Read Papantla Totonac Deuteronomio 19 Bible Online

Deuteronomio 19 - Papantla Totonac bible

Deuteronomio 19

¹"Ora SENOR bo Dios kaba ku e nashonnan, kende nan tera SENOR bo Dios ta dunabo, i bo kore ku nan i bai biba den nan statnan i den nan kasnan,

²e ora ei aparta tres stat pa bo mes meimei di e tera ku SENOR bo Dios ta dunabo pa bo podera di dje.

³Prepara e kamindanan pa bo mes, i parti na tres pida e teritorio di bo tera ku SENOR bo Dios lo dunabo komo erensia, pa tur matado por hui bai ayanan.

⁴"Awor esaki ta e kaso di e matado ku por hui bai ayanan i keda na bida: ora ku e mata su amigu no intenshonalmente, sin ku e tabatin odio kontra dje den pasado--

⁵manera ora un homber bai den mondi ku su amigu pa kap palu, i e zwai e hacha ku su man pa kap e palu, i e kabes di heru kita for di e kabu i dal su amigu, asina ku e ta muri--e por hui bai na un di e statnan aki i keda na bida;

⁶pa e vengado di sanger, den e kayente di su rabia, no persigui e matado i alkans'e, pasobra e kaminda ta largu, i mat'e, maske e no tabata merese morto, komo ku e no tabatin odio kontra dje den pasado.

⁷Pesei mi ta ordenabo, bisando: 'Lo bo aparta tres stat pa bo mes.'

⁸"I si SENOR bo Dios hasi bo teritorio mas grandi, manera El a hura na bo tatanan, i dunabo henter e tera ku El a priminti di duna bo tatanan--

⁹si bo perkura di kumpli ku henter e mandamentu aki ku mi ta ordenabo awe, pa stima SENOR bo Dios i pa kana den Su kamindanan semper--e ora ei bo mester anadi tres stat mas pa bo mes na e tresnan aki.

¹⁰Asina sanger inosente lo no wordu drama meimei di e tera ku SENOR bo Dios ta dunabo komo erensia, i kulpa di sanger keda riba bo.

¹¹"Ma si tin un hende ku ta odia su prohimo i ta skonde ward'e, i ta lanta kontra dje i ta dal e asina ku e ta muri, i e hui bai na un di e statnan aki,

¹²e ora ei e ansianonan di su stat mester manda busk'e, sak'e for di einan i entregu'e den man di e vengado di sanger, pa e muri.

¹³No tene duele di dje, ma bo mester kita sanger di e inosente for di Israel, pa bai bon ku bo.

¹⁴"No kita e markanan di propiedat di bo prohimo, ku e antepasadonan a pone den bo erensia ku bo ta bai ereda na e tera ku SENOR bo Dios ta dunabo, pa bo podera di dje.

¹⁵"Un solo testigu no mester lanta kontra un hende pa motibu di kualke inikidat of kualke pika ku el a komete; riba testimonio di dos of tres testigu un kaso ta keda konfirma.

¹⁶"Si un testigu falsu lanta kontra un hende pa akus'e di mal echo,

¹⁷e ora ei tur dos homber ku tin e pleitu mester para dilanti di SENOR, dilanti di e saserdotenan i e huesnan ku lo ta einan den e dianan ei.

¹⁸I e huesnan mester hasi un investigashon profundo; i si e testigu ta un testigu falsu i el a akusa su ruman falsamente,

¹⁹e ora ei boso mester hasi kune meskos ku e tabatin intenshon di hasi ku su ruman. Asina bo mester kita e maldat for di meimei di boso.

²⁰I esnan ku keda lo tende i tene miedu, i nunka mas lo hasi un maldat asina meimei di boso.

²¹Pesei, no tene duele: bida pa bida, wowo pa wowo, djente pa djente, man pa man, pia pa pia.