Read Papantla Totonac Deuteronomio 18 Bible Online

Deuteronomio 18 - Papantla Totonac bible

Deuteronomio 18

¹"E saserdotenan levita, henter e tribu di Levi, no mester tin parti ni erensia huntu ku Israel; nan lo kome di e ofrendanan di kandela na SENOR i di Su erensia.

²I nan no mester tin erensia entre nan paisanonan; SENOR ta nan erensia, manera El a priminti nan.

³"Awor esaki lo ta e derecho di e saserdotenan di parti di e pueblo, di parti di esnan ku ta ofrese sakrifisio, sea un buey of un karne, di kual nan lo duna e saserdote e skouder, e dos bandanan di kara i e stoma.

⁴Bo mester dun'e e prome frutanan di bo mainshi, bo bina nobo, bo zeta i e prome pelamentu di bo karnenan.

⁵Pasobra SENOR bo Dios a skohe e ku su yu hombernan for di tur bo tribunan, pa para i pa sirbi den nomber di SENOR pa semper.

⁶"Awor si un levita sali for di un di bo statnan den henter Israel kaminda e ta biba, i segun e deseo di su kurason e bin na e luga ku SENOR skohe,

⁷e ora ei e por sirbi den nomber di SENOR su Dios, manera tur su rumannan, e levitanan ku ta para ayanan dilanti di SENOR.

⁸Nan mester kome porshonnan igual, ademas di loke nan ta risibi for di benta di propiedat di nan tatanan.

⁹"Ora bo drenta e tera ku SENOR bo Dios ta dunabo, no sina imita e abominashonnan di e nashonnan ei.

¹⁰Entre boso no mag wordu hana ningun hende ku ta hasi su yu homber of su yu muhe pasa dor di kandela, ni ningun hende ku ta praktika adivinashon of ku ta praktika bruheria, of ku ta pronostika, of ku ta praktika magia,

¹¹ni ningun hende ku ta plega hende, of ku ta montado of spiritista, of ku ta konsulta ku e mortonan.

¹²Pasobra ken ku hasi e kosnan aki ta un abominashon na SENOR; i pa motibu di e abominashonnan aki SENOR bo Dios lo kore ku nan for di bo dilanti.

¹³Bo mester ta perfekto dilanti di SENOR bo Dios.

¹⁴"Pasobra e nashonnan ei, ku bo mester kore kune for di bo dilanti, ta skucha na esnan ku ta praktika bruheria i adivinadonan, ma abo, SENOR bo Dios no a permitibo hasi asina.

¹⁵SENOR bo Dios lo lanta pa bo un profeta manera ami for di meimei di bo, for di bo paisanonan; boso mester skucha na dje.

¹⁶Esaki ta segun tur loke bo a pidi di SENOR bo Dios na Horeb riba e dia di asamblea, bisando: 'No lagami tende e bos di SENOR mi Dios mas, ni lagami mira e kandela grandi aki mas, pa mi no muri.'

¹⁷"I SENOR a bisami: 'Loke nan a papia ta bon.

¹⁸Lo Mi lanta un profeta manera abo for di meimei di nan paisanonan, i lo Mi pone Mi palabranan den su boka, i e lo papia ku nan tur loke Mi orden'e.

¹⁹I lo sosode ku ken ku no skucha Mi palabranan ku e lo papia den Mi nomber, Ami mes lo pidie kuenta di esaki.

²⁰Ma e profeta ku ta tribi papia un palabra den Mi nomber ku Mi no a orden'e papia, of ku e ta papia den nomber di otro diosnan, e profeta ei mester muri.'

²¹"I si bo bisa den bo kurason: 'Kon nos lo konose e palabra ku SENOR no a papia?'

²²si un profeta papia den nomber di SENOR i e kos no sosode ni bira realidat, esei ta loke SENOR no a papia. E profeta a papia esaki ku tribilidat; no tene miedu di dje.