Read Papantla Totonac Deuteronomio 17 Bible Online

Deuteronomio 17 - Papantla Totonac bible

Deuteronomio 17

¹"No ofrese un buey of karne ku tin mancha of kualke defekto komo sakrifisio na SENOR bo Dios, pasobra esei ta un abominashon na SENOR bo Dios.

²"Si wordu hana meimei di boso, den kualke di bo statnan ku SENOR bo Dios ta dunabo, un homber of un muhe ku ta hasi loke ta malu den bista di SENOR bo Dios, dor di kibra Su aliansa,

³i ku a bai sirbi otro diosnan i a adora nan, of solo, of luna, of loke sea di e ehersito di shelu, loke Mi no a ordena,

⁴i si bo a wordu avisa di esaki i bo a tende di dje, e ora ei bo mester hasi un investigashon profundo. I mira, si ta berdat i ta sigur ku e abominashon aki a wordu hasi den Israel,

⁵e ora ei bo mester hiba e homber of muhe ei, ku a hasi e kos malu aki, na bo portanan di stat, esta, e homber of e muhe, i piedra e persona ei te ora ku e muri.

⁶Riba testimonio di dos testigu of tres testigu esun ku tin ku muri mester wordu mata; e no mester wordu mata riba testimonio di un testigu so.

⁷Man di e testigunan mester lanta prome kontra dje pa mat'e i despues man di henter e pueblo. Asina lo bo kita e maldat for di meimei di bo.

⁸"Si un kaso ta muchu difisil pa bo disidi, entre un klase di matamentu i otro, entre un klase di derecho legal i otro, i entre un klase di asalto i otro, asuntonan di diskushon den bo korte di hustisia, e ora ei bo mester lanta bai na e luga ku SENOR bo Dios skohe.

⁹Bai serka e saserdote levita of e hues ku t'ei den e dianan ei, i konsulta ku nan i nan lo deklarabo e veredikto di e kaso.

¹⁰I bo mester hasi segun e palabranan di e veredikto ku nan ta deklara na bo for di e luga ei ku SENOR skohe; i perkura di hasi segun tur loke nan sinabo.

¹¹Segun e palabranan di e lei ku nan ta sinabo i segun e veredikto ku nan ta partisipa na bo, bo mester hasi; no aparta bo mes for di e palabra ku nan ta deklara na bo, ni na man drechi ni na man robes.

¹²I e homber ku ta aktua ku tribilidat dor di no skucha e saserdote ku ta para einan pa sirbi SENOR bo Dios, dor di no skucha e hues, e homber ei mester muri; asina bo mester kita e maldat for di Israel.

¹³E ora ei henter e pueblo lo tende i tene miedu, i lo no aktua ku tribilidat mas.

¹⁴"Ora bo drenta e tera ku SENOR bo Dios ta dunabo, i bo podera di dje i biba den dje, i bo bisa: 'Lo mi pone un rei riba mi, manera tur e nashonnan ku tin ront di mi,'

¹⁵e ora ei siguramente bo mester pone un rei riba bo ku SENOR bo Dios skohe, un persona for di meimei di bo paisanonan bo mester pone komo rei riba bo. No pone un stranhero riba bo ku no ta bo paisano.

¹⁶Ademas, e rei no mester multiplika kabai pa su mes, ni hasi e pueblo bolbe Egipto pa multiplika kabai, komo ku SENOR a bisabo: 'No bolbe pa e kaminda ei nunka mas.'

¹⁷Ni e no mester tuma hopi esposa pa su mes, pa su kurason no desvia; ni e no mester montona plata ni oro na abundansia pa su mes.

¹⁸"Awor lo sosode ku ora e sinta riba trono di su reino, e mester skirbi pa su mes un kopia di e lei aki riba un rol den presensia di e saserdotenan levita.

¹⁹I e mester tin esaki huntu kune i mester les'e tur e dianan di su bida, pa e sina teme SENOR su Dios, dor di perkura di kumpli ku tur e palabranan di e lei i di e statutonan aki,

²⁰pa su kurason no wordu halsa riba su paisanonan i pa e no bira bai for di e mandamentu, ni na man drechi ni na man robes; pa e ku su yu hombernan sigui biba pa hopi tempu den su reino meimei di Israel.