta hasi.

¹⁹"Konsagra na SENOR bo Dios tur e primogenitonan machu ku nase di bo kria di baka i di bo tou di bestia chikitu; no traha ku e primogenito di bo kria di baka ni pela e primogenito di bo tou di karne.

²⁰Abo i e hendenan di bo kas mester kome esaki tur ana dilanti di SENOR bo Dios na e luga ku SENOR skohe.

²¹Ma si e tin un defekto, esta, si e ta koho of siegu of si e tin kualke defekto serio, bo no mag ofrese esaki komo sakrifisio na SENOR bo Dios.

²²Bo mester kom'e den bo statnan. Tantu esun impuru komo esun limpi por kom'e, manera ta kome gasel of bina.

²³Ma bo no mag kome su sanger. Bo mester basha esaki riba suela manera awa.