Read Papantla Totonac Deuteronomio 20 Bible Online

Deuteronomio 20 - Papantla Totonac bible

Deuteronomio 20

¹"Ora bo sali pa bringa kontra bo enemigunan i bo mira kabai i garoshi i un pueblo mas numeroso ku bo, no tene miedu di nan, pasobra SENOR bo Dios, Kende a sakabo for di tera di Egipto, ta ku bo.

²Awor lo sosode ku ora boso ta serka di drenta bataya, e saserdote lo yega serka i papia ku e pueblo.

³I e lo bisa nan: 'Tende, O Israel, awe boso ta serka di drenta bataya kontra boso enemigunan. No laga boso kurason desmaya. No tene miedu ni perde kabes, ni tembla nan dilanti,

⁴pasobra SENOR boso Dios ta Esun ku ta bai ku boso, pa bringa pa boso kontra boso enemigunan, pa salba boso.'

⁵"E ofisialnan tambe lo papia ku e pueblo, bisando: 'Ken a traha un kas nobo, ma ainda no a dedik'e? Lagu'e sali bai su kas bek, pa e no muri den bataya i un otro homber dedik'e.

⁶I ken a planta un kunuku di wendruif, ma ainda no a disfruta di dje? Lagu'e sali bai su kas bek, pa e no muri den bataya i un otro homber disfruta di dje.

⁷I ken a kompromete su mes ku un muhe, ma ainda no a kasa kune? Lagu'e sali bai su kas bek, pa e no muri den bataya i un otro homber kasa kune.'

⁸E ora ei e ofisialnan lo sigui papia ku e pueblo i nan lo bisa: 'Ken tin miedu i tin kurason desmaya? Lagu'e sali bai su kas bek, pa e no hasi kurason di su rumannan dirti manera su mes kurason.'

⁹I lo sosode ku ora e ofisialnan kaba di papia ku e pueblo, nan lo nombra komandantenan di ehersitonan na kabes di e pueblo.

¹⁰"Ora bo aserka un stat pa bringa kontra dje, ofres'e pas.

¹¹I lo sosode ku si e bai di akuerdo pa hasi pas ku bo i habri porta pa bo, e ora ei lo t'asina ku henter e pueblo ku tin den dje lo hasi trabou forsa pa bo i lo sirbibo.

¹²Ma si e no hasi pas ku bo, ma ta hasi guera ku bo, e ora ei bo mester rondon'e.

¹³Ora SENOR bo Dios entregu'e den bo man, mata tur homber den dje ku filo di spada.

¹⁴Solamente e muhenan, muchanan i bestianan, i tur loke tin den e stat, henter e botin, bo mag kohe pa bo mes; anto bo mag hasi uzo di e botin di bo enemigunan ku SENOR bo Dios a entrega na bo.

¹⁵Asina bo mester hasi ku tur e statnan ku ta keda masha leu for di bo, ku no ta pertenese na e statnan di e nashonnan aki serka.

¹⁶"Solamente den e statnan di e pueblonan aki, ku SENOR bo Dios ta dunabo komo erensia, bo no mester laga nada ku ta hala rosea keda na bida.

¹⁷Ma bo mester destrui nan kompletamente: e heteo, e amoreo, e kananeo, e ferezeo, e heveo i e j ebuseo, manera SENOR bo Dios a ordenabo,

¹⁸pa nan no sina boso hasi segun tur nan abominashonnan ku nan a hasi pa nan diosnan, i boso peka kontra SENOR boso Dios.

¹⁹"Ora bo rondona un stat pa un tempu largu, pa bringa kontra dje pa kaptur'e, no destrui su palunan dor di zwai hacha kontra nan; pasobra bo mag kome di nan, ma bo no mag kap nan. Pasobra ta hende e palu di kunuku ta anto, ku bo mester rondon'e?

²⁰Solamente e palunan ku bo sa ku nan no ta palu di fruta, eseinan bo mag destrui i kap pa bo konstrui baluarte pa ataka e stat ku ta bringa kontra bo, te ora ku esaki kai.