Read Papantla Totonac Deuteronomio 2 Bible Online

Deuteronomio 2 - Papantla Totonac bible

Deuteronomio 2

¹"E ora ei nos a bira i a bai den desierto, i a pasa pa e kaminda di Laman Kora, manera SENOR a bisami, i a pasa ront di Seru Seir pa hopi dia.

²"I SENOR a papia ku mi, bisando:

³'Boso a pasa ront di e seru aki basta kaba. Bira panort awor,

⁴i ordena e pueblo, bisando: "Boso ta bai pasa dor di e teritorio di boso rumannan, e yu hombernan di Esau, kendenan ta biba na Seir; i nan lo tin miedu di boso. Asina tene hopi kuidou;

⁵no proboka nan, pasobra lo Mi no duna boso nada di nan tera, ni sikiera grandura di un plant'i pia, pasobra Mi a duna Esau Seru Seir komo propiedat.

⁶Boso mester kumpra kuminda serka nan ku plaka, pa boso kome, i tambe boso mester kumpra awa serka nan ku plaka, pa boso bebe.

⁷"Pasobra SENOR bo Dios a bendishonabo den tur loke bo a hasi; E tabata sa di bo dwalmentu dor di e desierto grandi aki. SENOR bo Dios tabata ku bo durante e kuarenta ananan aki; bo no tabatin falta di nada."'

⁸"Asina nos a pasa leu for di nos rumannan, e yu hombernan di Esau, kendenan ta biba na Seir, leu for di e kaminda di Araba, leu for di Elat i for di Ezion-geber. I nos a bira i a pasa pa e kaminda di e desierto di Moab.

⁹"E ora ei SENOR a bisami: 'No molestia Moab, ni proboka nan pa bai guera, pasobra Mi no ta dunabo nada di nan tera komo propiedat, pasobra Mi a duna Ar na e yu hombernan di Lot komo propiedat.'"

¹⁰(E emitanan tabata biba einan prome, un pueblo mes grandi, mes numeroso i mes haltu ku e anakeonan.

¹¹Meskos ku e anakeonan, nan tambe ta wordu konsidera komo gigante, ma e moabitanan ta yama nan emita.

¹²Antes e horeonan tabata biba na Seir, ma e yu hombernan di Esau a kore ku nan i a destrui nan for di nan dilanti i a stablese nan mes na nan luga, meskos ku Israel a hasi ku e tera ku SENOR a duna nan komo propiedat.)

¹³"Awor, boso lanta i krusa roi Zered." Asina nos a krusa roi Zered.

¹⁴"Awor e tempu ku a tuma nos pa bin for di Kades-barnea, te ora nos a krusa roi Zered, tabata trint'i ocho ana, te ora henter e generashon di e hombernan di guera a perese for di den e kampamentu, manera SENOR a hura na nan.

¹⁵Ademas, e man di SENOR tabata kontra nan, pa destrui nan for di den e kampamentu, te ora nan tur a perese.

¹⁶"Asina a sosode ku ora tur e hombernan di guera finalmente a perese for di meimei di e pueblo,

¹⁷SENOR a papia ku mi, bisando:

¹⁸'Awe lo bo krusa Ar, e frontera di Moab.

¹⁹I ora bo yega dilanti di e yu hombernan di Amon, no molestia nan ni proboka nan, pasobra lo Mi no dunabo nada di e tera di e yu hombernan di Amon komo propiedat, pasobra Mi a duna esaki na e yu hombernan di Lot komo propiedat.'"

²⁰(Tambe e ta wordu konsidera komo tera di e gigantenan, pasobra e gigantenan tabata biba den dje antes, ma e amonitanan ta yama nan zomzomeo,

²¹un pueblo mes grandi, mes numeroso i mes haltu ku e anakeonan, ma SENOR a destrui nan nan dilanti. I nan a saka nan afo i a stablese nan mes na nan luga,

²²meskos ku SENOR a hasi pa e yu hombernan di Esau, kendenan ta biba na Seir, tempu ku El a destrui e horeonan for di nan dilanti; i nan a saka nan afo, i a stablese nan mes na nan luga te dia djawe.

²³I e aveonan ku tabata biba den e pueblitonan te na Gaza, e kaftoreonan ku a bin for di Kaftor a destrui nan i a bai biba na nan luga.)

²⁴'Lanta, sali i pasa dor di e vaye di Arnon. Mira! Mi a entrega Sehon e amoreo, rei di Hesbon, i su tera den bo man; kuminsa podera di dje i probok'e pa bataya.

²⁵Awe lo Mi kuminsa pone spantu i miedu di bo riba e pueblonan tur kaminda bou di e shelunan, kendenan, ora nan tende di bo fama, lo tembla i keda den angustia pa bo motibu.'

²⁶"Asina mi a manda for di e desierto di Kademot mensaheronan serka Sehon, rei di Hesbon, ku palabranan di pas, bisando:

²⁷'Lagami pasa dor di bo tera, i lo mi pasa solamente riba kaminda grandi; lo mi no kita ni na man drechi ni na man robes.

²⁸Bendemi kuminda pa plaka, pa mi kome, i dunami awa pa plaka, pa mi bebe; solamente, lagami pasa na pia,

²⁹meskos ku e yu hombernan di Esau ku ta biba na Seir i e moabitanan ku ta biba na Ar a hasi pa mi, te ora mi krusa Jordan bai na e tera ku SENOR nos Dios ta duna nos.'

³⁰Ma Sehon, rei di Hesbon, no tabata kier pa nos pasa dor di su tera, pasobra SENOR bo Dios a hasi su spiritu duru i a hasi su kurason opstina, pa entregu'e den bo man, manera ta awe.

³¹"I SENOR a bisami: 'Mira, Mi a kuminsa entrega Sehon i su tera na bo. Kuminsa podera di dje, pa bo tin su tera komo propiedat.'

³²"E ora ei Sehon ku henter su pueblo a sali pa kontra ku nos den bataya na Jahaza.

³³I SENOR nos Dios a entregu'e na nos; i nos a derota e ku su yu hombernan i henter su pueblo.

³⁴Asina e tempu ei nos a kaptura tur su statnan i a destrui tur homber, muhe i mucha di tur stat. Nos no a laga ni un sobrebibiente.

³⁵Solamente e bestianan nos a kohe pa nos mes i e botin di e statnan ku nos a kaptura.

³⁶For di Aroer ku ta keda na rant di e vaye di Arnon, i for di e stat ku ta keda den e vaye, te na Galaad, no tabatin ni un stat ku tabata muchu fuerte pa nos; SENOR nos Dios a entrega tur na nos.

³⁷Solamente serka di e tera di e yu hombernan di Amon boso no a yega, ni serka di e oriya di Riu Jabok, ni serka di e statnan den e serunan, ni serka di ningun luga ku SENOR nos Dios a prohibi nos.